समाचारहरू

भदौ ३ गते ६ सय ८१ जनामा कोरोना सङ्क्रमण पुष्टि भएपछि सङ्क्रमितको सङ्ख्या २८ हजार ९ सय ३८ पुगेको छ । स्वास्थ्य तथा जनसङ्ख्या मन्त्रालयका अनुसार ११ हजार ५ सय २२ जनाको स्वाब परीक्षण गरिएकोमा ६ सय ८१ जनामा कोरोना सङ्क्रमण देखिएको हो । मन्त्रालयले जारी गरेको स्थिति प्रतिवेदन अनुसार भदौ ३ गतेसम्म कोरोना सङ्क्रमणका कारण १ सय २० जनाको मृत्यु भएको छ । सङ्क्रमितमध्ये १७ हजार ७ सय ७० जना अस्पतालबाट डिस्चार्ज भएका छन् । भदौ ३ गते १ सय २० जना डिस्चार्ज भएका छन् भने निको दर ६१.२ प्रतिशत रहेको मन्त्रालयले जनाएको छ । ११ हजार १ सय १८ जनाको उपचार भइरहेको छ । भदौ १ गतेसम्म ५ लाख ५४ हजार ३ सय ८८ जनाको स्वाब परीक्षण गरिएको पनि मन्त्रालयले जनाएको छ ।

प्रदेश १ 

मोरङ प्रतिनिधि नेत्रप्रसाद अधिकारीका अनुसार वीपी कोइराला स्वास्थ्य विज्ञान प्रतिष्ठान(घोपा)मा उपचारका क्रममा बुढीगङ्गा गाउँपालिका-२ की ६७ वर्षीया बृद्धाको भदौ २ गते राति मृत्यु भएको छ । कोरोना भाइरसको सङ्क्रमण पुष्टि भएपछि भदौ २ गते विराट मेडिकल कलेजले बृद्धालाई वीपी रेफर गरेको थियो । योसँगै मोरङमा कोरोना भाइरसको सङ्क्रमणका कारण मृत्यु हुनेका सङ्ख्या नौ पुगेको छ ।

सङ्खुवासभामा प्रतिनिधि भविन कार्कीका अनुसार भदौ २ गते कोरोना भाइरसको सङ्क्रमण पुष्टि भएका तीन जना दुई दिनदेखि आइसोलेशन सेण्टर नहुँदा उपचारबाट वञ्चित भएका छन् । प्रदेश सरकारले निर्माण गरेका सबै आइसोलेशन वार्ड भरिएपछि जिल्लामै राखेर उपचार गर्नु पर्ने भएपनि दुई दिन बित्दा समेत क्वारेण्टाइनमै अलपत्र परेका छन् । जिल्ला अस्पतालले खाँदबारी नगरपालिका-९ ढुङ्गे विरौनाको प्राथिमक विद्यालयमा निर्माण गर्न लागिएको आइसोलेशन वार्डमा स्थानीयले विरोध जनाएपछि अझै अन्योल भएको जिल्ला अस्पतालका प्रवक्ता सुजाता पौडेलले जानकारी दिनु भयो । कोरोना सङ्क्रमण पुष्टि भएकाहरूलाई छुट्टै राखेर उपचार गर्नु परेपनि आइसोलेशन सेण्टर नहुँदा सङ्क्रमित उपचारबाट वञ्चित भएका छन् ।

सुनसरी प्रतिनिधि जयकृष्ण यादवका अनुसार वीपी कोइराला स्वास्थ्य विज्ञान प्रतिष्ठान(घोपा)मा उपचाररत धरान उपमहानगरपालिका-१५ की ७१ वर्षीया महिलाको भदौ ३ गते उपचारका क्रममा मृत्यु भएको छ । साउन २३ गते कोरोना भाइरसको सङ्क्रमण पुष्टि भएपछि प्रतिष्ठान भर्ना गरिएकी बृद्धाको उपचारका क्रममा मृत्यु भएको धरान उपमहानगरपालिकाका स्वास्थ्य महाशाखा प्रमुख उमेश मेहेताले बताउनु भयो ।

