गाउँका सडकमा तारबार गरियाे, एक स्थानीय तहबाट अर्काेमा जान रोक

  ०७६ चैत २३ गते 

कोरोना (कोभिड १९) को जोखिम बढदै गएपछि बागलुङका स्थानीय तहमा प्रवेश गर्ने नाकाहरुमा सुरक्षा व्यवस्था कडा पारिएको छ । शनिबार नेपालमा थप तीन जना संक्रमित भेटिए संगै जिल्लाका स्थानीय तह प्रवेश गर्ने नाकामा चेक जाँचलाई कडा पारिएको हो ।

 

जिल्लामा २ जनामा कोरोना संक्रमण पुष्टि हुँदा पनि नागरिक सचेत नभएको भन्दै जिल्ला प्रशासन कार्यालय, जिल्ला प्रहरी कार्यालय बागलुङ र जिल्लाका सबै स्थानिय तहका प्रमुखको सक्रियतामा सुरक्षा व्यवस्था कडा गरिएको जिल्ला प्रशासन कार्यालय बागलुङका प्रमुख गौलोचन शैजुले जानकारी दिनुभयो ।

‘यस अघि सदरमुकाममा लकडाउनलाई कडा गरिए पनि गाउँ गाउँमा मानिसहरु चहलपहल कम भएको थिएन’, शैजुले भन्नुभयो ‘कोरोनाको त्रास बढदा पनि नागरिकहरु सचेत नदेखिएपछि गाउँ गाउँमा प्रहरी परिचालन गरिएको छ ।’

बागलुङ नगरपालिकाका मेयर जनकराज पौडेलले एक स्थानीय तहदेखि अर्काे स्थानीय तहमा संक्रमण नफैलियोस भनेर सरकारले गरेको निर्णय सबैले पालना गनुपर्ने भन्दै बागलुङ नगरपालिकामा लकडाउनलाई कडाइ गरिएको बताउनुभयो ।

‘जिल्ला प्रवेश गर्ने नाकामा पहिले देखिनै कडाइ थियो, पौडेलले भन्नुभयो अब घरबाट बाहिर ननिस्कनुस भनेर प्रहरी परिचालन गरिएको छ ।’

बागलुङको ढोरपाटन नगरपलिकाका मेयर देवकुमार नेपालीले ढोरपाटन नगरपालिकामा अन्य पालिकाबाट कसैलाई पनि प्रवेश गर्न नदिने बताउनुभएको छ ।

‘देश लकडाउन गरे पनि जनताले पालना गरेको देखिएन’, नेपालीले भन्नुभयो ‘अब हामीहरुले हाम्रो नगर लकडाउन गर्दैछौ, आजैबाट ढोरपाटनमा अन्य पालिकाका व्यक्तिलाई प्रवेश गर्न रोक लगाइएको छ ।’

ढोरपाटन प्रवेश गर्ने नाकामा तारबार गरिदैछ, नेपालीले भन्नुभयो ‘मेरो नगरमा खाद्यन्न, स्वास्थ्य र सबै आवश्यकता पुरा गर्नको लागि म तयार छु, त्यसैले अब नगरमा कसैलाई प्रवेश दिइदैन ।’

 

जैमिनी नगरपालिकाका प्रमुख इन्द्रराज पौडेलले गुल्मीबाट जैमिनी प्रवेश गर्ने नाका छिस्तीमा हेल्थ डेक्स सहित प्रहरीले सुरक्षा दिइरहेको बताउनुभयो ।

बिरामी, दुध र खाद्यन्न बोकेका सवारी साधन बाहेक अन्यलाई नगर प्रवेशमा रोक लगाइएको उहाँले बताउनुभयो । अनावश्यक चलह पलह हुने र भिडभाड हुने झोलुङगे पुलमा बार लगाइएको उहाँले बताउनुभयो ।

 

गलकोट नगरपालिकाका नगर प्रमुख भरत शर्माले गलकोट नगरपालिका र काठेखोला गाउँपालिकाको प्रवेशद्वार घोडाबाधेमा स्वमसेवक परिचालन गरेको बताउनुभयो ।

सेनासंग सहकार्य गरेर पैदल यात्रा गर्नेहरुको पनि अनिवार्य रुपमा परिचय खुल्ने कागजातले प्रवेश गर्ने प्रबन्ध मिलाएको उहाँले बताउनुभयो । खर्वाङ र गुल्मीको मुसिकोटबाट प्रवेश गर्ने नाकामा प्रहरी राखेर पूर्ण रुपमा आवत जावत बन्द गरिएको उहाँले बताउनुभयो ।

बागलुङको ताराखोला गाउँपालिकाका तीन वटा नाकामा सुरक्षा व्यवस्था कडा पारिएको गाउँपालिका प्रमुख प्रकाश घर्तीले बताउनुभयो ।

गलकोट हुदै प्रवेश गर्ने नाकाको लागि गाउँपालिकाको ३ नम्बर वडा, काठेखोला गाउँपालिकाबाट अमरभुमी, माझखर्क प्रवेश गर्ने नाकाको लागि धनसिंह चोकमा हेल्थ डेक्ससंगै सुरक्षाकर्मी परिचालन गरिएको घर्तीले बताउनुभयो ।

