समाचारहरू

मङ्सिर २८ गते ८ सय ३० जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ४८ हजार ४ सय २३ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ५ हजार १ सय ८१ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ३५ हजार ७ सय ३१ जना निको भएका छन् । मङ्सिर २८ गते १ हजार ५ सय जना निको भएका छन् भने निको हुनेको दर ९४.९ प्रतिशत रहेको मन्त्रालयले जनाएको छ । मङ्सिर २८ गतेसम्म १ हजार ६ सय ९८ जना कोभिड सङ्क्रमितको मृत्यु भएको मन्त्रालयले जनाएको छ । १० हजार ९ सय ९४ जनाको उपचार भइरहेको छ । ६ हजार २ सय ३२ जना होम आइसोलेशनमा छन् भने २ सय ९४ जनाको उपचार आइसीयूमा र ५२ जनाको उपचार भेण्टिलेटरमा भइरहेको छ । मन्त्रालयका अनुसार मनाङमा सक्रिय सङ्क्रमित छैनन् भने काठमाडौँ, ललितपुर र कास्कीमा ५ सयभन्दा बढी सक्रिय सङ्क्रमित छन् ।

कर्णाली प्रदेश

रूकुम पश्चिम प्रतिनिधि मनिषा केसीका अनुसार चौरजहारी नगरपालिकामा कोभिड–१९ को सङ्क्रमण देखिएपछि मङ्सिर २७ गतेदेखि पुस ३ गतेसम्म निषेधाज्ञा गरिएको निमित्त प्रमुख प्रसाशकीय अधिकृत रामबहादुर केसीले जानकारी दिनुभयो । चौरजहहारी नगरपालिकाका तीन वडामा विद्यालय सञ्चालन भएपछि सङ्क्रमण बढेकाले निषेधाज्ञा गरिएको उहाँको भनाइ छ । अधिकृत केसीका अनुसार यस अवधिमा शान्ति सुरक्षा, स्वास्थ्य, विद्युत, दुरसञ्चार, खानेपानी, दुग्धजन्य पदार्थ, औषधि पसल, खाद्यान्न, ग्याास पेट्रोलियम पदार्थलगायतका सेवाहरू भने सावधानी अपनाएर सञ्चालन गरिनेछ ।

अनलाइन डेस्क