समाचारहरू

पुस १८ गते ४ सय १९ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ६१ हजार ४ सय ३८ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ५ हजार ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ५३ हजार ८ सय ५७ जना निको भएका छन् । पुस १८ गते ७ सय ५० जना निको भएका छन् भने निको हुनेको दर ९७.१ प्रतिशत रहेको मन्त्रालयले जनाएको छ । पुस १८ गतेसम्म १ हजार ८ सय ७० जना कोभिड सङ्क्रमितको मृत्यु भएको मन्त्रालयले जनाएको छ । ५ हजार ७ सय ११ जना सक्रिय सङ्क्रमित रहेकामा २ हजार २ सय ३४ जना होम आइसोलेशनमा छन् । उपचाररतमध्ये २ सय १८ जनाको उपचार आइसीयूमा र ३६ जनाको उपचार भेण्टिलेटरमा भइरहेको छ । मन्त्रालयका अनुसार पाँचथर, सोलुखुम्बु र मुगुमा सक्रिय सङ्क्रमित छैनन् भने काठमाडौँमा ५ सयभन्दा बढी सक्रिय सङ्क्रमित छन् ।

बागमती प्रदेश

रामेछाप प्रतिनिधि नवराज पथिकका अनुसार जिल्ला अस्पताल रामेछाप र प्राथमिक स्वास्थ्य केन्द्र मन्थलीका एक/एक जना स्वास्थ्यकर्मीमा कोभिड–१९ सङ्क्रमण पोजेटिभ देखिएपछि आकस्मिक बाहेकका सेवा बन्द गरिएको छ । स्वास्थ्य कार्यालय रामेछापमा कार्यरत ३० वर्षीय पुरुष स्वास्थ्यकर्मी र प्राथमिक स्वास्थ्य केन्द्र मन्थलीमा कार्यरत २१ वर्षीया महिला स्वास्थ्यकर्मीमा पुस १७ गते कोभिड–१९ सङ्क्रमण पुष्टि भएको हो । स्वास्थ्य संस्था हरूमा आवश्यक निर्मलीकरणको काम सकेपछि सेवा सञ्चालनमा आउने जनस्वास्थ्य अधिकृत भुवन थापाद्वारा जारी विज्ञप्तिमा उल्लेख छ ।

अनलाइन डेस्क