खुल्ला आकाश मुनी पढ्न बाध्य छन् पुरानो विद्यालयका बालबालिका

  ०७३ मङ्सिर ८ गते

बथनाहा गाविस-६ स्थित श्री हनुमान विश्वनाथ जनता सरकारी प्राथमिक विद्यालयमा अध्ययनरत बालबालिकाहरू खुल्ला आकाश मुनि पढ्न बाध्य छन् । वि.सं. २०१० सालमा स्थापित प्राथमिक विद्यालयको भवन निर्माण तथा पुनर्निर्माण हुन नसक्दा वर्षा र जाडोको शीतलहरमा पठनपाठन समेत ठप्प हुने गरेको छ । २ सय २२ विद्यार्थी रहेको सो प्राथमिक विद्यालयमा खुल्ला आशाममुनी बसेर पढ्न बिवश छन् । तर, उनीहरूमाथि जिल्ला शिक्षा कार्यालयको आँखा अझै पर्न सकेको छैन ।

खुल्ला दिशा मुक्त अभियान सञ्चालन भइरहेको बेला यस विद्यालयमा चर्पी पुरानो तथ जीर्ण रहेको र खाने पानीको लागि ह्याण्ड पम्प समेत बिग्रिएको छ । बथनाहा जिल्लाकै विकट र सीमा क्षेत्रमा रहेको यस प्राथमिक विद्यालयको भौतिक अवस्था सुधार गर्न कसैको चासो देखिँदैन । सो विद्यालयमा मुसहर र मुस्लिम समुदायका बालबालिका पढ्छन् ।

प्रधानाध्यापक तीर्थनाथ झाले विद्यालयमा चार जना शिक्षकको दरबन्दी रहेकोमा दुई जना कार्यरत रहेको र दुई जना शिक्षक काजमा अन्यत्रै खटिएको बताए । विद्यालयमा १ सय ५० जना बालबालिका परीक्षामा सहभागी रहेको प्रधानाध्यापक झाले जनाए । प्रधानाध्यापक झाले भने-"एक त दलित मुसहर वस्तीमा बालवालिकालाई विद्यालय पठाउन रहर गर्दैनन् तर केहिले विद्यालय पठाउँदा समेत भौतिक पूर्वाधार विनाको उनीहरूलाई कष्ट नै हुने गर्छ ।"

विद्यालयको दुई ओटा ब्लकमा पर्खाल छ भने छाप्रो र ढोका छैन । अर्को एक ब्लकमा छाप्रो छ तर पर्खाल भने छैन । बाल विकासको एउटा कोठामा कार्यालय सञ्चालनमा छ भने अर्को कोठालाई स्टोर रुम बनाइएको छ । कक्षा पाँचमा अध्ययनरत धनोजकुमार राउत भन्छन्-'पानी पर्दा र चिसो धेरै बढ्दा हामीलाई असजिलो हुन्छ तर हामी पढ्न बाध्य छौँ ।'

photo20161123mahottari photo20161123mahottari1 photo20161123mahottari2 photo20161123mahottari3 photo20161123mahottari4 photo20161123mahottari5 photo20161123mahottari6 photo20161123mahottari7 photo20161123mahottari8 photo20161123mahottari9


अजयकुमार साह