खानेपानीको चरम समस्याले स्थानीय मारमा

  ०७६ वैशाख ३१ गते

संविधानको धारा ३५ को स्वास्थ्यसम्बन्धी हक अन्र्तगत प्रत्येक नागरिकलाई स्वच्छ खानेपानी तथा सरसफाई पहुँचको हक हुनेछ भनी स्पष्ट लेखिएको भएपनि जिल्लाका अधिकांश क्षेत्रमा खानेपानीको चरम अभावले स्थानीय मारमा परेका छन् ।

सुख्खायामको सुरूवातसँगै जिल्लाको मेलौली नगरपालिका, शिवनाथ गाउँपालिका र पञ्चेश्वर गाउँपालिकाका अधिकांश ठाउँमा खानेपानीको चरम अभाव सिर्जना भएको छ ।

मेलौली मेलौलीको काँडा बजार र आसपासका गाउँमा खानेपानीको चरम अभाव भएको स्थानीयको गुनासो छ ।

खानेपानीको अभावमा अनिदो बसेर पानीको जोहो गर्नुपर्ने अवस्था आएको स्थानीय सुना दमाइले बताए । दैनिक २० लिटर मात्रै पानी धाराबाट पाइने र गाईवस्तु तथा अन्य प्रयोजनका लागि पानीको खोज्नुपर्ने उहाँले बताए ।

प्रत्येक वर्ष सुख्खायाममा पानीकै अभाव झेल्नुपर्ने अवस्था आएको स्थानीय गङ्गासिंह नायकले बताए । खानेपानीको अभावमा प्रत्येक वर्ष भौतारिनुपर्ने अवस्था रही आएको उनको भनाई छ ।

काँडाबजारमा खानेपानीको चरम समस्या हुँदा होटेल व्यवसाय नै बन्द गर्नुपर्ने स्थिति आएको होटेल व्यवसायी सीता चन्दले बताइन् ।

पानीको अभावमा होटेल व्यवसाय नै चौपट भएको उनले बताइन् । खानेपानीको अभावमा धेरै समस्या झेल्नुपरेको स्थानीय मीना भट्टले बताइन् ।

खानेपानीको समस्याका कारण महिलाहरुले बढी समस्या झेल्नुपरेको छ । घरको काम सँगसँगै खानेपानीको पनि जोहो गर्नुपर्ने भएकाले महिलाहरूलाई समस्या भएको स्थानीय तुला साउदले बताए ।

मेलौलीमा २०४० सालमा ग्वाल्लेकबाट ल्याएको खानेपानी योजना जीर्ण हुँदा र मुहानमै पानी कम हुँदा पानीको हाहाकार भएको हो ।

स्थानीय सरकारले खानेपानी समस्या समाधान नभएको गुनासो

विगत देखिनै खानेपानीको समस्या भएको मेलौली नगरपालिकामा समस्या समाधानका लागि स्थानीय सरकारले पनि कुनै पहल नगरेको स्थानीयको गुनासो छ ।

जसका कारण स्थानीय बासिन्दाहरू निराश भएका छन् । स्थानीय तहमा जनप्रतिनिधि आएपछि खानेपानीको समस्या समाधान हुने आश गरेको भएपनि समस्या समाधान हुन नसकेको स्थानीय केशवसिंह भाटले बताए ।

नगरक्षेत्रमा देखिएको खानेपानी समस्या समाधानका लागि सुर्नया नदीबाट लिफ्टिङ प्रणालीबाट खानेपानी ल्याउने तयारी भइरहेको नगरप्रमुख कृष्णसिंह नायकले बताए । ठूलो प्रोजेक्ट भएकाले केही समय भने लाग्ने उनको भनाई छ ।


नरी बडु