समाचारहरू

विश्व खाद्य सुरक्षा दिवसको अवसरमा आयोजित एक कार्यक्रमका सहभागीहरूले खाद्य अधिकार सुनिश्चित गर्न माग गरेका छन् ।

दिवसको अवसरमा असोज ३० गते जिल्ला स्वास्थ्य कार्यालयमा आयोजित कार्यक्रमका सहभागीहरूले यस्तो माग गरेका हुन् ।

अहिले जिल्लाका तीन गाँउपालिका (तत्कालिन १४ गाविस) खाद्य असुरक्षित भएको जिल्ला कृषि विकास कार्यालयका सूचना अधिकारी करन चन्दले बताए ।

पञ्चेश्वर, शिवनाथ र सिगास गाँउपालिकाका तत्कालिन आम्चोरा, विशालपुर, कुलाउ, महाकाली, पञ्चेश्वर, शर्माली, शिवनाथ, उदयदेव, कोटपेटरा, थालाकाँडा, सिगास, शिवलिङ्ग, न्वादेउ र ढुंगाड गाविस खाद्य असुरक्षाको सूचीमा छन् ।

तीन महिना खान नपुग्ने, सडक, बजार र रोजगारको सुविधा नभएको परिवारमा खाद्य असुरक्षा भएको मानिन्छ । जिल्ला स्वास्थ्य कार्यालयका अनुसार स्वास्थ्य संस्थामा तौल लिन आउने बच्चाहरूमध्ये १ हजार २ सय बच्चाहरूमा कडा खालको कुपोषणको समस्या देखिएको छ ।

"खाद्य उपलब्धता, खाद्यमा पहुँच, खाद्यको उपभोग तथा निरन्तरतामा आधारित रहेर खाद्य सुरक्षाको अवस्था पत्ता लगाइन्छ ।"-जिल्ला कृषि विकास कार्यालयका सूचना अधिकारी कर्णबहादुर चन्दले भने ।

"सडकको पहुँच नभएका यी खाद्य असुरक्षित ठाँउहरूमा खाद्यान्नको सहज उपलब्धता गराई नागरिकको खाद्य अधिकार सुनिश्चित गर्नुपर्छ ।"-नेपाल रेडक्रस सोसाईटीका सभापति भिमदत्त पाण्डेयले भने ।

यस्तै जिल्लाका तत्कालिन २३ गाविस मध्यम खाद्य असुरक्षित अवस्थामा तथा २ नगरपालिका र बाँकी २१ वटा गाविस न्युनतम खाद्य असुरक्षितको सूचीमा छन् ।

जिल्लामा कुल खेतीयोग्य जमिन ३१ हजार ४ सय ८५ हेक्टर मध्ये २५ हजार ७ सय हेक्टरमा मात्रै खेती गरिँदै आएको छ । तीमध्ये १० हजार ५ सय २० हेक्टरमा मात्र सिञ्चाई सुविधा पुगेको जिल्ला कृषि विकास कार्यालयको तथ्याङ्कले देखाएको छ ।

हरेक वर्षअक्टोबर १६ का दिन विश्व खाद्य सुरक्षा दिवस मनाउने गरिएको छ । संविधानको भाग ३, मौलिक हक अन्तर्गत धारा ३६ मा खाद्यसम्बन्धी हकको व्यवस्था गरिएको छ ।

नरी बडु