कोरोना भाइरस सम्बन्धमा गण्डकी प्रदेशको अवस्था विश्लेषण

  ०७६ चैत २३ गते

गण्डकी प्रदेश स्वास्थ्य निर्देशनालयका आपतकालिन कार्य सञ्चालन केन्द्रका सम्पर्क व्यक्ति नवराज शर्माका अनुसार प्रयोगशाला व्यवस्थापन समितिले गण्डकी प्रदेशमै नमुना परीक्षणको प्रमाणिकरण सुरु गरेको छ । गण्डकी प्रदेशमा आज १८ वटा स्वाब नमुना संकलन गरि परीक्षण सुरु गरिएको छ ।

नवलपरासी (बर्दघाट सुस्ता पूर्व) जिल्ला प्रतिनिधि तिर्थराज डुम्रेका अनुसार जिल्लामा विदेशबाट घर फर्किएका ३८ जना अझै जिल्लाको विभिन्न स्थानमा तयार गरिएको क्वारेन्टाइन होममा रहेका छन् ।

आठ सय ७ जना मध्ये ६६ जना क्वारेन्टाइनमा बसेका थिए । २८ जना क्वारेन्टाइनबाट घर फिर्ता भएको जिल्ला स्वास्थ्य कार्यालयका प्रमुख केशवप्रसाद चापागाईंले बताउनुभयो । जिल्लामा विदेशबाट आएकाहरू नाम सहितको तथ्यांक पुनः अभिलेखिकरण भइरहेको उहाँले जानकारी दिनुभयो ।

जिल्लाबाट एक जनालाई आज भरतपुरमा रहेको कोरना अस्पतालमा रिफर गरिएकोे छ । अस्पतालमा स्वास्थ्य परीक्षणपछि स्वाब परीक्षणको लागि पठाउने वा नपठाउने एकिन हुने उहाँले बताउनुभयो ।

परीक्षणकालागि गएकाहरू भरतपुर कोरना अस्पतालमा भर्ना हुने र रिपोर्टको आधारमा उनीहरू घर फिर्ता वा थप उपचार भन्ने टुंगो लाग्ने उहाँले बताउनुभयो ।

आज देवचुली नगरपालिकाले नगर क्षेत्रको विभिन्न स्थानमा किटनाशक औषधि छर्केको नगरपालिका उपप्रमुख पर्वता तिवारीले बताउनुभयो ।

जिल्लामा लकडाउनमा बजार क्षेत्रमा यसको कडाइ भइरहेको भएपनि ग्रामीण क्षेत्रमा कडाइकासाथ कार्यान्वयन हुन सकेको छैन ।

गोरखा जिल्ला प्रतिनिधि हरिराम उप्रेतीका अनुसार बिहान र बेलुका भिड हुने तरकारी, खाद्यान्न, मेडिकल जस्ता अत्यावश्यक पसल अगाडि दुरि कायम गर्न रेखाङ्कन गरिएको छ । गोरखा नगरपालिका र प्रहरीले सदरमुकाम क्षेत्र अन्तर्गतका हरमटारी, बसपार्क लगायतका क्षेत्रमा सामाजिक दुरि कायम गर्न रेखाङ्कन गरेका हुन् ।

त्यस्तै गोरखा नगरपालिकाले सदरमुकाम क्षेत्रमा संचालित मेडिकल र पोलिक्लिनिकको अनुगमन गरेको छ । अनुगमनको क्रममा पाचँ ओटा औषधि पसल बन्द रहेको भेटिएको गोरखा नगरपालिकाका अधिकृत चेत प्रसाद अंगाइले बताउनुभयो । पसल खुले नखुलेको पुनः अनुगमन गरिने उहाँले बताउनुभयो ।

