घरेलु हिंसा घटनाका आरोपित विरूद्ध प्रहरीमा उजुरी

  ०७६ जेठ ३१ गते

छिन्नमस्ता गाउँपालिका–२ मोहनपुरकी २७ वर्षीया बिनिता यादवलाई समाजवादी पार्टी नेपाल सप्तरीका जिल्ला अध्यक्षसमेत रहेका ३५ वर्षीय पति केदारप्रसाद यादवले जेठ ३१ गते कुटपिट गरी घाइते बनाएको पीडित पक्षको आरोप छ ।

द्वारका श्रीलाल सातनी यादव मावि बथनाहाकी शिक्षिका बिनितालाई विद्यालयमा पढाएर स्कुटीमा फर्किरहेका बेला राजविराज–हनुमाननगर सडक खण्डअन्तर्गत देउरी भरुवास्थित खाँडो खोलाको पुलदेखि ३ सय मिटर पश्चिमतर्फ रोकेर अश्लिल गालीगलौज गर्नुका साथै आरोपितले लात, मुक्का र हेल्मेटले कुटेर स्कुटी खोसी फरार भएको पीडितले आरोप लगाइन् ।

कुटपिटबाट घाइते बिनिता राजविराजस्थित गजेन्द्रनारायण सिंह अस्पतालमा भर्ना भएको माइती पक्षले जनाएको छ ।

पार्टी कामले हनुमाननगर कङ्कालिनी नपास्थित रम्पुरा मल्हनियाँबाट मोटरसाइकलमा फर्किरहेका अध्यक्ष यादवले पत्नी सवार स्कुटीको साँचो माग्दा नदिएपछि खोसेको तर कुटपिट नगरेको बताए ।

आफू चढेको मोटरसाइकल साथीलाई दिएर बिनिता चढेको स्कुटी लिएर आफू राजविराज फर्किएको भने अध्यक्ष यादवले स्वीकार गरेका छन् ।

सामाजिक परम्पराअनुसार नौ वर्षअघि विवाहित उनीहरूको आठ वर्षीय एक छोरा छन् । बिनितालाई पटकपटक कुटपिट, गालीगलौज गर्दै आएपछि आठ वर्षदेखि बिनिता राजविराज नपा–५ सरस्वती टोलस्थित माइतीघरमा बस्दै आएकी छिन् ।

गत वर्ष स्थानीय तहको निर्वाचनमा छिन्नमस्ता गाउँपालिकाको अध्यक्षको उम्मेदवार हुँदा सँगै राखेका आरोपितले निर्वाचन सकिए लगत्तै झगडा गर्न थालेपछि पीडित पुनः माइतीघरमा बस्दै आएकी छिन् ।

घाइते बिनिताले कुटपिट गर्ने आरोपित पतिलाई गिरफ्तार गरी हदैसम्मको सजाय गर्न माग गर्दै जिल्ला प्रहरी कार्यालय सप्तरीमा जेठ ३१ गते उजुरी समेत दिएकी छिन् ।

पतिको गालीगलौज, कुटपिट सहँदै आएको बताएकी बिनिताले भनिन्–‘घरभित्र कुटेको कुरा त लुकाएकै थिएँ । तर, बाटोघाटोमै पिट्न थालेपछि सधैँ कति पिटाइ खाएर बस्नु भन्दै प्रहरी समक्ष उजुरी दिएकी हुँ ।’


मनोहरकुमार पोखरेल