घरेलु हिंसा पीडितद्वारा प्रहरीमा उजुरी

  ०७६ जेठ २ गते

दुधौली नगरपालिका–३ निपाने कालापानीकी ४४ वर्षीया डस्नी कुमँरलाई ५० वर्षीय पति सञ्चा कुमँरले सोही ठाउँ बस्ने २७ वर्षीया छिमेकी बेलमती कुमँरको सहयोगमा वैशाख ३० र ३१ गते कुटपिट गरेको पीडितले आरोप लगाएकी छन् ।

पीडित महिलालाई आरोपितले वैशाख ३० गते शरीरका विभिन्न अङ्गमा कुटपिट गर्नुका साथै योनीमा दालभात र अचार कोचिदिएको पीडितले बताइन् ।

वैशाख ३१ गते बेलमतीको सहयोगमा कुटपिट गरी ढुङ्गा प्रहार गरी घाइते बनाएको भन्दै पीडितका ४९ वर्षीय दाजु लुदा कुमँर र २३ वर्षीय छोरा हिरन कुमँरले आरोपितविरूद्ध जिल्ला प्रहरी कार्यालयमा वैशाख ३१ गते उजुरी दिएको जिल्ला प्रहरी कार्यालय सिन्धुलीका एसपी चक्रबहादुर सिंहले बताए ।

पीडितलाई आरोपित पतिले विगत तीन वर्षदेखि ‘तँ बुढी भइस् अर्की पत्नी ल्याउँछु’ भन्दै कुटपिट गर्दै आएको उजुरीमा उल्लेख गरिएको छ ।

कुटपिटबाट घाइते भएकी डस्नीलाई वडा सदस्य धनकुमारी घिमिरे र मेलमिलापकर्ताहरूको सहयोगमा पीडितका छोरा र दाजुले वैशाख ३१ गते जिल्ला अस्पताल सिन्धुलीमा उपचारका लागि ल्याएको पीडितका दाजुले बताए ।

पीडित महिलाको उपचार एकद्वार सङ्कट व्यवस्थापन केन्द्रको सहयोगमा जिल्ला अस्पतालमा भइरहेको र घाउजाँच केश गरेर कारवाही अगाडि बढाइने एसपी सिंहले बताए ।

photo2019-5-16 Sindhuli


बिमला पाण्डे