गम्भीर प्रकृतिका घटनामा माफी दिन मिल्दैनः आयोग

  ०७३ साउन ३१ गते

सत्यनिरूपण तथा मेलमिलाप आयोगले गम्भीर प्रकृतिका मानव अधिकार उल्लङ्घनका घटनामा माफी दिन नमिल्ने भन्दै प्रधानमन्त्री पुष्पकमल दाहालको ध्यानाकर्षण गराएको छ ।

आयोगका पदाधिकारीले साउन ३१ गते प्रधानमन्त्री दाहाललाई भेटेर हत्या, अपहरण, बलात्कार जस्ता गम्भीर प्रकृतिका मानव अधिकार उल्लङ्घनका घटनामा माफी दिन नमिल्ने बताएको आयोगका अध्यक्ष सुर्यकिरण गुरूङले सञ्चारकर्मीलाई जानकारी दिएका हुन् ।

अध्यक्ष गुरूङका अनुसार प्रधानमन्त्री दाहालले द्वन्द्वकालका सबै घटनामा आममाफी दिनुपर्ने पक्षमा आफू पनि नरहेको बताएका छन् । भेटमा आयोग पदाधिकारीले कानुनले व्यवस्था गरे बमोजिम उजुरीहरूको अनुसन्धानका लागि विज्ञ र विशेषज्ञहरूलाई करारमा नियुक्त गर्न र सोही बमोजिम बजेटको व्यवस्था गर्नसमेत प्रधानमन्त्रीको ध्यानाकर्षण गराएका थिए ।

आयोग अध्यक्ष गुरूङले बजेट अभावको कारण विज्ञ र विशेषज्ञ नियुक्त गर्न नसक्दा उजुरीहरूको छानबिन प्रभावित भएको बताएका छन् । आयोगमा ५३ हजारभन्दा बढी द्वन्द्वकालीन घटनाका उजुरी परेको आयोगले जनाएको छ ।


विवेक ढुङ्गाना