क्षयरोगको औषधि अभाव हुँदा सेवाग्राही प्रभावित

  ०७६ जेठ २७ गते

खत्याड गाउँपालिकामा रहेका स्वास्थ्य संस्थामा जेठ १७ गते देखि क्षयरोगको औषधि अभाव हुँदा सेवाग्राही मर्कामा परेका छन् ।

गाउँपालिका अन्तर्गतका ६ ओटा स्वास्थ्य चौकी र एउटा प्राथमिक स्वास्थ्य केन्द्रमा क्षयरागको औषधि अभाव भएको हो ।

क्षयरोग जस्तो संवेदनशील रोगको औषधि अभाव भएपछि बिरामीहरूले छिमेकी जिल्ला बाजुरा र जुम्लाबाट औषधि ल्याएर सेवन गर्न बाध्य भएको गुनासो गरेका गरेका छन् ।

गाउँपालिकाको स्वास्थ्य शाखाले समयमै जिल्ला स्वास्थ्य कार्यालयमा औषधिको माग नगर्दा औषधि अभाव भएको हो ।

डट्स विधिमा उपचार गरिने क्षयरोगको औषधि बिरामीको अवस्था हेरेर तीनदेखि चारमहिनासम्म निरन्तर खानुपर्छ ।

एकदिन नबिराएर खानुपर्ने औषधि सकिएपछि आमाको लागि क्षयरोगको औषधि लिन जाँदा गाउँपालिकामा रहेको प्राथमिक स्वास्थ्य केन्द्र, रातापानीमा औषधि अभावका कारण नपाएको बताए ।

रातापानीका स्वास्थ्यकर्मीले औषधि नभएको जानकारी दिएपछि चार घण्टा हिँडेर छिमेकी जिल्ला बाजुराको कोल्टी पुगेर औषधि ल्याएको खत्याड गाउँपालिका-८ ठामलेक गाउँका नन्दबहादुर थापाले बताए ।

थापाका अनुसार बाजुराको कोल्टीको स्वास्थ्य संस्थाले चार दिनको लागिमात्र औषधि दिएको छ । चार दिनपछि पुनः एक दिन हिँडेर सदरमुकाम गमगढी वा छिमेकी जिल्ला बाजुरा र जुम्ला पुग्नुपर्ने बाध्यता रहेको थापाले बताए ।

उनकी ६५ वर्षीया आमा नैनी थापालाई क्षयरोग भएको पत्ता लागेपछि ०७५ चैत १४ गतेदेखि यो औषधि प्रयोग गर्न सुरू गरिएको थियो ।

नेपाल सरकारको नीति अनुसार क्षयरोगको औषधि हरेक स्वास्थ्य संस्थामा अनिवार्य हुनुपर्ने भएपनि गाउँपालिकाको लापरवाहीका कारण औषधि अभाव भएको प्राथमिक स्वास्थ्य केन्द्र रातापानीका निमित्त प्रमुख डाक्टर किशोर खड्काले बताए ।

औषधि अभाव हुन लागेको जानकारी गाउँपालिका स्वास्थ्य शाखालाई एक हप्ता अगाडि नै दिइएको भएपनि शाखाले समयमै जिल्ला स्वास्थ्य कार्यालयमा औषधि माग नगर्दा अभाव भएको खड्काले बताए ।


जीवन सेजुवाल