कोरोना भाइरसको सङ्क्रमणसम्बन्धी दैनिक अपडेट (साउन २४ गते)

  ०७७ साउन २४ गते

साउन २४ गते ३ सय ७८ जनामा कोरोना पुष्टि भएसँगै कोरोना सङ्क्रमितको सङ्ख्या २२ हजार ५ सय ९२ जना पुगेको छ । स्वास्थ्य तथा जनसङ्ख्या मन्त्रालयले साउन २४ गते जारी गरेको प्रतिवेदन अनुसार सङ्क्रमितमध्ये १६ हजार ३ सय १३ जना अस्पतालबाट डिस्चार्ज भएका छन् । साउन २४ गते ४ सय ९९ जना डिस्चार्ज भएका छन् भने निको दर ७१.२ प्रतिशत रहेको मन्त्रालयले जनाएको छ । सङ्क्रमितमध्ये ७३ जनाको मृत्यु भएको पनि मन्त्रालयले जनाएको छ । ६ हजार २ सय ६ जनाको उपचार भइरहेको छ । गत २४ घण्टामा ७ हजार ७ सय ८८ जनाको स्वाब परीक्षण गरिएको मन्त्रालयले जारी गरेको स्थिति प्रतिवेदनमा उल्लेख छ ।

प्रदेश १

सुनसरी प्रतिनिधि जयकृष्ण यादवका अनुसार इटहरी अस्पतालले होम आइसोलेशनमा बसेका कोरोना भाइरस सङ्क्रमितहरूलाई साउन २४ गतेदेखि भिडियोकल मार्फत सेवा दिन थालेको छ । धरान, इटहरी र इनरुवामा रहेका कोरोना अस्पतालकाको २ सय ओटा आइसोलेशन बेड भरिएपछि घरमै राखिएका सङ्क्रमितहरूलाई भिडियो कल मार्फत स्वास्थ्य सेवा प्रदान थालिएको इटहरी अस्पतालका निमित्त मेडिकल सुपरीटेन्डेण्ट डा. मनिषकुमार शर्माले बताउनु भयो । इटहरीमा ६ जना होम आइसोलेशनमा बसेका छन् । सङ्क्रमण पुष्टि भएपनि लक्षण नदेखिएकाहरूलाई आवश्यक मापदण्ड पूरा गरेर घरमै बस्न मिल्ने व्यवस्था गरिएको छ ।

प्रदेश २

प्रदेश २ मा साउन २४ गतेसम्ममा जम्मा ६ हजार २ सय ८६ जना कोरोना सङ्क्रमित पुगेकोमा ३ हजार ३ सय २६ जना उपचारपछि निको भएर घर फर्किएका छन् । प्रदेशमा हाल २ हजार ९ सय २९ जना सङ्क्रमितहरू उपचाररत छन् । साउन २४ गते सम्ममा ३१ जना सङ्क्रमितको मृत्यु भएको नेपाल सरकार स्वास्थ्य तथा जनसङ्ख्या मन्त्रालयले जनाएको छ ।

सप्तरी प्रतिनिधि मनोहरकुमार पोखरेलका अनुसार जिल्ला सङ्कट व्यवस्थापन केन्द्र सप्तरीले जिल्लाको एक मात्र सरकारी अस्पताल गजेन्द्रनारायण सिंह अस्पतालका चिकित्सक, स्वास्थ्यकर्मीलाई निजी क्लिनिक, निजी अस्पताल वा बाहिरका स्थानमा बिरामी जाँच गर्न साउन २४ गतेदेखि रोक लगाएको छ । आकस्मिक कक्षमा कार्यरत सात जना अहेब सङ्क्रमित भई आइसोलेशनमा र शङ्कास्पद तीन चिकित्सकसहित २७ जना स्वास्थ्यकर्मी, कर्मचारी होम क्वारेण्टाइनमा राख्नु परेपछि अस्पतालका स्वास्थ्यर्मीलाई बाहिरको क्लिनिक वा अन्य कुनै पनि स्थानमा बिरामी जाँच लगायतका काममा रोक लगाउने निर्णय गर्दै सङ्कट व्यवस्थापन केन्द्रले अस्पताललाई निर्देशन पठाएको जिल्ला प्रशासन कार्यालयका प्रशासकीय अधिकृत एवम् सूचना अधिकारी आनन्द ठाकुरले बताउनु भयो । सर्जरी र ओपिडी सेवासहित अन्य सेवासमेत प्रभावित हुन थालेपछि आकस्मिक सेवालाई सुचारू राख्न र कोरोनाको सङ्क्रमण एक ठाउँबाट अर्को ठाउँमा नफैलियोस् भनेर विशेष सजगता अपनाउन यस्तो निर्णय गरिएको सिडिओ शङ्करहरी आचार्यले बताउनु भयो । स्वास्थ्यकर्मीको अभाव र निसङ्क्रमण गर्नु पर्ने भएकाले साउन २३ गते बिहानदेखि बन्द रहेको अस्पतालको आकस्मिक सेवा राति ८ बजेपछि सुचारू गरिएको अस्पतालले सूचना जारी गरी जनाएको छ ।