लकडाउनको बेला उपभोग्य सामाग्री सहज बनाउने नगरपालिकाले जनाएको छ ।

कास्की जिल्ला प्रतिनिधि सुशन घिमिरेका अनुसार आज साँझसम्ममा कास्कीमा १० जनाको नमुना संकलन गरिएको छ र रिर्पोट भोली बिहानै आउँछ ।

सरकारले एकद्धार प्रणालीबाट राहत वितरण गर्ने भनेतापनि कास्कीमा लागू हुन सकिरहेको छैन । केही संस्था वा युवाहरुले आफ्नै ढंगबाट राहत वितरण गरिरहेका छन् ।

कास्कीको मादी गाउँपालिकाले लकडाउनका कारण प्रभावित विपन्न सात सय परिवारलाई राहत सामग्री दिने तयारी गरेको छ । गाउँपालिकाले पालिकाभित्रका विपन्न परिवारको सूची तयार गरी राहतस्वरुप २५ किलोग्राम चामल, तेल, नुन, दाललगायत रु दुई हजार बराबरको राहत वितरण गर्न लागिएको गाउँपालिकाका अध्यक्ष वेदबहादुर गुरुङले जानकारी दिनुभएको छ । उहाँका अनुसार गाउँपालिकाको क्वारेन्टाइनमा हाल कोही पनि रहेका छैनन् ।

अन्नपूर्ण गाउँपालिकाले पनि राहत वितरणका लागि नाम संकलन गरिरहेको अध्यक्ष युवराज कुंवरले जानकारी दिनुभयो । कुंवरका अनुसार गाउँपालिकाको क्वारेन्टानमा हाल १२ जना रहेका छन् ।

रुपा गाउँपालिकाको चैत्र २३ गतेको कार्यपालिका बैठकबाट भोली राहत कोष खडा गर्ने निर्णय गरेको अध्यक्ष नवराज ओझाले बताउनुभयो ।

उहाँका अनुसार वडाबाट नाम लिने काम भैरहेतापनि तत्कालका लागि प्रत्येक वडामा १२ बोरा चामल अत्यावश्यक परेका वितरण गर्ने गरि पठाइएको छ ।

माछापुच्छ्रे गाउँपालिकाका अध्यक्ष कर्ण बहादुर गुरुङ्गका अनुसार वडा तहबाट अति विपन्न परिवारको नामवाली संकलन भैरहेको छ । गाउँपालिकाले तत्कालका लागि दाल, चामल, नुन, मसला र साबुन प्रदान गर्ने तयारी गरेको गुरुङ्गले बताउनुभयो ।

पोखरा महानगरपालिकाका प्रत्येक वडाबाट राहतका लागि नामसंकलन गरिहरहेका प्रवक्ता धनबहादुर नेपालीले जानकारी दिनुभयो । महानगरले चैत्र २५ गते भित्रमा सबैवडामा राहत वितरण गरिसक्ने उहाँको भनाइ थियो ।  सरकारले एक स्थानिय तहबाट अर्को स्थानिय तहमा प्रवेश रोक लगाएपछि कास्कीमा पनि त्यसलाई कडाइका साथ लागू गरिएको जानकारी जिल्ला प्रहरी कार्यलय कास्कीका डिएसपी राजकुमार केसीले दिनुभयो ।

पर्वत जिल्ला प्रतिनिधि सन्तोष थापाका अनुसार आज आठ जनाको स्वाब परीक्षणको लागि पोखरा स्वास्थ्य विज्ञान प्रतिष्ठान पठाइएको छ । पर्वतमा लकडाउनलाई थप कडाइ गरिएको छ । सरकारको निर्णयको कार्यान्वयन गर्दै जिल्ला विपद् व्यवस्थापन समितिको आइतबार बसेको बैठकले पर्वतका सातवटै स्थानीय तहको सिमा क्षेत्र र छिमेकी जिल्ला बागलुङ, कास्की, म्याग्दी र स्याङजाका सिमा क्षेत्रमा पनि सुरक्षाकर्मीको टोली परिचालन गरिएको छ । स्थानीय जनप्रतिनिधिहरुको सहयोगमा लकडाउनलाई व्यवस्थित बनाउने निर्णय भएको जिल्ला प्रहरी कार्यालय पर्वतका प्रमुख डिएसपी श्यामु अर्यालले जानकारी दिनुभयो ।

