कोरोना भाइरसको सङ्क्रमणसम्बन्धी दैनिक अपडेट (साउन ७ गते)
नेपालमा कोरोना सङ्क्रमितको सङ्ख्या १८ हजार ९४ पुगेको छ । स्वास्थ्य तथा जनसङ्ख्या मन्त्रालयले साउन ७ गते जारी गरेको प्रतिवेदनका अनुसार सङ्क्रमितमध्ये १२ हजार ६ सय ८४ जना अस्पतालबाट डिस्चार्ज भएका छन् । ५ हजार ३ सय ६८ जनाको उपचार भइरहेको छ । सङ्क्रमितमध्ये निको दर ७०.१ प्रतिशत रहेको मन्त्रालयले जारी गरेको स्थिति प्रतिवेदनमा उल्लेख छ । साउन ७ गतेसम्म ४२ जनाको मृत्यु भएको पनि मन्त्रालयले जनाएको छ । मन्त्रालयले २४ घण्टामा २ सय ७ जना निको भएका र १ सय जनामा कोरोना देखिएको जनाएको छ । मन्त्रालयका अनुसार गत २४ घण्टामा ३ हजार ७ सय ७९ जनाको स्वाब परीक्षण गरिएको थियो ।
प्रदेश १
मोरङ प्रतिनिधि नेत्रप्रसाद अधिकारीका अनुसार कोरोना सङ्क्रमण पुष्टि भएका ५० वर्षीय एक व्यक्ति साउन ७ गते सम्पर्कविहीन भएका छन् । विराट नर्सिङ होम एवम् विराटनगर अस्पतालमा स्वाब सङ्कलन गरेर परीक्षणका लागि कोशी अस्पतालमा पठाइएका व्यक्ति सम्पर्कविहीन भएका हुन् । साउन ६ गते गरिएको परीक्षणबाट उनमा कोरोना सङ्क्रमण पुष्टि भएको थियो । विराटनगर महानगरपालिकाले खोजी थालेपनि सङ्क्रमित व्यक्तिको पहिचान हुन नसकेको र फेला पार्न नसकेको विराटनगर महानगरपालिकाका प्रवक्ता उद्धव अर्यालले इन्सेक प्रतिनिधिलाई बताउनुभयो । स्वाब सङ्कलन गर्ने क्रममा ती पुरूषको स्थायी ठेगाना लेखिएको थिएन । ठेगानामा विराटनगर मात्रै उल्लेख गरिएको छ । पूरै ठेगाना नटिपेका कारण कोरोना पोजेटिभ देखिएका उनलाई फेला पार्न नसकिएको प्रवक्ता अर्यालले बताउनुभयो ।
एक जना प्रहरीलाई कोरोना भाइरसको सङ्क्रमण पुष्टि भएपछि विराटनगरस्थित प्रदेश १ प्रदेश प्रहरी कार्यालय सील गरिएको छ । सङ्क्रमण पुष्टि भएका प्रहरीलाई केही दिन अघि ज्वरो र हाच्छ्यूँ आउने लक्षण देखिएपछि होम क्वारेण्टाइनमा बस्दै आएका थिए । कोशी अस्पतालको प्रयोगशालामा गरिएको परीक्षणमा साउन ७ गते कोरोना भाइरसको सङ्क्रमण पुष्टि भएको प्रदेश प्रहरी कार्यालयका प्रवक्ता एसपी दीपक पोखरेलले बताउनुभयो । कोरोना पुष्टि भएपछि उनलाई विराटनगरस्थित कोशी अस्पतालको कोभिड–१९ उपचार केन्द्रमा भर्ना गरिएको एसपी पोखरेलले बताउनुभयो ।
प्रदेश २
प्रदेश २ मा साउन ७ गते सम्ममा जम्मा ४ हजार ७ सय २० जना कोरोना सङ्क्रमित पुगेकोमा २ हजार ८ सय ३५ जना उपचारपछि निको भएर घर फर्किएका छन् । प्रदेशमा हाल १ हजार ८ सय ७८ जना सङ्क्रमितहरू उपचाररत छन् । साउन ७ गते सम्ममा ७ जना सङ्क्रमितको मृत्यु भएको नेपाल सरकार स्वास्थ्य तथा जनसङ्ख्या मन्त्रालयले जनाएको छ ।
सप्तरी प्रतिनिधि मनोहरकुमार पोखरेलका अनुसार राजविराजमा समुदायमा कोरोना सङ्क्रमण फैलिए पछि सप्तरीका प्रमुख जिल्ला अधिकारी शङ्करहरी आचार्यको अध्यक्षतामा साउन ७ गते बसेको जिल्ला सुरक्षा समिति सप्तरीको बैठकले साउन ८ गते बिहान ५ बजेदेखि अर्को आदेश नभएसम्मका लागि निषेधाज्ञा जारी गर्ने निर्णय गरेको छ । स्थानीय प्रशासन ऐन २०२८ को दफा ६ (३) र सङ्क्रामक रोग ऐन २०२० को दफा २ बमोजिम राजविराज नगरपालिका क्षेत्रभित्र अनावश्यक हिँडडुल, आवतजावत नगर्न, नगराउन जिल्ला सुरक्षा समितिले निर्णय गरेको जिल्ला प्रशासन कार्यालयका प्रवक्ता एवम् प्रशासकीय अधिकृत आनन्द ठाकुरले फोन गरेर इन्सेक प्रतिनिधिलाई जानकारी दिनु भयो । प्रवक्ता ठाकुरले औषधि पसल, खाद्यान्न, फलफूल तथा तरकारी, अस्पताल तथा