अन्यत्रबाट आएकालाई क्वारेन्टाइन राख्न खोज्दा वडाध्यक्षमाथि आक्रमण, आरोपितविरुद्ध प्रशासनमा उजुरी

  ०७७ जेठ १४ गते

खप्तड छान्ना गाउँपालिका–६ पाटादेवलका वडाध्यक्ष तिलक खड्काले आफूमाथि जेठ १२ गते  सोही ठाउँका ४० वर्षीय प्रकास खड्का, ३५ वर्षीय त्रिभुवन खड्का र ४५ वर्षीय तेजबहादुर खड्कालले आक्रमण गरी घाइते बनाएको भन्दै जेठ १४ गते जिल्ला प्रशासन कार्यालय, बझाङमा उजुरी दिनु भएको छ ।

लकडाउनका कारण काठमाडौँमा अलपत्र परेका खप्तड छान्ना गाउँपालिकाका स्थानीयहरु फर्किएपछि उहाँहरुलाई वडाकै पाटादेवल माविमा तयार गरेको क्वारेन्टाइनमा राख्न खोज्दा आरोपितहरुले आफूमाथि आक्रमण गरी घाइते बनाएको वडाध्यक्ष खड्काले बताउनु भयो ।

आफूमाथि ढुङ्गामुडा प्रहार गरी घाइते बनाएको भन्दै वडाध्यक्ष खड्काले जिल्ला प्रशासन कार्यालयमा उजुरी दार्ता गराउनु भएको र उहाँको उजुरी जिल्ला प्रहरी कार्यालयमा पठाइएको प्रमुख जिल्ला अधिकारी रामबहादुर सार्कीले बताउनु भयो ।

आरोपित पक्ष पनि आफूहरुले हातपात र कुटपिट नगरेको भन्दै जिल्ला प्रशासन कार्यालयमा आउनु भएको र दुबै पक्षको कुरा सुन्दा एकअर्कालाई आरोप प्रत्यारोप लगाउने गरेको प्रमुख जिल्ला अधिकारी सार्कीको भनाइ छ ।

जिल्ला प्रहरी कार्यालयका इन्स्पेक्टर नेत्र बोहराले हालसम्म पीडित पक्षबाट कुनै उजुरी नआएको बताउनु भयो  ।

 


रमेश केसी