यसैगरी, बढदो सङ्क्रमणको कारण १ सय ७८ बेड भएको राजविराजस्थित आइसोलेशन केन्द्रमा सङ्क्रमितहरूलाई व्यवस्थापन गर्न समस्या भएपछि स्थानीय तहमा समेत आइसोलेशन केन्द्र सञ्चालन गर्न पहल गर्ने निर्णय भएअनुसार राजनीतिक दलसँग केन्द्रको बैठकले आग्रह गरेको छ । लक्षण नेदेखिएका कोरोना सङ्क्रमितहरूलाई स्थानीय तहको आइसोलेशन केन्द्रमा र लक्षण देखिएका सङ्क्रमितलाई जिल्लास्तरीय आइसोलेशन केन्द्रमा राख्ने गरी व्यवस्थापन गर्न सबै स्थानीय तहमा आइसोलेशन केन्द्र स्थापना एवम् सञ्चालन गर्ने निर्णय भएको ठाकुरले बताउनु भयो ।

सिरहा जिल्ला प्रतिनिधि दुर्गा परियारका अनुसार जिल्लाका लहान नगरपालिका र गोलबजार नगरपालिकाले साउन २३ गते राति १२ बजेदेखि लागु हुने गरी साउन ३२ गतेसम्मका लागि नगरपालिकालाई लकडाउन गर्ने निर्णय गरेको छ । लहान नगरपालिका-८ बस्ने एक स्वास्थ्यकर्मीमा कोरोना सङ्क्रमण पोजेटिभ देखिएको थियो भने गोलबजार नगरपालिकामा पनि होटल सञ्चालन गर्दै आएका समुदायका व्यक्तिमा सङ्क्रमण देखिएको कारण दुवै नगरपालिकाहरूले जिल्ला प्रशासन कार्यालयको अनुमतिमा सूचना जारी गरी लकडाउन घोषणा गरेको लहान नगरपालिका प्रमुख प्रशासकीय अधिकृत खेमनन्द भुषालले बताउनु भयो । इलाका प्रहरी कार्यालय लहानका डिएसपी शरतकुमार थापा क्षेत्रीका अनुसार लहान नगरभित्र प्रहरी परिचालन गरी अति आवश्यक काम बाहेकका व्यक्ति, पसल तथा सवारी साधन बन्द गरे पनि बिहान ८ बजेदेखि ११ बजे सम्मका लागि लकडाउन खुकुलो गरेको बताउनु भयो ।

लहान नपा अवस्थित ग्लोबल आई.एमई बैङ्कमा कार्यरत ३० वर्षीय पुरुष कर्मचारीमा साउन २४ गते कोरोना भाइरस पोजेटिभ पुष्टि भएको स्वास्थ्य कार्यालयका प्रमुख कृष्णदेव यादवले बताउनु भयो । ती पुरुषमा ज्वरोको लक्षण देखिएपछि जनकपुरस्थित प्रादेशिक अस्पताल जनकपुरमा साउन २० गते कोरोना परीक्षण गरी साउन २४ गते कोरोना पुष्टि भएको साथै उनलाई प्रादेशिक अस्पतालको आइशोलेसन अस्पतालमा उपचारको लागि भर्ना गरिएको प्रमुख यादवले बताउनु भयो । ग्लोबल आई.एमई. बैङ्क लहान शाखालाई साउन २४ गते शिल गरी २२ जना कर्मचारीहरूलाई होटल तथा होम क्वारेन्टाइनमा राखिएको लहान स्वास्थ्य शाखाका प्रमुख रामसुन्दर यादवले बताउनु भयो ।

बारा प्रतिनिधि भोलानाथ पौडेलका अनुसार निजगढ नगरपालिकामा कोभिड-१९ रोकथाम, नियन्त्रण, अनुगमन र समन्वय समितिको साउन २३ गते बसेको बैठकले समुदायस्तरमा कोरोना फैलिएको ठहर गर्दै सङ्क्रमित क्षेत्रबाट अनावश्यक रूपमा हुँदै आएको आवागमनमा साउन २४ गतेदेखि रोक लगाउने निर्णय गरेको नगर प्रमुख सुरेश खनालले बताउनु भयो । पूर्वपश्चिम राजमार्गस्थित पूर्वमा भमरा र पश्चिममा बकैया खोला पुलमा सुरक्षाकर्मी र स्वास्थ्यकर्मीको कोरोना स्क्यानिङ्ग चेक पोष्ट साउन २४ गते स्थापना गरी अतिआवश्यक यातायात र व्यक्तिहरूले वडा कार्यालयको सिफारिस पत्र देखाएपछि मात्र प्रवेश गर्न दिने व्यवस्था मिलाएको खनालले बताउनु भयो ।

