समाचारहरू

कोरोना भाइरसको सङ्क्रमणबाट असार ४ गतेसम्म नेपालमा कोरोना सङ्क्रमितको सङ्ख्या ७ हजार ८ सय ४८ पुगेको स्वास्थ्य तथा जनसङ्ख्या मन्त्रालयका प्रवक्ता डाक्टर जागेश्वर गौतमले नियमित प्रेस ब्रिफिङमार्फत जानकारी दिनु भयो । कोरोना सङ्क्रमितमध्ये असार ४ गते दिउँसोसम्म १ हजार १ सय ८६ जना अस्पतालबाट डिस्चार्ज भएका छन् भने ६ हजार ६ सय ४० जनाको उपचार भइरहेको छ । मन्त्रालयका अनुसार कोरोनाका कारण २२ जनाको मृत्यु भएको छ । मन्त्रालयका अनुसार २१ वर्षदेखि ३० वर्षसम्मका २ हजार ८ सय ९३ जनामा कोरोना पुष्टि भएको छ । ६१ वर्षमाथिका ८२ जना, २० वर्षमुनीका २ हजार १ सय ३४ जनामा कोरोना पुष्टि भएको मन्त्रालयले स्थिति प्रतिवेदनमा उल्लेख गरेको छ । त्यसैगरी ३१ देखि ५० वर्षसम्मका २ हजार ४ सय ८८ जनामा कोरोना पुष्टि भएको प्रतिवेदनमा उल्लेख छ ।

प्रदेश १

प्रदेश १ मा असार ४ गते थप चार जनामा कोरोना भाइरसको सङ्क्रमण पुष्टि भएको छ । प्रदेश १ मा चार जना थपिएसँगै कूल सङ्क्रमितको सङ्ख्या ४ सय २० पुगेको छ । प्रदेश १ बाट असार ४ गते ४० जना डिस्चार्ज भएका छन् । डिस्चार्ज हुनेको कूल सङ्ख्या २ सय २४ पुगेको सामाजिक विकास मन्त्रालयले जनाएको छ ।

प्रदेश २ 

प्रदेश २ मा असार ४ गते ६६ जना कोरोना सङ्क्रमित थपिएका छन् । सामाजिक विकास मन्त्रालयका सचिव डा. रामप्रसाद घिमिरेका अनुसार धनुषामा २९, महोत्तरीमा एक, सर्लाहीमा दुई, रौतहटमा ३४ जनामा कोरोना सङ्क्रमण पुष्टि भएको छ । प्रदेशमा सङ्क्रमितको सङ्ख्या २ हजार ७ सय ८१ जना पुगेको छ । प्रदेशमा कोरोना सङ्क्रमित मध्ये ६ सय ८३ जना उपचार पछि निको भएर घर फर्किएका छन् ।

सिराहा प्रतिनिधि दुर्गा परियारका अनुसार सूर्यनारायण सत्यनारायण क्याम्पस स्थित क्वारेन्टाइनमा रहेकाहरूले स्वाब सङ्कलन गरेको १५ दिन भन्दा बढी भइसक्दा पनि असार ४ गतेसम्म रिपोर्ट नआएको र घर समेत जान नदिएको एक व्यक्तिले बताएका छन् । सिराहाका प्रमुख जिल्ला अधिकारी सरोज गुरागाइले स्वाब सङ्कलनको रिपोर्ट केन्द्रबाटै आउने उल्लेख गर्दै दैनिक रूपमा ताकेता गरेको बताउनु भयो । स्वाब सङ्कलन नगरी घर पठाउँदा जोखिम बढ्न सक्ने हुनाले स्वाब सङ्कलन गर्न स्वास्थ्य कार्यालयलाई निर्देशन दिएको उहाँले बताउनु भयो । असार ४ गतेसम्म १ सय २४ जना महिला र १ हजार १ सय ४ जना पुरुष गरी १ हजार २ सय २८ जना क्वारेण्टाइनमा रहेका र ४ सय ४० जनाको पीसीआर परीक्षणको रिपोर्ट आउन बाँकी रहेको जिल्ला स्वास्थ्य कार्यालयका प्रमुख कृष्णदेव यादवले बताउनु भयो ।

महोत्तरी प्रतिनिधि अजयकुमार साहका अनुसार सम्सी गाउँपालिका-३ वैरगीया लक्ष्मिनीया स्थित मदरसामा रहेको क्वारेन्टाइनमा असार ४ गतेसम्म ७७ जना रहेको र उक्त क्वारेण्टाइनमा ठाउँ अभाव भएपछि खुल्ला आकाशमुनी पाल टाँगेर भारतबाट आएका स्थानीयहरूलाई राखिएको छ । उक्त क्वारेण्टाइनमा दुई शौचालय छ । त्यो पनि फोहोर रहेको क्वारेन्टाइनमा रहेका एक व्यक्तिले बताउनु भयो । स्वाब सङ्कलन भएर नतिजाको पर्खाइमा रहेका उनीहरू पालमुनी सुत्दा कतिखेर सर्प वा अन्य किराले टोक्ने हो भनेर राम्ररी निदाउन समेत सकेका छैनन् । स्वास्थ्यकर्मीहरू समेत स्वाब सङ्कलनपछि अनुहार समेत देखाउन नआएको क्वारेण्टाइनमा रहेका व्यक्तिहरूले आरोप लगाएका छन् ।