म्याग्दी हुँदै ताराखोला प्रवेश गर्ने नाकामा पनि सुरक्षाकर्मी संगै जनप्रतिनिधी परिचालन गरिएको छ ।

तमानखोला गाउँपालिका र म्याग्दीको नाका सोले डाँडामा सशस्त्र प्रहरीले कडाइका साथ चेकजाँच गरेर आवत जावतमा रोक लगाएको गाउँपालिका प्रमुख जोकलाल बुढाले बताउनुभयो । उहाँले ढोरपाटन नगरपालिकाबाट प्रवेश गर्ने स्थानमा पनि बोङगादोभान प्रहरीले निगरानी बढाएको बताउनुभयो ।

काठेखोला गाउँपालिका प्रमुख अमर थापाले गाउँ गाउँका टोलसुधार समितिलाई परिचालन गरि गाउँपालिका प्रवेश गर्ने नाकाहरुमा कडाइ गरिएको उहाँले बताउनुभयो ।

‘मुख्य नाकामा प्रहरीसंग सहकार्य गरेर अतिआवश्यक बाहेकका आवत जावतमा रोक लगाएका छौ’, थापाले भन्नुभयो ‘वडा वडामा पनि टोल सुधार समिति र युवा क्लबका सदस्यलाई परिचालन गरेर प्रवेश रोक लगाएका छौ ।’

बडिगाड गाउँपालिकाका प्रमुख मेहरसिंह पाइजाले भिमगिठे, ग्वालीचौर र खर्वाङको प्रहरीसंग सहकार्य गरेर बुटवल, गुल्मी र गलकोटका विभिन्न नाकामा प्रवेश रोक लगाईएको बताउनुभयो ।

‘हामीहरुको मात्र प्रयासले हुँदो रहेनछ, गाउँमा जीप भरेर मान्छे आउँछन्, सोध्यो पास देखाउछन्’, पाइजाले भन्नुभयो ‘सिडियो एसपीले हामीले पास दिएका होइनौ भन्नुहुन्छ गाउँमा मनपरि देखिएको छ ।’

बागलुङको बरेङ गाउँपालिका प्रमुख कृष्ण पौडेलले गाउँपालिकामा गुल्मी र बागलुङका विभिन्न पाचँ ओटा नाकामा तारबार गरिएको बताउनुभयो ।

अति आवश्यक परे खोल्न मिल्ने गरि गुल्मीको शान्तिपुर प्रवेश गर्ने घट्टे नाका, गुल्मीको कालीगण्डकी प्रवेश गर्ने सातदोबाटो नाका, नाम्दुक नाका, गलकोट नगरपालिका प्रवेश गर्ने देउराली र गुल्मीको शान्तिपुर जोडने पहेलपाटा नाकामा तारबार गरिएको बताउनुभयो ।

दैनिक ज्याला दिने गरि तीन जनालाई प्रहरीसंगै नाकामा खटाएका छौ’ पौडेलले भन्नुभयो ‘गाउँपालिकामा जो कोहिलाई पनि प्रवेश गर्न रोक लगाइएको छ ।’ उहाँले गाउँपालिकामा कसैको निधन भएमा तीन दिनमा उम्कने गरि व्यवस्थापन गरिएको बताउनुभयो ।

निसिखोला गाउँपालिकाका प्रमुख तारानाथ पौडेलले सरकारले हिजोमात्र स्थानीय तह स्तरिय लकडाउनको व्यवस्था गरेको भएपनि आफू अहिलेसम्म वडा अध्यक्षहरुसंग भेटघाट हुन नसकेको भन्दै निर्णय गर्न नसकेको बताउनुभयो । सबै टाढा—टाढा हुनुहुन्छ, वडा अध्यक्षसंग भेट हुन पाएको छैन, भेटभाट पछि के गर्ने भनेर सल्लाह गर्नेछौं ।

त्यसैगरी बागलुङका प्रहरी एसपी नवराज भट्टले आइतबारबाट बागलुङमा लकडाउनलाई थप कडाइ गरिएको बताउनुभयो । जिल्लामा दुध, तरकारी र फलफुल पनि उपभोक्तालाई फोनमार्फत घरमै मगाउन र वितरकलाई घर–घरमै पुर्याइदिन आग्रह गरेको बताउनुभयो ।

मलामी जाँदा पनि थोरै भन्दा थोरै मानिसको सहभागीता गराउन सबैलाई आग्रह गरिएको छ, भट्टले भन्नुभयो लकडाउन उल्लङघन गर्नेलाई कारवाही गर्छौ ।

जिल्ला प्रहरी कार्यालय बागलुङले आइतबार बिहान लकडाउन उल्लङघन गर्दै अनावश्यक रुपमा सडकमा हिँडेका ४० जनालाई गिरफ्तार गरी दिनभर कार्यालयमा राखी सम्झाएर साँझ छोडेको छ । साँझको समयमा लकडाउन उल्लङघन गर्ने थप ५ जनालाई गिरफ्तार गरिएको छ ।


सिर्जना पन्त