समाचारहरू

अनौपचारिक क्षेत्र सेवा केन्द्र (इन्सेक) का अध्यक्ष सुबोधराज प्याकुरेलले समाजिक क्षेत्रमा कार्यरत गैरसरकारी संस्थाहरू पारदर्शी एवम् जवाफदेही हुनुपर्नेमा बताएका छन् ।

युएसएआईडी, अनौपचारिक क्षेत्र सेवा केन्द्र (इन्सेक), एफएचआई ३६० को संयुक्त आयोजनामा पुस ६ गते काठमाडौंमा सम्पन्न गैरसरकारी संस्थाको सुशासन, प्रभावकारिता एवं जवाफदेहितासम्बन्धी अन्तरक्रिया कार्यक्रमलाई सम्बोधन गर्दै अध्यक्ष प्याकुरेलले समाजको विकासमा लागेको गैससहरू पारदर्शिताका मामिलामा सचेत हुनुपर्ने बताएका हुन् ।

गैरसरकारी संस्था महासंघले अहिले कानुनको मस्यौदा तयार गरी त्यसमा छलफल गर्दै निर्वाचित सांसदहरूलाई दिनुपर्ने उनले बताए । गैरसरकारी संस्था महासंघका अध्यक्ष गोपाल लम्सालले गैससहरूको योगदानको विषयमा जनताकाबीचमा राम्रो धारणा नभएको बताउँदै बदलिदो परिस्थिति एवम् समय अनुसार आफुलाई परिमार्जन गर्दै जानुपर्ने बताए ।

राजनीतिक नेतृत्व, कर्मचारी एवं मिडियाले गैससलाई हेर्ने दृष्टिकोण परिवर्तन गर्नुपर्ने आवश्यकता औल्याउँदै उनले सुशासन र पारदर्शितामा जोड दिएका छन् ।

राजनीतिक दलका नेता एवं आफन्तहरू सहभागि नभएका कुनै एनजिओ नभएको बताउँदै त्यस्ता एनजिओहरूले आफ्नो काम प्रभावकारी तथा पारदर्शी नबनाएका कारण पनि समस्या उत्पन्न भएको बताए ।

गोगो फाउण्डेशनका केदार खड्काले गैरसरकारी संस्थाले सुशासन एवं पारदर्शितामा कुनै किसिमको सम्झौता नगरी समाजको बिकासमा लाग्नुपर्ने बताए । समाजको बिकासमा महत्वपुर्ण योगदान गरेका गैरसरकारी संस्थाले बदलिदो समयमा आफुलाई समेत परिमार्जन गरेर अगाडि बढ्नुपर्ने उनको धारणा थियो ।

कार्यक्रममा सहभागी बिभिन्न जिल्लाका मानवअधिकारकर्मी एवं गैरसरकारी संस्थाका अभियन्ताहरूले जिल्लाका विभिन्न समस्या एवं प्रगतिका विषयमा छलफल गरेका थिए ।

सुभाष साह