घरेलु हिंसाका आरोपितबिरूद्ध उजुरी दर्ता

  ०७७ चैत १७ गते

आठवीसकोट नगरपालिका –९ जालदैनकी २६ वर्षीया अनिता आग्रीले २९ वर्षिय पति उदय आग्रीबिरूद्ध घरेलु हिंसा गरेको भन्दै ०७७ चैत १६ गते जिल्ला प्रहरी कार्यालयमा उजुरी दिनुभएको छ ।

पतिले आफूलाई सँधै कुटपिट गर्ने गरेको र पछिल्लो पटक चैत ५ गते फलामको रड र बीयरको बोतलले शरिरका विभिन्न भागमा मरनासन्न हुनेगरी कुटपिट गरेपछि ८ दिनसम्म थला परेको पीडितले दुःखेसो पोख्नुभयो ।

कुटपिटबाट घाइते भएपछि ८ दिनसम्म छिमेकीले हेरचाह गरेको र ९ दिनपछि कानुनी उपचारको लागि आफन्तको सहयोगमा सदरमुकाम खलङ्गगा आएकी अनिता अझै सम्म हिड्न नसक्ने बताउनुहुन्छ ।

स्वाभिमान लघुबित्त संस्था खजुरा बाँकेमा कार्यरत पतिले चैत ५ गते घर आएर बिना कारण आफूलाई कुटपिट गरी दुईजना छोराबाट समेत अलग गराउँदा आफू धेरै पीडामा रहेको अनिताको गुनासो छ ।

स्वास्थ्य उपचार र कानुनी सहयोग गरिदिन भन्दै चैत १३ गते इन्सेकमा निवेदन दिएपछि इन्सेक प्रतिनिधिकै पहलमा प्रहरीमा उजुरी दर्ता गरिएको थियो ।

उजुरीपछि आरोपितलाई छलफलमा उपस्थित गराउने जिल्ला प्रहरी कार्यालयका इन्स्पेक्टर कपिल शाहीको भनाई छ ।

पीडितको स्वास्थ्य उपचार जिल्ला अस्पताल सल्ले रूकुम पश्चिममा भएको अस्पतालका डाक्टर राजकुमार भुजेलले जानकारी दिनुभयो ।


मनिषा केसी