घरेलुहिंसा पीडित महिलाको इन्सेकको पहलमा पुनर्स्थापना

  ०७७ असार २९ गते

कुटपिट गरी घर निकाला गरिएकी बनगाड कुपिण्डे नपा–५ की २१ वर्षीया जमुना रानालाई इन्सेकको पहलमा ०७७ असार २७ गते पुनर्स्थापना गरिएको छ  ।

२४ वर्षीय पति लोकन्द्र रावत र परिवारका अन्य व्यक्तिहरूले असार ५ गते कुटपिट गरी घर निकाला गरेपछि न्यायका लागि असार १४ गते सदरमुकाम आएकी पीडित महिलालाई इन्सेकले बास बस्न आवास गृहसँग समन्वय र यातायातको लागि १ हजार रुपियाँ सहयोग गरेको थियो ।

जिल्ला अदालतमा अंश मुद्दा चलिरहेकोले असार १८ गते इन्सेक प्रतिनिधिको पहलमा जिल्ला प्रहरी कार्यालयमा पुनर्स्थापना गराइपाउँ भन्ने मुद्दा दर्ता भएको थियो । असार २६ गते इन्सेक प्रतिनिधिद्वारा घटनास्थलको अनुगमन तथा आफन्त र इलाका प्रहरी कार्यालय सल्लीबजारमा पुगेर विस्तृत विवरण लिइएको थियो ।

प्रहरीले असार २७ गते दुवै पक्षबीच छलफल गर्दा घटनाका आरोपित २४ वर्षीय लोकन्द्र रावलते माफी मागेको र यातना नदिने सहमति गरेपछि पीडितलाई पहिला बसेकै घरमा पठाइएको डिएसपी ढकेन्द्र खतिवडाले जानकारी दिनुभयो ।

दुइ वर्षदेखि छिमेकीको घरमा बसेर काम गर्दै पेट पालिरहेको अवस्थामा पतिले घरमा बस्न नदिने धम्की दिएपछि बसिरहेको कोठा छाड्नु परेको र अब मासिक भाडा समेत व्यहोर्ने तथा कुनै तनाव नदिने सहमति भएको पीडितले बताउनुभयो ।


मिना बुढाथोकी