बागलङु जिल्ला प्रतिनिधि सृजना पन्तका अनुसार बागलुङ नगरपालिकाकी ६५ वर्षीय कोरोना सङ्क्रमित महिलाको प्रत्यक्ष सम्पर्कमा रहेका २२ जनाका व्यक्तिहरुको फलोअप गर्दा निजहरुको अवस्था सामान्य रहेको छ ।

विभिन्न नगरपालिका तथा गाँउपालिकामा विभिन्न वडाहरुमा रहेका मजदुर, सिमान्तकृत वर्ग आदिलाई नियमित रुपमा राहत वितरण भैरहेको बताउनुभयो ।

विभिन्न नगरपालिका तथा गाँउपालिकामा विभिन्न देशबाट आएका करिब ८१५ जनालाई नियमित फलोअप गरी होम क्वारेन्टाइनमा बसिरहन लगाएको र उनीहरुको अवस्था सामान्य रहेको छ ।

बडीगाड गाँउपालिकाले आफ्नो गाँउपालिका भरी कुनै पनि मानिसलाई आवत जावत गर्न निषेध गरेको छ र कुनै मानिस आएको थाहा पाएमा क्वारेन्टाइनमा राख्ने व्यवस्था मिलाएको छ ।

बडीगाड गाँउपालिकामा रहेको क्वारेन्टाइन खर्वाङमा भारतबाट आएका एक जना र भीमगिठेमा पोखरा र बागलुङबाट आएका २ जनालाई क्वारेन्टाइनमा राखिएको छ ।

बडीगाड गाँउपालिकाले आफनै श्रोतबाट पीपीइ खरिद गरि ७ वटा स्वास्थ्य चौकी ३ वटाका दरले ७ वटा सामुदायिक इकाइमा ११ वटाका दरले पीपीइ साथै सेनीटाइजर समेत वितरण गरेको छ ।

काठेखोला गाँउपालिकाले आफनै श्रोतबाट पीपीइ खरिद गरि ७ वटा स्वास्थ्य चौकी ३ वटाका दरले एकवटा सामुदायिक इकाइमा २ वटा दरले पीपीइ, २० वटाका दरले मास्क साथै सेनीटाइजर समेत वितरण गरेको छ ।

बागलुङ जिल्लामा समेत र्यापिड टेस्ट किट  मार्फत् कोरोना भाइरसको जाँच गर्ने भनिएकोमा त्यसको तयारीका लागि स्वास्थ्य कार्यालय र अञ्चल अस्पतालमा भएका ल्याबमा कार्यरत कर्मचारीहरुको विवरण पठाइएको छ ।

तनहुँ जिल्ला प्रतिनिधि प्रकाशचन्द्र भट्टराईका अनुसार तनहुँका स्थानीय तहले विपन्न घर परिवारलाई राहत वितरण सुरु गरेका छन् । कोरोना भाईरसको कारण सिर्जित समस्याबाट पीडित भएका विपन्न नागरिकलाई स्थानीय तहले राहत वितरण सुरु गरेका हुन् ।

सबै स्थानीय तहले विपन्न नागरिकको तथ्यांक संकलन गरि राहत वितरण सुरु गरेका हुन् । स्थानीय तहले संगठित क्षेत्रमा कार्यरत श्रमिक तथा असहायहरुलाई उपलब्ध गराउने राहत सम्बन्धी मापदण्ड–२०७६ बनाइ राहत वितरण सुरु गरेका हुन् ।

