गाउँपालिकाको कामकाज ठप्प हुँदा सेवाग्राही समस्यामा

  ०७७ असोज ६ गते

व्यास गाउँपालिकाको कार्यालय, सुनसेरामा भदौ २६ गतेदेखि गरिएको तालाबन्दीका कारण गाउँपालिकाबाट प्रवाह गरिदै  आएका सेवाहरु ठप्प भएकाले आफूहरुले समस्या झेल्नु परेको स्थानीय सेवाग्राहीहरुले गुनासो गरेका छन् ।

गाउँसभाबाट पारित भएका पाँच ओटा योजनाहरु कार्यपालिकाको बैठकबाट रकमान्तर गरी ती योजनाहरु रद्द गरिएको भन्दै नेपाल कम्युनिष्ट पार्टी (नेकपा) निकट वडाध्यक्ष र कार्यकर्ताहरुले भदौ २६ गतेदेखि गाउँपालिका कार्यालयमा तालाबन्दी गर्दा सेवाग्राहीहरु समस्यामा परेका हुन् ।

भदौ २६ गतेदेखि गाउँपालिकाको कार्यालयमा लगाइएको तालाबन्दीका कारण आफूले नागरिकताको सिफारिस पाउन नसकेको व्यास गाउँपालिका–४ का स्थानीय नरेन्द्र भट्टले दुखेसो पोख्नु भयो ।

उहाँले भन्नु भयो– ‘गाउँपालिकाको १४ ओटै कक्षमा तालाबन्दी गरिएको छ । प्रधानमन्त्री रोजगार कार्यक्रम, कृषि क्षेत्रका कार्यक्रमका फारामहरु भर्न सकिएको छैन् । समयमै फाराम भर्न नपाइए रोजगारी गुम्ने चिन्ता छ । हामी काम गरेर खाने मजदुर हौँ । फारामको म्याद सकिन लागेको छ ।’

व्यास गाउँपालिका–४ का स्थानीय जगन्नाथ भट्टले कोरोनाका कारण स्थानीयहरुले रोजगारी गुमाइरहेको अवस्थामा गाउँपालिकामा लगाइएको तालाबन्दीका कारण झन समस्या उत्पन्न भएको गुनासो गर्नु भयो ।

उहाँले भन्नु भयो – ‘तालाबन्दीका कारण गाउँपालिकाबाट पाउनु पर्ने सेवा सुविधा पाउन सकिएको छैन् । गाउँपालिकासँग यो वर्षको योजना सम्झौता हुँन नसक्दा स्थानीयले काम गुमाउनु पर्ने अवस्था आएको छ । समयमै योजना सम्झौता भएर काम अघि बढ्यो भने हातमुख जोर्न हुन्थ्यो । तर, तालाबन्दी कहिले खुल्छ अत्तोपत्तो छैन् ।’

गाउँपालिकामा भदौ २६ गतेदेखि तालाबन्दी गरिएपछि गाउँपालिकाले गर्नु पर्ने दैनिक कामकाज प्रभावित भएको र कर्मचारीहरुको दैनिक हाजिरी, दर्ता चलानी, उपभोक्ता समिति गठन तथा सम्झौताका कामहरु ठप्प भएको व्याँस गाउँपालिकाका प्रमुख प्रशासकीय अधिकृत शेखरचन्द्र ओझाले बताउनु भयो ।

व्याँस गाउँपालिका वडा नम्बर ३ का वडाध्यक्ष उपेन्द्रसिह धामीले वडा कार्यालयका अधिकार कटौती गरेर गाउँपालिकाले एकलौटी निर्णय गरेपछि तालाबन्दी गर्नु परेको बताउनु भयो ।

उहाँले भन्नु भयो– ‘योजनाको रकमान्तर गर्ने निर्णय फिर्ता लिनु पर्छ । वडा समितिको अधिकार कुण्ठित हुँने गरी बनाइएको उपभोक्ता गठन सम्बन्धी कार्यविधी २०७५ खारेज गरिनु पर्छ ।  कोभिडको बेला भएको खर्च पारदर्शी रुपमा सार्वजनिक गर्नु पर्छ । गाउँपालिकामा कार्यकर्ता भर्ना गर्ने कार्य रोकिनु पर्छ । यी माग पुरा नभएसम्म तालाबन्दी यथावत रहन्छ ।’

वडा नम्बर ३ कार्यालयले छनौट गरेका स्वयंसेविका पारिश्रमिक, तुसरपानी घोरेटो बाटो निर्माण, कृर्षि सहजकर्ता र टोल सुधार कृषक महिला योजना लगायतका कार्यक्रमहरुको व्याँस गाउँकार्यपालिकाको बैठकले शिर्षक परिवर्तन गरी रकमान्तर गर्ने निर्णय गरेको थियो ।

गाउँपालिका अध्यक्ष दिलिपसिंह बुढाथोकीले कार्यपालिका बैठकमा सहमतिमै योजनाको रकम रकमान्तर गर्ने निर्णय भएको बताउनु भयो ।

उहाँले भन्नु भयो – ‘गाउँपालिकामा लगाइएको तालाबन्दीका कारण स्थानीय सेवाग्राहीलाई समस्या भएको छ । ताला खुलाउने विषयमा छलफल भइरहको छ । छिट्टै समस्याको समाधान हुन्छ ।’


नरेन्द्रसिंह कार्की