गाविस सचिव सदरमुकाम बस्दा सेवाग्राहीलाई दोहोरो सास्ती

  ०७३ कात्तिक २१ गते

गाविस सचिवहरू गाउँमा नबस्दा रामेछापको प्रिती गाविसमा रहेको इलाका प्रशान कार्यालयबाट नेपाली नागरिकताको प्रमाणपत्रलगायतको सेवा लिने सेवाग्राहीले दोहोरो सास्ती व्यहोर्नुपरेको छ ।

इलाका प्रशासन कार्यालयले नेपाली नागरिकताको प्रमाणपत्र वितरण गर्ने भए पनि त्यसको लागि गाविसको सिफारिस लिन सदरमुकाम पुग्नुपर्ने स्थानीयले गुनासो गरेका छन् ।

गाविस सचिवहरू गाउँमा नबस्दा सर्वसाधारणलाई सेवा प्रवाहमा समस्या भएको इलाका प्रशासन कार्यालय प्रितीका प्रमुख मकरध्वज खड्काले जानकारी दिए । 'गाविसको सिफारिस नभइ नेपाली नागरिकताको प्रमाणपत्र दिन सकिँदैन ।'

'तर, गाविस सचिव सदरमुकाममा हुन्छन् । गाउँका सेवाग्राही सिफारिस बनाउन सदरमुकाम जाने र नागरिकता लिन गाउँ आउनु पर्छ । स्थानीयलयाई गाउँघरमा नै सेवा दिन स्थापना गरेको कार्यालयले उल्टो दुःख दिए जस्तो पो भएको छ ।'-खड्काले भने ।

रामेछापको उत्तरी भेगका गुम्देल, चुचुरे, बाम्ति, कुभकास्थली, गुप्तेश्वर, भुजी, प्रिती, ठोसे, रस्नालुलगायतका गाविसका नागरिकहरूलाई पायक पर्ने गरी प्रितीको लाप्चानेमा इलाका प्रशासन कार्यालय स्थापना गरिएको थियो । ती गाउँका नागरिकलाई सदरमुकाम मन्थली आउन मात्रै दुई दिन लाग्छ ।

गाविस सचिवहरूलाई गाउँमा नै बसेर सेवा दिन जिल्ला विकास समिति, जिल्ला प्रशासन कार्यालय, स्थानीय विकास मन्त्रालय र सरकारलेसमेत पटकपटक निर्देशन दिइसकेको छ । तर, गाविस सचिवहरू अहिले पनि सदरमुकाममा नै बस्दै आएका छन् ।


नवराज पथिक