गण्डकी प्रदेशका विभिन्न जिल्लामा कोरोना रोकथामको  लागि कोषको स्थापना

  ०७६ चैत २४ गते

विश्वव्यापी महामारीको रुपमा फैलिदै गएको कोरोना भाइरस (कोभिड) १९ को जोखिमलाई मध्यनजर गर्दै गण्डकीप्रदेशका विभिन्न जिल्लाका स्थानीय तहले कोषको स्थापना गरेका छन् ।

बागलुङ जिल्ला प्रतिनिधि सिर्जना पन्तका अनुसार बागलुङका १० वटै स्थानीय तहले ‘कोरोना भाइरस रोकथाम तथा व्यवस्थापन कोष’ स्थापना गरेका छन् ।

बागलुङ जिल्ला कोरोना संक्रमण उच्च जोखिममा रहेकाले यसको रोकथाम र नियन्त्रणसंगै कोरोनाको प्रभावले जिल्ला बासीमा परेको प्रत्यक्ष प्रभावलाई कम गर्नका लागि कोष स्थापना गरिएको हो ।

जिल्लाको बागलुङ नगरपालिकाले ५० लाख रुपियाँको ‘कोरोना विपत राहत उद्धार कोष’ स्थापना गरेको छ । नगरले स्थापना गरेको कोषमा जिल्लाका उद्योगी व्यवसायीले १ लाख २० हजार र आदर्श सञ्चार सहकारी संस्थाले ५० हजार रुपियाँ सहयोग गरेका छन् ।

कोषको रकम कोरोना संक्रमण, रोकथाम र कोरोनाको कारणले आइपर्ने जस्तोसुकै विपत व्यवस्थापनमा पनि खर्च गरिने बागलुङ नगरपालिकाका नगर प्रमुख जनकारज पौडेलले जानकारी दिनुभयो ।

नगरका स्वास्थ्य संस्थाको लागि आवश्यक स्वास्थ्य सामाग्री, औषधि, नगरका मजदुर, श्रमिकका लागि खाद्यन्न व्यवस्थापन लगाएत कोरोना संक्रमितलाई उद्दार र राहत यसै कोषबाट गरिने उहाँले जानकारी दिनुभयो ।

त्यस्तै ढोरपाटन नगरपालिकाले ४० लाख रुपियाँको कोरोना भाइरस रोकथाम तथा व्यवस्थापन कोष स्थापना गरेको छ । कोषबाट नगरभित्रका विपन्नलाई खाद्यन्न, स्वास्थ्य संस्थालाई स्वास्थ्य सामाग्री र औषधि उपलब्ध गराइने नगरप्रमुख देव कुमार नेपालीले बताउनुभएको छ । उहाँले आवश्यक परे कोषमा रकम थप गरिने बताउनुभयो ।

गलकोट नगरपालिकाले नगरपालिकाको विपत व्यवस्थापन कोषबाट २० लाख रुपियाँ झिकेर ‘कोरोना रोकथाम तथा व्यवस्थापन कोष’ स्थापना गरेको छ ।

त्यस्तै जिल्लाको जैमिनी नगरपालिकाले ३० लाख रुपियाँको ‘कोरोना रोकथाम तथा व्यवस्थापन कोष’ स्थापना गरेको छ । कोषको रकम नगर क्षेत्रभित्र ज्याला मजदुरी गर्नेहरुलाई खाद्यन्न, स्वास्थ्य संस्थालाई औषधी, सुरक्षा सामाग्री तथा आर्थिक सहयोगको लागि खर्च हुने नगर प्रमुख इन्द्रराज पौडेलले जानकारी दिनुभयो ।

जिल्लाको काठेखोला गाउँपालिकाले १० लाखको ‘कोरोना भाइरस रोकथाम तथा व्यवस्थापन कोष’ स्थापना गरेको छ । गाउँपालिकाले स्थापना गरेको कोषमा आदर्श सञ्चार सहकारी संस्थाले ५० हजार र अन्य ५ जना व्यक्तिले व्यक्तिगत रुपमा ५० हजारका दरले ३ लाख जम्मा गर्दा १३ लाख रुपियाँ पुगेको छ ।

