गोरखापत्र दैनिकका समाचारदाता भट्टराईलाई मार्ने धम्की

  ०७६ असार २२ गते

गोरखापत्र दैनिकका ओखलढुङ्गा समाचारदाता मनोजबहादुर भट्टराईलाई ठगी मुद्दामा फरार रहेका एक निजी कम्पनीका सञ्चालक सुवास कार्कीले असार २१ गते मार्ने धम्की दिएका छन् ।

सिड्स ब्याङ्क नामक बिउजिन कम्पनीका सञ्चालक चम्पादेवी गाउँपालिका–६ का सुवास कार्कीले आफूविरूद्ध समाचार लेखेको भन्दै फेसबुकमार्फत पत्रकार भट्टराईलाई मार्ने धम्की दिएका हुन् ।

कार्की ठगी मुद्दामा तीन महिनायता प्रहरीको फरार सूचीमा छन् । उनीविरूद्ध पक्राउ पुर्जी जारी गरेर खोजी भइरहे पनि प्रहरीले गिरफ्तार भने गरेको छैन ।

कार्कीले दैनिक अनलाइनमार्फत नेता, सांसद र प्रहरीसँग सम्बन्ध रहेको भन्दै किसान र समाचार लेख्ने पत्रकारलाई धम्की दिँदै आएको आरोप पीडित पत्रकार भट्टराईले बताए ।

‘फेसबुक र मेसेञ्जरमार्फत लगातार धम्याएका थिए असार २१ गते मार्ने धम्की दिए ।’–भट्टराईले भने । उनले गोरखापत्र दैनिक र थाहा सञ्चार अनलाइनमा फरार अभियुक्त प्रहरीले नसमातेको विषयमा समाचार लेखेका थिए । उनी नेपाल पत्रकार महासङ्घ जिल्ला शाखा ओखलढुङ्गाका सदस्य समेत हुन् ।

कृषकलाई विउ मल उपलब्ध गराउने र उनीहरूका उत्पादन बजारीकरण गर्ने भन्दै कार्कीले सिड्स ब्याङ्क नामक कम्पनी खोलेर किसानसँग रकम लिएपछि भागेका थिए ।

आफूहरूलाई ठगी गरेको आरोपमा किसानहरूले प्रहरीलाई उजुरी हालेपछि विभिन्न सञ्चार माध्ययममा आएका समाचारको आधारमा कार्कीले गोरखापत्र दैनिकका पत्रकार मनोज भट्टराई धम्क्याएका हुन् ।

भट्टराईले आफू र आफ्नो परिवारलाई सिध्याउने धम्की दिएको बताए । यसबारे प्रहरीले भने चासो नदिएको उनको भनाइ छ ।

पत्रकार धम्याएको विषयमा पत्रकार महासङ्घ, ओखलढुङ्गा शाखाले पत्रकारको पेशागत सुरक्षा शुनिश्चित गर्न सरकारसँग माग गरेको छ ।

जिल्ला शाखाले विज्ञप्ति जारी गर्दै फरार अभियुक्तबाटै धम्की आउनु र प्रहरी मौन रहनु रहस्यमय भन्दै दोषीमाथि कडा कारवाही गर्न माग गरेको छ ।

फरार अभियुक्त कार्कीका विषयमा जिल्ला प्रहरी कार्यालयका प्रमुख पुष्पराज मल्लले ठगीमा मुद्दा चलेकाले जहाँ गए पनि फरक नपर्ने भन्दै एक दिन प्रहरीले समात्ने बताए ।


शिवप्रसाद ढुङ्गाना