कोरोना भाइरसको सङ्क्रमणसम्बन्धी दैनिक अपडेट (साउन ७ गते)

  ०७७ साउन ७ गते

नेपालमा कोरोना सङ्क्रमितको सङ्ख्या १८ हजार ९४ पुगेको छ । स्वास्थ्य तथा जनसङ्ख्या मन्त्रालयले साउन ७ गते जारी गरेको प्रतिवेदनका अनुसार सङ्क्रमितमध्ये १२ हजार ६ सय ८४ जना अस्पतालबाट डिस्चार्ज भएका छन् । ५ हजार ३ सय ६८ जनाको उपचार भइरहेको छ । सङ्क्रमितमध्ये निको दर ७०.१ प्रतिशत रहेको मन्त्रालयले जारी गरेको स्थिति प्रतिवेदनमा उल्लेख छ । साउन ७ गतेसम्म ४२ जनाको मृत्यु भएको पनि मन्त्रालयले जनाएको छ । मन्त्रालयले २४ घण्टामा २ सय ७ जना निको भएका र १ सय जनामा कोरोना देखिएको जनाएको छ । मन्त्रालयका अनुसार गत २४ घण्टामा ३ हजार ७ सय ७९ जनाको स्वाब परीक्षण गरिएको थियो ।

प्रदेश १

मोरङ प्रतिनिधि नेत्रप्रसाद अधिकारीका अनुसार कोरोना सङ्क्रमण पुष्टि भएका ५० वर्षीय एक व्यक्ति साउन ७ गते सम्पर्कविहीन भएका छन् । विराट नर्सिङ होम एवम् विराटनगर अस्पतालमा स्वाब सङ्कलन गरेर परीक्षणका लागि कोशी अस्पतालमा पठाइएका व्यक्ति सम्पर्कविहीन भएका हुन् । साउन ६ गते गरिएको परीक्षणबाट उनमा कोरोना सङ्क्रमण पुष्टि भएको थियो । विराटनगर महानगरपालिकाले खोजी थालेपनि सङ्क्रमित व्यक्तिको पहिचान हुन नसकेको र फेला पार्न नसकेको विराटनगर महानगरपालिकाका प्रवक्ता उद्धव अर्यालले इन्सेक प्रतिनिधिलाई बताउनुभयो । स्वाब सङ्कलन गर्ने क्रममा ती पुरूषको स्थायी ठेगाना लेखिएको थिएन । ठेगानामा विराटनगर मात्रै उल्लेख गरिएको छ । पूरै ठेगाना नटिपेका कारण कोरोना पोजेटिभ देखिएका उनलाई फेला पार्न नसकिएको प्रवक्ता अर्यालले बताउनुभयो ।

एक जना प्रहरीलाई कोरोना भाइरसको सङ्क्रमण पुष्टि भएपछि विराटनगरस्थित प्रदेश १ प्रदेश प्रहरी कार्यालय सील गरिएको छ । सङ्क्रमण पुष्टि भएका प्रहरीलाई केही दिन अघि ज्वरो र हाच्छ्यूँ आउने लक्षण देखिएपछि होम क्वारेण्टाइनमा बस्दै आएका थिए । कोशी अस्पतालको प्रयोगशालामा गरिएको परीक्षणमा साउन ७ गते कोरोना भाइरसको सङ्क्रमण पुष्टि भएको प्रदेश प्रहरी कार्यालयका प्रवक्ता एसपी दीपक पोखरेलले बताउनुभयो । कोरोना पुष्टि भएपछि उनलाई विराटनगरस्थित कोशी अस्पतालको कोभिड–१९ उपचार केन्द्रमा भर्ना गरिएको एसपी पोखरेलले बताउनुभयो ।

प्रदेश २

प्रदेश २ मा साउन ७ गते सम्ममा जम्मा ४ हजार ७ सय २० जना कोरोना सङ्क्रमित पुगेकोमा २ हजार ८ सय ३५ जना उपचारपछि निको भएर घर फर्किएका छन् । प्रदेशमा हाल १ हजार ८ सय ७८ जना सङ्क्रमितहरू उपचाररत छन् । साउन ७ गते सम्ममा ७ जना सङ्क्रमितको मृत्यु भएको नेपाल सरकार स्वास्थ्य तथा जनसङ्ख्या मन्त्रालयले जनाएको छ ।