प्रदेश २

सप्तरी प्रतिनिधि मनोहरकुमार पोखरेलका अनुसार कोरोनाको लक्षण देखिएका राजविराज नपा-४ का २८ वर्षीय युवकको भदौ २ गते मृत्यु भएपछि सोही राति स्वाब सङ्कलन गरी परिवारले राजविराजमा अन्तिम संस्कार गरेका छन् । कोरोनाकै लक्षण देखिएपछि साउन ३० गते स्वाब दिएका कञ्चनरुप नपा-८ का ४५ वर्षीय पुरुषको मृत्यु भएपछि भदौ ३ गते उनका परिवारले स्वास्थ्य कार्यालय र स्थानीय तहलाई जानकारी नदिई सप्तकोशी व्यारेजमा अन्तिम सस्कार गरेको स्वास्थ्य कार्यालयका निमित्त प्रमुख दुनियालाल यादवले बताउनु भयो । मृतक दुवैको पीसीआर परीक्षणको रिपोर्ट आएको छैन ।

रौतहट प्रतिनिधि कोपिला तिमल्सिनाका अनुसार भदौ २ गते राति १२ बजेदेखि भदौ १७ गते राति १२ बजेसम्मको लागि माधवनारायण नगरपालिकाबाट प्रवाह हुने अत्यावश्यक बाहेकका सबै सेवा बन्द गरिएको छ । अत्यावश्यक काम बाहेक हिँडडुल तथा आवतजावत गर्न प्रतिबन्ध लगाउने गरी सील गरिएको नगर प्रमुख वीरेन्द्रप्रसाद यादवले बताउनुभयो ।

सर्लाही प्रतिनिधि बुधन साहका अनुसार हरिपुर नगरपालिकामा कोरोना सङ्क्रमित व्यक्तिहरूको सङ्ख्या बढ्न थालेपछि नगरपालिकाले एक सूचना जारी गर्दै १५ दिनसम्मको लागि पूर्ण रूपमा सील गर्ने निर्णय गरेको छ । नगरपालिकाले भदौ ३ गते सूचना जारी गर्दै हरिपुर नगर भित्रका अति आवश्यक सेवाबाहेका अन्य सेवा बन्द गर्ने प्रमुख प्रशासकीय अधिकृत उदयप्रसाद देवकोटाले बताउनु भयो ।

बागमती प्रदेश  

काठमाडौँमा १ सय ३४, चितवनमा २४, मकवानपुरमा २३, ललितपुरमा १७, भक्तपुरमा आठ, नुवाकोटमा दुई र धादिङमा एक जना गरी यस प्रदेशमा भदौ ३ गते २ सय ९ जनामा कोरोना भाइरस सङ्क्रमणको पुष्टि भएको छ । यससँगै प्रदेशमा सङ्क्रमित हुनेको सङ्ख्या ३ हजार ५ सय ७४ जना पुगेको छ । जसमध्ये ७ सय २४ जना उपचारपछि घर फकिएका छन् भने २ हजार ८ सय २६ जनाको विभिन्न अस्पताल तथा आइसोलेशन सेन्टरमा उपचार भइरहेको छ । हालसम्म यस प्रदेशमा कोरोना भाइरस सङ्क्रमणको कारण मृत्यु हुनेको सङ्ख्या २४ जना पुगेको छ ।

धादिङ प्रतिनिधि सीताराम अधिकारीका अनुसार गल्छि गाउँपालिकामा पुनः एक हप्ताको लागि लकडाउन गरिएको छ । पहिलो पटक आहृवान गरेको लकडाउनको समय भदौ ३ गते रातिबाट सकिने भएपछि भदौ ९ गतेसम्मको लागि लकडाउन लम्ब्याउने निर्णय भएको उपाध्यक्ष राधा तिमल्सिनाले बताउनुभयो । गाउँपालिकाले अत्यावश्यक बाहेकका होटल, रेष्टुरेण्ट, सहकारी, शैक्षिक संस्थालगायतका व्यवसायहरू बन्द गर्न आग्रह गरेको छ । खाद्यान्न पसलहरू भने बिहान ७ बजेदेखि ९ बजेसम्म सुरक्षा सावधानी अपनाएर खोल्न सकिने निर्णय भएको प्रमुख प्रशासकीय अधिकृत श्रेष्ठले जानकारी दिनुभयो ।

