समाचारहरू

मेल्लेख गाउँपालिका–७ नन्देगडाको रिठागाउँमा पहिरोको जोखिममा रहेका १६ परिवारलाई सोही वडाको नन्देगडा बजार नजिक जग्गा खरिद गरेर मेल्लेख गाउँपालिकाले भूकम्प प्रतिरोधी घर निर्माणको थालनी गरेको छ ।

शौचालय, पानी, धारासहितको अत्याधुनिक घर निर्माणको थालनी भएको  मल्लेख गाउँपालिका – ७ का वडा अध्यक्ष नरबहादुर बुढाले बताउनु भयो ।

उहाँले भन्नु भयो – ‘गाउँपालिकाकाले १ लाख ५० हजार रुपियाँ प्रतिरोपनीका दरले स्थानीयको जग्गा खरिद गरेर  दुई कोठाको पक्की घर बनाउन शुरू गरेको छ । एउटा घरमा ८ लाख रुपियाँ खर्च हुने अनुमान गरिएको छ ।’

हाल १२ परिवारका लागि जग्गा खरिद गरेर घर निर्माण गर्ने काम शुरु भएको छ भने यसै आर्थिक वर्षमा चार परिवारको लागि जग्गा खरिद गरेर घर निर्माण सम्पन्न गरिने गाउँपालिकाले जनाएको छ ।

संघीय सरकारको समपुरक विशेष अनुदान, प्रदेश सरकारको बजेट र गाउँपालिकाको रकमबाट जोखिममा रहेको वस्तिलाई सारिने भएको हो ।

पहिरोको जोखिममा रहेको वस्तिलाई सुरक्षित रूपमा बसाल्न एकीकृत वस्तिको योजनासहित घर निर्माणको थालनी गरिएको गाउँपालिका अध्यक्ष लोकबहादुर बोहराले बताउनु भयो ।

गएको भदौ महिनामा नन्देगडामा रहेको रिठागाउँमाथिबाट सुख्खा पहिरो जाँदा गाउँ नै जोखिममा परेपछि खानी तथा भूगर्भ विभागको टोलीले स्थालगत अध्ययन गरी वस्ति नै सार्नु पर्ने सुझावसहितको प्रतिवेदन दिएको थियो ।

शिवराज ढुंगाना