गण्डकी प्रदेश

गण्डकी प्रदेशमा असार ४ गते थप ३० जनामा कोरोना सङ्क्रमण देखिएको छ । योसँगै गण्डकी प्रदेशमा सङ्क्रमितको सङ्ख्या ३ सय २४ पुगेको गण्डकी प्रदेश स्वास्थ्य निर्देशनालयका निर्देशक डा. विनोद विन्दु शर्माले जानकारी दिनुभयो ।

इन्सेक तनहुँ जिल्ला प्रतिनिधि प्रकाशचन्द्र भट्टराईका अनुसार जेठ २४ गते स्वाब नमूना सङ्कलन गरिए पनि लामो समयसम्म नतिजा नआएपछि व्यास नगरपालिका-१ को आदिकवि भानुभक्त क्याम्पसको क्वारेण्टाइनमा बस्ने युवाले आन्दोलन सुरु गरेका थिए । उनीहरूले नाराबाजी गर्न थालेपछि असार ३ गते साँझ व्यास नगरपालिकाका प्रमुख र प्रमुख जिल्ला अधिकारी सहितको उपस्थितिमा ती ५० जना युवाहरुको आरडीटी परीक्षण गरेर घर पठाइएको थियो । गण्डकी प्रदेशको स्वास्थ्य निर्देशनालयले असार ४ गते बिहान सार्वजनिक गरेको नतिजामा घर फर्किसकेका मध्ये एक जना पुरुषमा कोरोना सङ्क्रमणको पुष्टि भएको थियो । उनलाई नेपाली सेनाको टोलीले घरबाट एम्बुलेन्समा राखेर आइसोलेशनमा ल्याइएको र घर सिल गरी उनका परिवारका दुई जना सदस्यलाई क्वारेण्टाइनमा राखिएको प्रजिअ बद्रीनाथ अधिकारीले बताउनुभयो । रिपोर्ट समयमा नआउँदा यस्तो समस्या आएको अधिकारीले बताउनुभयो ।

प्रदेश ५

स्वास्थ्य तथा जनसङ्ख्या मन्त्रालयका अनुसार असार ४ गते प्रदेश ५ मा रुपन्देही प्रयोगशालामा गरिएको परीक्षणमा गुल्मीका तीन जना, कपिलवस्तुका एक जना, पाल्पाका ६ जना, रुपन्देहीका नौ जना, रोल्पाका एक जना, नवलपरासी पश्चिमका एक जना, अर्घाखाँचीका ९७ जना गरी १ सय १८ जनामा कोरोना सङ्क्रमण पुष्टि भएको छ । यसैगरी नेपालगञ्ज प्रयोगशाला गरिएको परीक्षणमा बाँकेका तीन र बर्दियाका तीन जना गरी ६ जना, राप्ती विज्ञान प्रतिष्ठानमा गरिएको परीक्षणमा चार जना गरी प्रदेश ५ मा जम्मा १ सय २८ जनामा सङ्क्रमण पुष्टि भएको छ ।

कर्णाली प्रदेश

सुर्खेतको सिम्ता गाउँपालिका-८ की २५ वर्षीया युवती जेठ १६ गते भारतबाट आई सिम्ता गाउँपालिका-८ स्थित नेरा मावि आलीमा १४ दिन क्वारेण्टाइनमा बसी घर फर्केको दुई दिनपछि असार १ गते घरनजिकै भुण्डिएर आत्महत्या गरेको गाउँपालिका अध्यक्ष कविन्द्र केसीले बताउनु भयो । सामाजिक विकास मन्त्रालय स्वास्थ्य सेवा महाशाखा प्रमुख डाक्टर लक्ष्मी नारायण तिवारीले असार ३ गते साँझ जारी गरेको विज्ञप्तिअनुसार क्वारेण्टाइनमा हुँदा गरिएको आरडिटी परीक्षणमा नेगेटिभ देखिए पनि असार १ गते मृत्युपछि गरिएको पीसीआर परीक्षणमा कोरोना सङ्क्रमण देखिएको छ ।

सुदूरपश्चिम प्रदेश

इन्सेक बाजुरा प्रतिनिधि पदमबहादुर सिंहका अनुसार बुढीगङ्गा नगरपालिकाको धुरालसैन माविको क्वारेण्टाइनमा राखिएका १७ जना कोरोना सङ्क्रमितहरूको उपचारका लागि एक जना अनमी दिया सिंह मात्रै हुनुहुन्छ । स्वास्थ्य कार्यालय, बाजुराका प्रमुख दयाकृष्ण पन्तले स्वास्थ्यकर्मी अभाव भएका कारण मापदण्ड अनुसारका कर्मचारी स्थानीय तहमा निर्माण गरिएका आइसोलेशनमा पठाउन नसकिएको बताउनु भयो । जिल्लामा चिकित्सक तथा हेल्थ असिस्टेण्टहरूको अभावका कारण अधिकांश स्थानीय तहले तयार गरेका आइसोलेशनमा अनमीहरूलाई उपचारका लागि परिचालन गरिएको पन्तको भनाइ छ ।

अनलाइन डेस्क