सप्तरी प्रतिनिधि मनोहरकुमार पोखरेलका अनुसार राजविराजमा समुदायमा कोरोना सङ्क्रमण फैलिए पछि सप्तरीका प्रमुख जिल्ला अधिकारी शङ्करहरी आचार्यको अध्यक्षतामा साउन ७ गते बसेको जिल्ला सुरक्षा समिति सप्तरीको बैठकले साउन ८ गते बिहान ५ बजेदेखि अर्को आदेश नभएसम्मका लागि निषेधाज्ञा जारी गर्ने निर्णय गरेको छ । स्थानीय प्रशासन ऐन २०२८ को दफा ६ (३) र सङ्क्रामक रोग ऐन २०२० को दफा २ बमोजिम राजविराज नगरपालिका क्षेत्रभित्र अनावश्यक हिँडडुल, आवतजावत नगर्न, नगराउन जिल्ला सुरक्षा समितिले निर्णय गरेको जिल्ला प्रशासन कार्यालयका प्रवक्ता एवम् प्रशासकीय अधिकृत आनन्द ठाकुरले फोन गरेर इन्सेक प्रतिनिधिलाई जानकारी दिनु भयो । प्रवक्ता ठाकुरले औषधि पसल, खाद्यान्न, फलफूल तथा तरकारी, अस्पताल तथा स्वास्थ्य सेवा केन्द्र, मालसामान ओसार पसार गर्ने र निर्माण कार्यमा प्रयोग हुने ढुवानीका यातायात, सरकारी छापाखाना, सञ्चार सेवा, बैङ्किङ् सेवा, आन्तरिक सुरक्षा कार्य, खानेपानी सञ्चालन तथा वितरण, पेट्रोलियम पदार्थको ढुवानी भण्डार र वितरण, फोहोरमैला सङ्कलन तथा ढुवानी, विद्युतिय सेवा, कृषिजन्य कार्य, कृषि तथा पशुजन्य उत्पादन ढुवानीमा प्रयोग हुने साधन, वर्कशप जस्ता अत्यावश्यक सेवाहरू बाहेकको सेवा/स्थलहरूमा अनावश्यक आवतजावतमा निषेधाज्ञा लगाइएको बताउनु भयो । उपरोक्त अत्यावश्यक कामहरूसमेत तोकिए बमोजिमको स्वास्थ्य सुरक्षा सतर्कताको मापदण्डहरूको पूर्ण पालना गरी गर्न, गराउन निषेधाज्ञा जारी गरिएको बताउँदै ठाकुरले आदेशको उल्लङ्घन गर्नेलाई कानुन बमोजिम कारवाही गरिने बताउनु भयो ।

रौतहट प्रतिनिधि कोपिला तिमल्सिनाका अनुसार रौतहटको सिमा नाका साउन ३२ गतेसम्म बन्द रहने भएको छ । मुलुकभर चैत ११ गतेदेखि लगाइएको लकडाउन नेपाल सरकारले साउन ७ गतेदेखि अन्त्य भएको घोषणा गरेको भएतापनि सिमा नाका भने साउन ३२ गतेसम्म बन्द रहने जनाएको छ । माल–सामान ढुवानीको लागि भने सिमा खुला नै रहने जनाइएको छ । रौतहटका अधिकांश व्यावसायीहरूले बरगनियाबाट विभिन्न सामग्रीहरू ल्याउने गरेका थिए । लकडाउनसँगै सिमा नाका बन्द भएपछि रौतहटका व्यवसायीहरू भारतीय बजार बरगनिया आवत जावतमा समेत बन्द हुँदै आएको छ । कोरोना भाइरसको अन्त्य नभएकोले तत्काल भारत प्रवेश नगर्न चन्द्रपुर नगरपालिका–६ का वडाअध्यक्ष खड्गबहादुर कुसवाहाले सुझाव दिनु भयो । तत्काल आम नागरिक सचेत रहनुपर्ने देखिएको र आवश्यकता भन्दा बढी बाहिर नहिँड्न, सिमा नाका पारी नजान र यदि नाकाबाट आएको जानकारी भएमा तुरुन्त क्वारेण्टाइनमा राख्ने जिल्ला प्रशासन कार्यालय रौतहटका प्रशासकीय अधिकृत किरणनिधि तिवारीले बताउनु भयो ।


अनलाइन डेस्क