कोरोना भाइरसको सङ्क्रमणसम्बन्धी दैनिक अपडेट (असार २९ गते)

  ०७७ असार २९ गते

नेपालमा कोरोना सङ्क्रमण पुष्टि भएकामध्ये ६०.७ प्रतिशत सङ्क्रमित उपचार पछि निको भई घर फर्किएका छन् । स्वास्थ्य तथा जनसङ्ख्या मन्त्रालयले असार २९ गते जारी गरेको प्रतिवेदनका अनुसार १० हजार २ सय ९४ जना सङ्क्रमित निको भएका हुन् । नेपालमा १६ हजार ९ सय ४५ जनामा कोरोना सङ्क्रमण पुष्टि भएको छ । असार २९ गते १ सय ४४ जनामा सङ्क्रमण देखिएको हो । सङ्क्रमण पुष्टि भएकामध्ये ६ हजार ६ सय १३ जनाको उपचार भइरहेको छ । ३८ जनाको मृत्यु भएको पनि मन्त्रालयले जनाएको छ । मन्त्रालयका अनुसार मृत्यु हुनेहरू २४ जिल्लाका छन् ।

गण्डकी प्रदेश

इन्सेक गण्डकी प्रदेश कार्यालय, पोखराले असार २९ गते पोखरा महानगरपालिका–३२ का वडा अध्यक्ष अक्कलबहादुर कार्कीलाई स्वास्थ्य सामग्री हस्तान्तरण गरेको छ ।

बागलुङ प्रतिनिधि सिर्जना पन्तका अनुसार गलकोट नगरपालिका–५ को कार्यालयमा स्थानीयले तालाबन्दी गरेका छन् । वडा कार्यालयले कोरोना नियन्त्रण गर्न ध्यान नदिएको र विदेशबाट आएकालाई व्यवस्थापन नगरेको भन्दै स्थानीयले तालाबन्दी गरेका हुन् । वडा अध्यक्षलगायत अन्य पदाधिकारीले वडावासीको स्वास्थ्यमाथि खेलवाड गरेको भन्दै वडा कार्यालयमा तालाबन्दी गरेको स्थानीय विपिन श्रीसले बताउनुभयो । वडा कार्यालयले विदेशबाट आएका नागरिकहरूको व्यवस्थापन नगरेको र उनीहरूमा कोरोना सङ्क्रमण देखिएपछि स्थानीय आक्रोशित हुँदै वडा कार्यालयमा तालाबन्दी गरेको श्रीसको भनाइ छ । वडा अध्यक्ष नारायणध्वज मल्लले तीन दिन अगाडि एक जना युवती दुवईबाट आएर होम क्वारेण्टाइनमा बसेको र उनमा कोरोना सङ्क्रमण पुष्टि भएपछि स्थानीय आक्रोशित भएको बताउनुभयो ।

सुदूरपश्चिम प्रदेश

बैतडी प्रतिनिधि नरी बडुका अनुसार इन्सेक सुदूरपश्चिम प्रदेश कार्यालय, धनगढीले असार २९ गते पाटन नगरपालिकास्तरीय मानव अधिकार समूहमार्फत स्वास्थ्य सामग्रीहरू हस्तान्तरण गरेको छ । मानव अधिकार समूहका अध्यक्ष कृष्णसिंह महरालगायतको समूहले पाटन नगरपालिकाका प्रमुख केशवबहादुर चन्द र उपप्रमुख सरस्वती कोलीलाई मेडिकल मास्क, साबुन, डिस्पोजल ग्लोब्स र सेनिटाइजर हस्तान्तरण गरेको इन्सेकका कार्यक्रम सहजकर्ता निशा भट्टले बताउनु भयो । इन्सेकले सहयोग गरेको स्वास्थ्य सामग्रीले नगरपालिकालाई राहत मिलेको र मानव अधिकार संरक्षण र संवद्र्धनमा आगामी दिनमा पनि इन्सेकसँग नगरपालिकाले सहकार्य गर्ने नगरप्रमुख केशवबहादुर चन्दले बताउनु भयो ।


अनलाइन डेस्क