बागमती प्रदेश

यस प्रदेशमा साउन २४ गते काठमाडौँमा ५६, काभ्रेमा सात, रामेछापमा पाँच, ललितपुर र भक्तपुरमा तीन/तीन, धादिङ, चितवन, सिन्धुली र दोलखामा दुई/दुई र नुवाकोटमा एक जना गरी ८३ जनामा कोरोना भाइरस सङ्क्रमणको पुष्टि भएसँगै सङ्क्रमित हुनेको सङ्ख्या १ हजार ६ सय ३७ जना पुगेको छ । जसमध्ये ६ सय जना उपचारपछि घर फर्किएका छन् भने १ हजार २६ जनाको विभिन्न अस्पताल तथा आइसोलेशन सेन्टरमा उपचार भइरहेको छ । हालसम्म यस प्रदेशमा कोरोना भाइरस सङ्क्रमणको कारण ११ जनाको मृत्यु भएको प्रदेशको सामाजिक विकास मन्त्रालयका प्रवक्ता डा. पुरुषोतमराज सेढाईंले बताउनु भयो ।

प्रदेश ५

बाँकेमा कोरोना सङ्क्रमण बढ्दै गएपछि जिल्ला प्रशासन कार्यालयमा साउन २३ गते बसेको सङ्कट व्यवस्थापन समितिको बैठकले निषेधाज्ञाको अवधि साउन २७ गतेसम्म थप गर्नुको साथै सुर्खेत रोडलाई बाहिर पारेर पुष्पलाल चौकदेखि गणेशमान चौकसम्म, चार बाहिनी चौक, पिपल चौतारा हुदै बाँके गाउँसम्म, बाँके गाउँदेखि रिङरोड, फुलटेक्रास्थित नेपाली सेनाको व्यारेक हुँदै नहरपुरुवा चौकसम्म, नहरपुरुवादेखि बसपार्क रोड हुँदै पुष्पलाल चौकसम्मको चार किल्ला भित्रको क्षेत्र सिल गरिएको जिल्ला प्रशासन कार्यालयका सहायक प्रमुख जिल्ला अधिकारी दिर्घराज उपाध्यायले जनाएको छ ।

बाँके जिल्ला प्रतिनिधि स्मृति देवकोटाका अनुसार नेपालगञ्ज मेडिकल कलेज शिक्षण अस्पताल कोहलपुरमा चिकित्सक र नर्सलाई कोरोना भाइरस पुष्टि भएपछि अस्पतालको प्रसूति गृह साउन २४ गतेदेखि सिल गरिएको छ । साउन २३ गते गरिएको कोरोना परीक्षणमा सङ्क्रमण पुष्टि भएकामध्ये ६ जना मेडिकल कलेजको प्रसूति गृहमा कार्यरत स्वास्थ्यकर्मी रहेको अस्पतालको सहायक निर्देशक डा. दिनेश श्रेष्ठले बताउनु भयो ।

प्रसुती गृह सिल भएकाले बिरामीलाई नेपालगञ्जको भेरी अस्पताल र मेडिकल कलेजमा रिफर गर्नुपरेको बताउनु भयो ।

कर्णाली प्रदेश

सुर्खेत प्रतिनिधि दुर्गा थापाका अनुसार जिल्लामा कोरोना सङ्क्रमणलाई नियन्त्रण तथा रोकथाम गर्न जिल्ला विपद् व्यवस्थापन केन्द्र सुर्खेतले अत्यावश्यक बाहेकको सेवा बन्द गर्ने निर्णय गरेको छ । प्रमुख जिल्ला अधिकारी हिरालाल रेग्मीको अध्यक्षतामा साउन २२ गते बसेको बैठकले अर्को सूचना जारी नहुँदासम्मका लागि यस्तो सेवा बन्द गर्ने निर्णय गरेको हो । कोरोना सङ्क्रमणको दर नघटेको कारण कोरोनाको जोखिम रहिरहेकाले साउन २५ गतेदेखि लागु हुनेगरी नागरिकता, राहदानी सिफारिस, सङ्घसंस्था दर्ता तथा नवीकरण सँगै अन्य सेवा बन्द गरिने प्रमुख जिल्ला अधिकारी रेग्मीले बताउनु भयो ।


अनलाइन डेस्क