समाचारहरू

विश्वव्यापी संक्रमण तथा माहामारीका रुपमा देखापरेको कोरोना भाइरस (कोभिड–१९) को विरुद्व कर्णाली प्रदेश सरकारले उच्च सर्तकता अपनाएको छ ।

कर्णाली प्रदेशका जनतालाई कोराना भाइरस रोगको बारेमा सचेतीकरण गर्दै यसबाट सुरक्षित राख्न प्रदेश सरकारले उच्च सर्तकता अपनाएको हो ।

कोरोना भाइरसबाट यहाँका जनतालाई सुरक्षित राख्न कर्णाली प्रदेशमा रहेका पाँचओटा प्रमुख प्रवेश नाकामा हेल्थ डेस्कको स्थापना गरिसकेको छ ।

यसैगरी कर्णाली प्रदेश सरकारले प्रदेश अस्पताल सुर्खेतमा आइसोलेसन वार्डको स्थापना र जिल्ला अस्पतालहरूमा आवश्यक पर्ने जनशक्ति तीन महिनाका लागि करारमा नियुक्त गरिसकेको सामाजिक विकास मन्त्री दल रावलले बताउनु भयो ।

यस प्रदेशमा कोरोना भाइरस भित्रिन नदिन मुगुमा नौ, रुकुम पश्चिममा आठ, सल्यानमा एक, डोल्पामा दुई, जाजरकोटमा एक, जुम्लामा पाँच, सुर्खेतमा तीन, दैलेखमा दुई र हुम्लामा पाँच गरी ३६ स्थानमा हेल्थ डेस्क स्थापना गरिएको मन्त्री रावलले जानकारी दिनुभयो । कर्णाली प्रदेश सरकारले कोरोना भाइरसविरुद्व उच्च सर्तकताको नीति अघि सार्ने क्रममा ३२ जना हेल्थ असिस्टेन्ट करारमा नियुक्ति गरिसकेको र आवश्यक सर्जिकल मास्क ल्याउने तयारी गरिरहेको मन्त्रालयले जनाएको छ ।

 

दुर्गा थापा