समाचारहरू

नेपाल खाद्य संस्थान मुगु शाखा सहित तीन डिपो र दुई बिक्रि केन्द्रमा मौज्दात खाद्यान्न सकिन लागेपछि जिल्लाभर खाद्यान्न अभाव भएको छ ।

खाद्य संस्थान केन्द्रीय कार्यालयले आर्थिक वर्ष ०७६/०७७ मा जिल्लाभरका लागि भनेर पठाएको खाद्यान्न सकिन लागेको र नयाँ आर्थिक वर्षका लागि खाद्यान्न ढुवानी हुन नसक्दा अभाव देखिएको हो ।

खाद्य संस्थान मुगु शाखाका अनुसार हाल ७ सय क्विन्टल मात्र खाद्यान्न मौज्दात छ । उक्त खाद्यान्न साउन मसान्तभित्रै सकिने शाखाको अनुमान छ । वर्षात्का कारण नाग्म-गमगढी सडक खण्डमा अवरोध आएपछि व्यापारीहरूले समेत खाद्यान्न ढुवानी गर्न सकेका छैनन् ।

चालु आर्थिक वर्षका लागि ठेकेदारको फर्म स्वीकृत भएपछि मात्र ढुवानी हुने खाद्य संस्थान मुगुका प्रमुख कर्ण रावलले जानकारी दिनुभयो । उहाँका अनुसार गत आर्थिक वर्षमा राजापुरबाट ढुवानी भई आउनुपर्ने २ हजार ५ सय क्विन्टल खाद्यान्न ढुवानी हुन नसक्दा अभाव व्यर्होनु परेको हो ।

ग्रामीण क्षेत्रमा रहेका डिपो तथा बिक्री केन्द्रमा खाद्यान्न मौज्दात शून्य भएपछि उक्त क्षेत्रबाट दुई तीन दिन लगाएर स्थानीयहरू खाद्यान्नको खोजीमा जिल्ला सदरमुकाम आइपुगेका छन् । जिल्लास्थित खाद्य संस्थानले भने खाद्यान्न अभाव भएको भन्दै प्रति व्यक्ति ३० किलो चामल मात्र दिएको छ । त्यतिमात्र चामलले ठूलो परिवारलाई एक हप्ता पनि नपुग्ने सोरु गाउँपालिका-३ का ४८ वर्षीय जय सेजुवालको भनाई छ ।

प्रति ३० किलो चामलको मूल्य १ हजार ४ सय ४० देखि १ हजार ५ सय ५० पर्ने संस्थानले जनाएको छ । व्यापारीहरूले भने ढुवानीमा समस्या भएकोले ३० किलो चामललाई १ हजार ७ सय देखि २ हजार २ सय सम्म बिक्री गर्नु परेको उद्योग वाणिज्य संघ मुगुका अध्यक्ष कमल बुढाले बताउनुभयो ।

चालु आर्थिक वर्षका लागि खाद्य संस्थान मुगुलाई ११ हजार, सोरुकोट डिपोमा २ हजार, कालै बिक्री केन्द्रका लागि ३ हजार, पुलु डिपोको लागि १ हजार ७ सय ५०, श्रीकोट डिपोमा १ हजार र रातापानी बिक्री केन्द्रका लागि ७ सय ५० क्विन्टल खाद्यन्न ढुवानीका गर्न ठेक्का खोलिएपनि स्वीकृत भएको छैन ।

जीवन सेजुवाल