व्यास नगरपालिकाले ज्यालादारी मजदूर र विपन्न परिवारलाई खाद्यान्न वितरणका लागि तथ्याङ्क सङ्कलन सम्पन्न गरेको छ । प्रत्येक वडा कार्यालय मार्फत प्राप्त भएको करिब तीन हजार ५ सय विपन्न घर परिवारलाई खाद्यान्न वितरण सुरु गरिएको नगरप्रमुख वैकुण्ठ न्यौपानेले जानकारी दिनुभयो ।

बन्दीपुर गाउँपालिकाले ६ वटै वडाका विपन्न परिवारको तथ्याङ्क संकलन गरी खाद्यान्न वितरण शुरु गरेको गाउँपालिकाका अध्यक्ष पूर्णसिंह थापाले जानकारी दिनुभयो ।

उहाँका अनुसार स्थायी र अस्थायी रुपमा बसोबास गरिरहेका असहाय, अपाङ्गता भएका तथा मजदूरका परिवारलाई खाद्यान्न वितरण गरेको छ ।

गाउँपालिकाले विभिन्न वडाका ५ सय १७ परिवारलाई खाद्यान्न वितरण गरेको छ । प्रतिपरिवार ३० किलो चामलको साथमा खाने तेल र नुन पनि वितरण गरिएको अध्यक्ष थापाले जानकारी दिनुभयो ।

शुक्लागण्डकी नगरपालिकामा सबै वडाको तथ्यांक नआएपनि तथ्यांक संकलन गरिसकिएका वडामा राहत वितरण सुरु गरिएको प्रमुख प्रशासकीय अधिकृत गंगालाल सुवेदीले बताउनु भयो ।

प्रति परिवारलाई ३० किलो चामल, दुइ किलो दाल, एक पोका नुन, एक लिटर खाने तेललगायत उपलब्ध गराईएको उहाँले बताउनुभयो ।

म्याग्दे गाउँपालिकाका ७ वटै वडा कार्यालय मार्फत सकलन गरिएका १ हजार ५ सय विपन्न परिवारलाई राहत वितरण सुरु गरिएको प्रमुख प्रशासकीय अधिकृत हरिराम नागिलाले बताउनु भयो ।

राहत वितरणको कार्य चैत्र २५ गते भित्र सक्नेगरि काम गरिरहेको नागिलाले जानकारी दिनु भयो । अन्य स्थानीय तहले पनि विपन्नको लगत संकलन गर्दै राहत वितरण सुरु गरिएको सम्बन्धित स्थानीय तहका प्रमुखहरुले बताउनु भएको छ ।

म्याग्दी जिल्ला प्रतिनिधि अमृत बास्कुनेका अनुसार एउटा स्थानीय तहबाट अर्को स्थानिय तहमा प्रवेश गरेका नागरिकलाई पनि १४ दिन क्वारेन्टाइनमा बसाल्ने व्यवस्था जिल्लाका ६ वटै स्थानीय तहले मिलाएको छ  ।

संघिय सरकारको योजना अनुसार म्याग्दीका स्थानीय तहमा रहेका ज्यालादारी तथा मजदुर परिवारको पहिचान तथा राहत वितरण थालिएको छ ।

बेनी नगरपालिकामा २ सय ६१, धवलागिरी गाउँपालिकामा एक सय, रघुगंगा गाउँपालिकामा एक सय ४३ परिवार गरी कुल पाँच सय चार परिवार राहतका लागि सूचिकृत भएका मा चार सय ४४ परिवारले राहत पाइ सकेका छन् । राहत वितरणका लाक्षितवर्गको पहिचान साथै राहत वितरण पनि सँगसँगै अगाडी बढाइएको छ ।

लमजुङ जिल्ला प्रतिनिधि दलबहादुर मजाकोटीका अनुसार आज दुई जनाको स्वाब सङ्कलन गरिएको र भोलि बिहान मात्रै नमूना परीक्षणको लागि पठाइने छ ।


गण्डकी प्रदेश कार्यालय