खानेपानीको पाईप बिछ्याउँदै गरेका अभियान्तामाथि प्रहरीद्वारा कुटपिट

  ०७३ फागुन ७ गते

निर्माणाधीन दैलेखबजार खानेपानी आयोजनाको पाईप बिछ्याउने काममा जुटेका दैलेखबजार खानेपानी तथा सरसफाई उपभोक्ता समितिका ५४ वर्षीय अध्यक्ष बलराम श्रेष्ठ, ४५ वर्षीय कोषाध्यक्ष भरतबहादुर थापा, ३७ वर्षीय मर्मतसम्भारकर्ता टेकबहादुर खत्री र २३ वर्षीय गाडी चालक शङ्कर भट्टराईलाई प्रहरी हवल्दार नन्दबहादुर बुढाको टोलीले फागुन ६ गते कुटपिट गरेको पीडित पक्षले आरोप लगाएको छ । पीडित सबै जना नारायण नपा-१ दैलेखबजारका स्थानीय बासिन्दा हुन् ।

प्रहरी प्रशासनलाई लिखित जानकारी दिई एक महिनादेखि सदरमुकामको मुलबजारभित्र काम गर्दै गरेका पदाधिकारी र कर्मचारीसमेत चार जना माथि परिचय दिँदादिँदै प्रहरीले कुटपिट गरेको पीडितहरूको आरोप छ ।

घटनाका विषयमा प्रतिक्रिया माग्दा जिल्ला प्रहरी कार्यालयका प्रमुख डीएसपी केदार रजौरेले सामान्य विवादमा धकलपकल मात्र भएको प्रतिक्रिया दिए ।

हवल्दार बुढाका साथसाथै सिपाहीहरू महेन्द्र शाही, शिशिर सिंह र एमबी रानाले विना कारण कुटपिट गरेको पीडित पक्षको आरोप छ । आरोपित प्रहरीहरूलाई कारबाही नभएकोप्रति दैलेख दैलेखबजार खानेपानी तथा सरसफाई उपभोक्ता समितिका अध्यक्ष बलराम श्रेष्ठद्वारा फागुन ७ गते जारी विज्ञप्तिमार्फत असन्तुष्टी जनाइएको छ ।

प्रहरीको कुटाइबाट कोषाध्यक्ष भरतबहादुर थापाको देबे्र हातको तीन वटा औंलाको हड्डी भाँचिएको छ । कुटपिटको क्रममा चारै जनालाई गोडा र ढाडमा लाठी तथा बन्दुकको कुण्दाले प्रहार गरेको ठाउँमा निलडाम देखिएको छ ।

घाइतेहरूको स्थानीय मेडिकलमा उपाचार भइरहेको छ । सुरक्षा दिनुपर्ने प्रहरीले जानकारी दिएर पनि पदाधिकारी र कर्मचारी माथि कुटपिट गरिएको घटनाप्रति स्थानीय बासिन्दाले प्रहरी प्रशासनको अशोभनीय कार्य भन्दै असन्तुष्टी व्यक्त गरेका छन् ।


अमर सुनार