स्वास्थ्य सेवा केन्द्र, मालसामान ओसार पसार गर्ने र निर्माण कार्यमा प्रयोग हुने ढुवानीका यातायात, सरकारी छापाखाना, सञ्चार सेवा, बैङ्किङ् सेवा, आन्तरिक सुरक्षा कार्य, खानेपानी सञ्चालन तथा वितरण, पेट्रोलियम पदार्थको ढुवानी भण्डार र वितरण, फोहोरमैला सङ्कलन तथा ढुवानी, विद्युतिय सेवा, कृषिजन्य कार्य, कृषि तथा पशुजन्य उत्पादन ढुवानीमा प्रयोग हुने साधन, वर्कशप जस्ता अत्यावश्यक सेवाहरू बाहेकको सेवा स्थलहरूमा अनावश्यक आवतजावतमा निषेधाज्ञा लगाइएको बताउनु भयो । उपरोक्त अत्यावश्यक कामहरूसमेत तोकिए बमोजिमको स्वास्थ्य सुरक्षा सतर्कताको मापदण्डहरूको पूर्ण पालना गरी गर्न, गराउन निषेधाज्ञा जारी गरिएको बताउँदै ठाकुरले आदेशको उल्लङ्घन गर्नेलाई कानुन बमोजिम कारवाही गरिने बताउनु भयो ।
रौतहट प्रतिनिधि कोपिला तिमल्सिनाका अनुसार रौतहटको सिमा नाका साउन ३२ गतेसम्म बन्द रहने भएको छ । मुलुकभर चैत ११ गतेदेखि लगाइएको लकडाउन नेपाल सरकारले साउन ७ गतेदेखि अन्त्य भएको घोषणा गरेको भएतापनि सिमा नाका भने साउन ३२ गतेसम्म बन्द रहने जनाएको छ । माल–सामान ढुवानीको लागि भने सिमा खुला नै रहने जनाइएको छ । रौतहटका अधिकांश व्यावसायीहरूले बरगनियाबाट विभिन्न सामग्रीहरू ल्याउने गरेका थिए । लकडाउनसँगै सिमा नाका बन्द भएपछि रौतहटका व्यवसायीहरू भारतीय बजार बरगनिया आवत जावतमा समेत बन्द हँुदै आएको छ । कोरोना भाइरसको अन्त्य नभएकोले तत्काल भारत प्रवेश नगर्न चन्द्रपुर नगरपालिका–६ का वडाअध्यक्ष खड्गबहादुर कुसवाहाले सुझाव दिनु भयो । तत्काल आम नागरिक सचेत रहनुपर्ने देखिएको र आवश्यकता भन्दा बढी बाहिर नहिँड्न, सिमा नाका पारी नजान र यदि नाकाबाट आएको जानकारी भएमा तुरुन्त क्वारेण्टाइनमा राख्ने जिल्ला प्रशासन कार्यालय रौतहटका प्रशासकीय अधिकृत किरणनिधि तिवारीले बताउनु भयो ।
अनलाइन डेस्क
सम्बन्धित समाचारहरू
बलात्कार घटनाका आरोपितविरुद्ध उजुरी दर्ता
सुस्त मनस्थितिकी १७ वर्षीया बालिकालाई बलात्कार गरेको आरोपमा तिलाठी कोइलाडी गाउँपालिका–५ कोइलाडी बर्साइनका ४६ वर्षीय बंकर भनिने मौधकर खंगविरुद्ध प्रहरीले चैत १७ गते उजुरी दर्ता गरेको छ । पीडितका बुबाले…
बलात्कार घटनाको कसुरमा सात वर्ष कैद
१९ वर्षीया युवतीलाई बलात्कार गरेको कसुरमा हनुमाननगर कंकालिनी नगरपालिका–१ कोशी ब्यारेजका २३ वर्षीय अनीष कुमार मण्डललाई चैत १५ गते ७ वर्ष कैद सजाय भएको छ । जिल्ला न्यायाधीश लालकाजी श्रेष्ठको…
नेपाल मानव अधिकार वर्ष पुस्तक परिमार्जनसहित इतिहासको निरन्तरता विषयक कार्यशाला सम्पन्न
इन्सेकले सन् १९९२ देखि हरेक वर्ष प्रकाशन गर्दै आएको नेपाल मानव अधिकार वर्ष पुस्तकको आगामी वर्षदेखि केही परिमार्जित ढाँचामा ल्याउने उद्देश्यले काभ्रेको धुलिखेलमा आयोजित दुई दिने कार्यशाला सम्पन्न भएको छ…
बलात्कार गरेको कसुरमा कैद सजायको फैसला
नौ वर्षीया बालिकालाई बलात्कार गरेको कसुरमा जिल्ला अदालतले आठराई त्रिवेणी गाउँपालिका– १ का १०, ११ र १२ वर्षीय बालकलाई चैत १६ गते कैद सजायको फैसला सुनाएको छ । जिल्ला अदालतका…
सङ्क्रमणकालीन न्यायसम्बन्धी विधेयक पीडितमैत्री बनाउन माग गर्दै धर्ना
द्वन्द्वपीडित समाजले चैत १७ गते पोखरामा सङ्क्रमणकालीन न्यायसम्बन्धी विधेयक पीडितमैत्री बनाउन माग गर्दै धर्ना विरोध प्रदर्शन गरेका छन् । संक्रमणकालीन न्याय सम्बन्धि वेपत्ता पारिएका व्यक्तिहरूको छानविन, सत्य निरूपण तथा मेलमिलाप…