चितवन प्रतिनिधि दिपेन्द्र अधिकारका अनुसार कोरोना भाइरस सङ्क्रमणबाट भदौ २ गते एक जनाको मृत्यु भएको छ । साथै मृतक बृद्धाका चार जना आफन्तमा पनि कोरोना सङ्क्रमण पुष्टि भएको प्रयोगशालाकी प्रमुख डा. नितु अधिकारीले बताउनुभयो । खैरहनी नगरपालिका-३ गोठसोर निवासी १०८ वर्षीया बृद्धाको कोरोना सङ्क्रमणबाट घरमै मृत्यु भएको जिल्ला स्वास्थ्य कार्यालय चितवनका प्रमुख दीपकबाबु तिवारीले जानकारी दिनुभयो । भदौ १ गते स्वाब सङ्कलन गरी कोरोना परीक्षणका लागि भरतपुर अस्पताल कोभिड-१९ परीक्षण प्रयोगशाला पठाइएको थियो । मृत्यु पश्चात मात्रै ती बृद्धाको रिपोर्ट पोजिटिभ आएको हो । योसँगै चितवनमा कोरोना सङ्क्रमणबाट मृत्यु हुनेका सङ्ख्या दुई पुगेको छ । यसअघि भरतपुर अस्पतालमा उपचारका क्रममा भरतपुर महानगरपालिका-११ का एक बृद्धको कोरोना सङ्क्रमणबाट मृत्यु भएको थियो ।

नुवाकोट प्रतिनिधि नवदीप श्रेष्ठका अनुसार जिल्लामा कोरोना समुदायस्तरमा फैलिएपछि जिल्ला प्रशासन कार्यालयले निषेधाज्ञाको अवधि बढाएको छ । कोभिड-१९ जिल्ला क्राइसिस म्यानेजमेन्ट सेन्टरको बैठकले भदौ २ गते रातिदेखि लागू हुने गरी सात दिनलाई निषेधाज्ञा अवधि थप गरेको छ । यसअघि साउन २४ गतेदेखि १० दिनको लागि गरिएको निषेधाज्ञा भदौ २ गते रातिदेखि सकिने भएपछि सात दिन थप गरिएको प्रमुख जिल्ला अधिकारी झङ्कनाथ ढकालले बताउनुभयो । विदुर नगरपालिका, बेलकोटगढी नगरपालिका, दुप्चेश्वर, लिखु, पञ्चकन्या, शिवपुरी, सूर्यगढी गाउँपालिकाको सम्पूर्ण क्षेत्र र तादी, ककनी र तारकेश्वर गाउँपालिकाको केही वडाहरूमा निषेधाज्ञा जारी गरिएको छ । जिल्लामा हालसम्म ७० जनामा कोरोना सङ्क्रमण पुष्टि भएको छ । सङ्क्रमितमध्ये ५४ जना निको भइसकेका छन् । अन्यलाई त्रिशूली जिल्ला अस्पताल, खरानीटार अस्पताल र काठमाडौँका विभिन्न अस्पतालको आइसोलेशनमा राखेर उपचार गरिएको छ ।

सिन्धुपाल्चोक प्रतिनिधि नातिबावु धितालका अनुसार बागमती प्रदेशको सामाजिक विकास मन्त्रालयको सहयोगमा सदरमुकाम चौतारास्थित जिल्ला समन्वय समितिको हलमा भदौ ३ गतेबाट २५ बेडको आइसोलेशन स्थापना गरेको जिल्ला स्वास्थ्य कार्यालयका प्रमुख दुर्गादत्त चापागाईंले बताउनु भयो । हाल सङ्क्रमितको सङ्ख्या बृद्धि भएसँगै आइसोलेशन नहुँदा बिरामी राख्न समस्या भएकाले सामाजिक विकास मन्त्रालयको आर्थिक सहयोगमा आइसोलेशन स्थापना गरेको जिल्ला समन्वय समितिका प्रमुख कृष्णगोपाल तामाङले बताउनु भयो । दुई दिनअघि जिल्लामा चारजना कोराना सङ्क्रमितलाई राख्ने ठाउँ (आइसोलेशन) नभएको सञ्चार माध्यमले उजागर गरेपछि बागमती प्रदेशको ध्यान केन्द्रित भएको बागमती प्रदेश सरकारका सामाजिक विकास मन्त्री युवराज दुलालले बताउनु भयो ।