तमानखोला गाउँपालिकाले १२ लाख रुपियाँको कोष स्थापना गरेको छ । ताराखोला गाउँपालिकाले ५ लाख रुपियाँ, निसिखोला गाउँपालिकाले १० लाख, बडिगाड गाउँपालिकाले १० लाख र बरेङ गाउँपालिकाले ३० लाख रुपियाँको ‘कोरोना रोकथाम तथा व्यवस्थापन कोष’ स्थापना गरेका छन् ।

पर्वत जिल्ला प्रतिनिधि सन्तोष थापाका अनुसार स्थानीयतहहरुले कोरोनाबाट प्रभावित बनेका व्यक्ति तथा परिवारहरुका लागि राहत प्रदान गर्न आ—आफ्नो तहमा कोष स्थापना गर्ने र रकम तथा खाद्यन्न संकलन गर्ने कार्य सुरु गरेका छन् । जसमध्ये पर्वतको कुश्मा नगरपालिकाले ५० लाख, फलेवास नगरपालिकाले ३५ लाख र जलजला गाउँपालिकाले ३० लाखको विपद् कोष स्थापना गरी राहत समेत सोहि कोषबाट आवश्यकता अनुसार प्रयोग गर्ने जनाएको छ ।

महाशिला गाउँपालिकाले ८ लाख, मोदी गाउँपालिकाले ८ लाख, विहादी गाउँपालिकाले १५ लाख र पैञ्यु गाउँपालिकाले २५ लाख बराबरको कोरोना संक्रमण रोकथाम कार्यका लागि कोष स्थापना गरेका छन् ।

फलेवास नगरपालिकाका शिक्षक र कर्मचारीहरुले ३ दिनको तलब कोषमा राख्ने गरी निर्णय भएको छ जसबाट १२ लाख रुपियाँ कोषमा रकम थप भएको फलेवास नगरपालिकाका प्रमुख पदमपाणी शर्माले जानकारी दिनुभयो ।

तनहुँ जिल्ला प्रतिनिधि प्रकाशचन्द्र भट्टराईका अनुसार कोरोनाबाट सिर्जित समस्याबाट पीडित भएका नागरिकलाई राहत दिन जिल्लाका सबै स्थानीय तहले विपद व्यवस्थापन कोष स्थापना गरेका छन् । व्यास नगरपालिकाले सबैभन्दा धेरै १ करोडको कोष स्थापना गरेको छ ।

शुक्लागण्डकी नगरपालिकाले ६० लाख, भानु नगरपालिकाले २० लाख र भिमाद नगरपालिकाले २६ लाख रुपियाँको कोष स्थापना गरेका छन् भने अन्य गाउँपालिकाले पनि विपद व्यवस्थापन कोष स्थापना गरेका छन् ।

 लमजुङ जिल्ला प्रतिनिधि दलबहादुर मजाकोटीका अनुसार लमजुङ जिल्लामा पालिकाहरुले मजदुर र विपन्न दलित परिवारको लागि भनेर अवाश्यकता अनुसार राहत तथा विपद कोष स्थापना गरेका छन । जसमा बेसीशहर नगरपालिकाले १ करोड विपद तथा राहत कोष स्थपान गरेको छ ।

मध्यनेपाल नगरपालिकाले १ करोड २० लाख, मर्स्याङदी गाउँपालिकाले ५० लाख, सुन्दरबजार नगरपालिकाले ३७ लाख, क्वलासोथर गाउँपालिकाले २० लाख, राइनास नगरपालिकाले १८ लाख, दोर्दी गाउँपालिकाले १० लाख र दुधपोखरी गाउँपालिकाले १० लाख रुपियाँ राहतको लागि विनियोजन गरेको छ ।

कास्की जिल्ला प्रतिनिधि सुशन घिमिरेका अनुसार गण्डकी प्रदेश सरकारले खोलेको कोरोना भाइरस रोकथाम आपतकालिन कोषमा सोमबारसम्म २५ वटा संस्थाबाट रकम जम्मा भएको मुख्य मन्त्रीका प्रेस संयोजक विक्रम न्यौपानेले जानकारी दिनुभयो ।

उहाँका अनुसार कोषमा हालसम्म करिब ९० लाख रुपियाँ जम्मा भएको छ ।


गण्डकी प्रदेश कार्यालय