घरेलु हिंसा घटनाका आरोपित गिरफ्तार

  ०७६ असोज १ गते

दशरथचन्द नगरपालिका-४ शाहीलेकस्थित बिच बजारमा दशरथचन्द नगरपालिका-४ की २८ वर्षीया सुमन भट्टलाई भदौ ३१ गते कुटपिट गरेको आरोपमा प्रहरीले सोही दिन ३० वर्षीय दिनेशप्रसाद भट्टलाई गिरफ्तार गरेको छ ।

बिच बजारमा पतिले कुटपिट गरी घाइते बनाएको भन्दै पीडित महिलाले दिएको निवेदनका आधारमा दिनेशलाई गिरफ्तार गरिएको जिल्ला प्रहरी कार्यालय, बैतडीका डिएसपी डिल्लीनारायण पाण्डेले बताए । उनका अनुसार पीडित महिलाको मुख र शरीरमा निलडाम छ ।

पीडित सुमनका अनुसार यसअघि घरमा पनि पतिले पटकपटक कुटपिट र यातना दिने गरेका थिए । विगत चार वर्षदेखि आफूले घरेलु हिंसा सहिरहेको पीडित सुमनको भनाई छ । 'सधैँ कुटपिट गरिरहनुहुन्छ । अब त अति भयो । त्यसैले प्रहरीमा निवेदन दिएकी हुँ ।'-उनले भनिन् ।

पीडित महिलाको उपचार जिल्ला अस्पताल बैतडीमा गरिएको प्रहरीले जनाएको छ । घटनाबारे थप अनुसन्धान भइरहेको प्रहरीको भनाई छ ।


नरी बडु