गण्डकी प्रदेश

तनहुँ प्रतिनिधि प्रकाशचन्द्र भटटराईका अनुसार समुदायका व्यक्तिमा कोरोना सङक्रमण देखिएपछि  शुक्लागण्डकी नगरपालिकाले एक हप्ता लकडाउन गर्ने निर्णय गरेको छ । दुलेगौडास्थित एक पसलमा सवारी चालकको काम गर्दै आएका २९ वर्षीय पुरुषमा भदौ ३ गते कोरोना सङ्क्रमण पुष्टि भएपछि नगरपालिकाले भदौ ३ गते राति १० बजेदेखि भदौ १० गते राति १२ बजेसम्म लकडाउन गर्ने निर्णय गरेको हो । समुदायस्तरमा कोरोना सङक्रमित भेटिएपछि जोखिम न्यूनीकरणका लागि लकडाउन गर्ने निर्णय गरिएको नगर प्रमुख किसान गुरुङले जानकारी दिनुभयो । गुरुङका अनुसार यस अवधिमा अत्यावश्यक सेवा, स्वास्थ्य सेवा, सरसफाई सेवा र विपद् व्यवस्थापन सेवासँग सम्बन्धित कार्यहरू सञ्चालन गर्न पाइनेछ ।

नवलपरासी (बर्दघाट सुस्ता पूर्व) प्रतिनिधि तिर्थराज डुम्रेका अनुसार समुदायमा कोभिड-१९ को सङ्क्रमण बढ्दै गएपछि जिल्ला प्रशासन कार्यालय नवलपरासी (बर्दघाट सुस्ता पूर्व)ले भदौ ३ गते राति १२ बजेदेखि भदौ ९ गते राति १२ बजेसम्म निषेधाज्ञा जारी गरेको छ । प्रमुख जिल्ला अधिकारी पिताम्बर घिमिरेले एक आदेश जारी गर्दै खुला स्थानमा भेला हुन, भीडभाड गर्न र सभा जुलूस गर्न, जात्रा महोत्सव, दैनिक नित्य पूजाबाहेकका धार्मिक गतिविधि गर्न, शैक्षिक संस्था सञ्चालन गर्न, होटल- रेष्टुरेन्ट सञ्चालन गर्न र निजी तथा सार्वजनिक यातायात सञ्चालन गर्न निषेध गर्नु भएको हो । जिल्लाको विभिन्न स्थानमा स्थानीय बासिन्दामा कोरोना सङ्क्रमण पुष्टि भएपछि तत्काल निषेधाज्ञा जारी गर्न जिल्लाका विभिन्न सरोकारवालाहरूले सुझाव दिएका थिए ।

प्रदेश ५

नवलपरासी पश्चिम प्रतिनिधि नारायण पराजुलीका अनुसार रामग्राम नगरपालिका-२ घर भएका ३८ वर्षीय पुरुषको ललितपुरको पाटन अस्पतालमा उपचारका क्रममा भदौ २ गते मृत्यु भएको छ । उनलाई कोरोना पोजेटिभ देखिएपछि भैरहवाबाट कोरोना विशेष अस्पताल बुटवल लगिएको थियो । बुटवलको कोरोना अस्पतालमा एक दिन भर्ना भएर उपचार गराइरहेका उनलाई साउन ३० गते थप उपचारका लागि पाटन अस्पताल लगिएको थियो । मधेस आन्दोलनबाट राजनीतिमा प्रवेश गरेका उनी नेपाली कांग्रेसको राजनीतिमा सक्रिय थिए ।

रुपन्देही प्रतिनिधि रीमा बिसीका अनुसार कोरोना सङ्क्रमणको जोखिम समुदायस्तरमा बढ्दै गएपछि जिल्ला प्रशासन कार्यालय रुपन्देहीले भदौ २ गतेदेखि भदौ ७ गते राति १२ बजेसम्मका लागि लकडाउन गर्ने निर्णय गरेको छ । जिल्ला सङ्कट व्यवस्थापन केन्द्रको भदौ २ गते बसेको बैठकले लकडाउन गर्ने निर्णय गरेको प्रमुख जिल्ला अधिकारी महादेव पन्थले बताउनु भयो ।

अनलाइन डेस्क