गृहकार्य नगरेको भन्दै विद्यार्थीलाई कुटपिट गरेको आरोप

  ०७६ असोज ४ गते

सिद्धिचरण नगरपालिका–२ स्थित हिमालय माध्यमिक विद्यालयको कक्षा ७ मा अध्ययनरत विद्यार्थी विनिता कार्कीलाई गृहकार्य नगरेको भन्दै शिक्षक चम्मु फुयलले असोज २ गते कुटपिट गरेका कारण नातिनी बिरामी परेको उनका हजुरबुबा दलबहादुर कार्कीले बताए ।

कुटपिटकै कारण आफ्नी नातिनी विनिता कार्की बिरामी परी सामुदायिक अस्पताल ओखलढुङ्गामा उपचार भइरहेको कार्कीले बताए ।

विद्यार्थीलाई कुटपिट गरेको विषयमा आरोपित शिक्षक चम्मु फुयलले गृहकार्य नगरेको विषयमा सम्झाउन हातमा एक सिर्किना (सानो लौरोले) हिर्काएको बताए ।

उनले भने–‘उनीसहित अन्य विद्यार्थीहरूलाई पनि मैले त्यसरी सम्झाएको थिएँ । उनी दिनभर विद्यालयमै पढेर घर गएकी हुन् ।’

घटनाबारे विद्यालयका प्रधानाध्यपक हरि भट्टराईले आफूकहाँ कुनै गुनासो नआएको बताए । बाहिर सुनेपछि अस्पतालमा पुगेर विद्यार्थीको अवस्थाबारे जानकारी लिएको बताउँदै उनले बालिका यस अघिदेखि नै बिरामी रहेको बताए । उनले भने–‘उनी बिरामी नै थिइन् । शिक्षकको व्यवहारले मानसिक रूपमा असर चाँहि गरेको होला ।’

सिद्धिचरण नगरपालिका–२ वडा अध्यक्ष कृष्णबहादुर कार्कीले घटनाबारे आफूले अध्ययन गरेपछि मात्रै थप बताउने जानकारी दिए । उनले विस्तृत बुझेर जानकारी गराउने बताए ।


शिवप्रसाद ढुङ्गाना