घरेलु हिंसाका कारण घाइते भएकी महिलाको उपचार हुँदै, आरोपित फरार

  ०७६ कात्तिक १७ गते

दुधौली नगरपालिका–४ हटियाकी ३० वर्षीया आशा सदालाई ३२ वर्षीय पति रितु सदाले पाकिरहेको माछाको तरकारीको झोलमा अनुहार डुबाएर घाइते बनाएको पीडित पक्षको आरोप छ ।

पीडित महिलालाई कात्तिक १६ गते दिउँसो खाना पकाउँदै छिमेकीहरूसँग गफ गरिरहेकी सदालाई रितुले तरकारीमा मुख डुबाइदिएपछि घरमै थुनेर फरार भएका छन् ।

उनको उपचार सिन्धुली अस्पतालमा भइरहेकोे छ । कात्तिक १६ गते नै घटना घटे पनि उनलाई कात्तिक १७ गते मात्र छिमेकीको सहयोगमा सिन्धुली अस्पतालमा ल्याइएको हो ।

उपचारका लागि आर्थिक अभाव भएका कारण स्थानीयले केही रकम सङ्कलन गरी उपचारका लागि सिन्धुली ल्याएका हुन् । उनको साथमा आशाकी आमा मङ्गली सदा र दिदी गिता सदा उपचारका लागि आएका छन् ।

घाइते आशाको अनुहार ढडेको छ । तातो तरकारीको झोलमा डुबाइएकी आशाको स्वास्थ्य अवस्था गम्भीर रहेको उपचारमा संलग्न डाक्टरले बताएका छन् ।

मनोसामाजिक परामर्शकर्ता सर्मिला राउतले घटना थाहा पाएपछि उद्धार गरेको बताइन् । आशा कात्तिक १७ गते बिहान राउतलाई भेट्न गएपछि मात्र घटना बारेमा थाहा पाएको राउतले बताइन् ।

उनका अनुसार डकाहा स्वास्थ्य चौकीमा उपचार हुन नसकेपछि स्थानीयसँग पैसा उठाएर अस्पताल ल्याइएको हो । उनका जुम्ल्याहा एक वर्षका छोरा र अन्य दुई जना छोराछोरी गरी चार जना सन्तान छन् ।

पीडितको उपचार सिन्धुली अस्पतालमा नहुने भएपछि अस्पतालले काठमाडौँ रिफर गरेको छ । उनलाई ओसिएमसी सिन्धुलीको सहयोगमा टिचिङ अस्पताल लाने तयारी भएको सिन्धुली अस्पतालले जनाएको छ ।

टिचिङ अस्पतालमा निःशुल्क उपचारको लागि पहल भएको सिन्धुली अस्पताल विकास समितिका अध्यक्ष प्रल्हादकुमार पोखरेलले बताए । बिरामीका आफन्तलाई खान बस्न र उपचार खर्च निःशुल्क गरिएको पोखरेलले जानकारी दिए ।

आरोपित रितु सदालाई गिरफ्तार गर्न प्रहरी परिचालन गरिएको जिल्ला प्रहरी कार्यालय सिन्धुलीका डिएसपी लोकदर्शन थापाले बताए ।

उनका अनुसार जिल्ला प्रहरी कार्यालय सिन्धुलीमा पीडितका आफन्तले कात्तिक १७ गते लिखित उजुरी दिएका छन् ।


बिमला पाण्डे