गाउँपालिकाद्वारा २० वटा विधेयक पारित

  ०७५ जेठ ३ गते

दार्चुलाको उत्तरी क्षेत्रमा अवस्थित व्यास गाउँपालिकाले २० वटा विधेयक पारित गरेको छ । स्थानीय सरकार गठन भएको एक वर्षको अवधिमा स्थानीय सरकार सञ्चालनको लागि भन्दै २० वटा विधेयक पारित गरेको गाउँपालिकाले जनाएको छ ।

जेठ १ गते बसेको गाउँपालिकाको दोस्रो गाउँसभाले न्यायिक समिति कार्यविधि ऐन, उपभोक्ता समिति गठन परिचालन व्यवस्थापन कार्यविधि, योजना सञ्चालन कार्यविधि, घ वर्गका निर्माण व्यवसायी इजाजत पत्र ऐन, प्रशासकीय कार्यविधि नियमित गर्ने ऐन, कडा रोगीहरूको आर्थिक सहायता वितरण निर्देशिका, छाप्रो मुक्त कार्यक्रम कार्यान्वयन निर्देशिका, मर्मत सम्भार कोष सञ्चालन निर्देशिका, जागरूक अभिभावक दक्ष शिक्षक कार्यक्रम कार्यान्वयन निर्देशिका, सहकारी ऐन, राजपत्र प्रकाशनसम्बन्धी कार्यविधि र हाम्रो वन हाम्रो धन हाम्रो जीवन कार्यविधि नियमावली गरी जम्मा १३ वटा विधेयक पारित गरिएको गाउँपालिकाका प्रवक्ता धिरनसिंह बुढाथोकीले जानकारी गराए ।

गाउँपालिकाको ०७४ भदौ २७ र २८ गते बसेको पहिलो गाउँसभाले गाउँपालिकाको निर्णय आदेश र अधिकार प्रमाणीकरण कार्यविधि नियमावली, गाउँकार्यपालिका कार्यसम्पादन नियमावली, गाउँपालिकाको आर्थिक ऐन, गाउँपालिका पदाधिकारीहरूको आचारसंहिता र कार्यपालिका बैठक सञ्चालनसम्बन्धी कार्यविधि गरी सात वटा विधेयक पारित गरिसकेको समेत गाउँपालिकाका प्रवक्ता बुढाथोकीले जानकारी दिए ।


नरेन्द्रसिह कार्की