खानेपानीको विवादका क्रममा वडा अध्यक्षमाथि कुटपिट

  ०७६ असार २५ गते

नीलकण्ठ नगरपालिका-१२ का वडा अध्यक्ष ४५ वर्षीय बाबुराम लम्सालमाथि असार २४ गते कुटपिट भएको छ ।

नीलकण्ठ नगरपालिकाका प्रमुख भिमप्रसाद ढुङ्गानासहित देउराली बटुवा सडकको अनुगमनको क्रममा गाउँ पुगेका बेला नीलकण्ठ नगरपालिका-१२ कुँडुलेफाँटमा खानेपानीको विषयलाई लिएर विवाद हुँदा नगरपालिका प्रमुख ढुङ्गानाको अगाडि नै लम्सालमाथि कुटपिट गरिएको हो ।

कुटपिट गर्नेमा साङ्कोष माध्यमिक विद्यालयका शिक्षक नीलकण्ठ नगरपालिका-१२ का ५२ वर्षीय युवराज रिजाल, सोही ठाँउ बस्ने पण्डितचौर आधारभुत विद्यालयका शिक्षक ४७ वर्षीय बलराम रिजाल, सोही ठाँउ बस्ने पूर्व शिक्षक ५५ वर्षीय नानीराम रिजाल र २९ वर्षीय दिपक रिजाल रहेका छन् ।

कुँडुले क्षेत्रमा १ सय घरलाई खानेपानी ल्याइएको मुहान आरोपितहरूले आफूहरूको परेको भन्दै दावी गरी पानी नदिने अडान राख्दै आएर एक्कासी लम्सालमाथि आक्रमण गर्दा अनुहार र टउकोमा चोट लागेको छ ।

घाइते लम्साललाई नगरप्रमुख ढुङ्गानासहित अन्य व्यक्तिहरूले उद्दार गरी असार २४ गते जिल्ला अस्पताल धादिङमा उपचार गरिएको नगर प्रमुख ढुङ्गानाले बताए ।

आरोपितहरूविरूद्ध लम्सालले असार २४ गते अभद्र व्यवहार अन्तर्गत जिल्ला प्रहरी कार्यालय धादिङमा उजुरी दिएपनि दुवै पक्ष छलफलकै क्रममा रहेकाले उजुरी दर्ता भइनसकेको जिल्ला प्रहरी कार्यालय धादिङका डिएसपी रुपक खड्काले बताए ।


सीताराम अधिकारी