समाचारहरू

कात्तिक ११ गते ५ सय ७० जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या १ लाख ६० हजार ४ सय पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा २ हजार ७ सय २५ जनाको स्वाब परीक्षण गरिएको मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार कात्तिक ११ गतेसम्म ८ सय ७६ जना कोभिड–१९ सङ्क्रमितको मृत्यु भएको छ । कात्तिक ११ गते थप १४ जना सङ्क्रमितको मृत्यु भएको हो । सङ्क्रमितमध्ये १ लाख १८ हजार ८ सय ४३ जना निको भएका छन् । कात्तिक ११ गते ३ हजार १ सय ६८ जना निको भएका छन् भने निको हुनेको दर ७४.१ प्रतिशत रहेको मन्त्रालयले जनाएको छ । ४० हजार ६ सय ८१ जनाको उपचार भइरहेको छ । मन्त्रालयका अनुसार ३२ हजार ४ सय ६४ जनाको उपचार होम आइसोलेशनमा भइरहेको छ । २ सय ८१ जनाको उपचार आइसीयूमा र ७१ जनाको उपचार भेण्टिलेटरमा भइरहेको छ ।

गण्डकी प्रदेश
बागलुङ प्रतिनिधि सिर्जना पन्तका अनुसार जिल्लाको काठेखोला गाउँपालिका धम्जा घर भई भारतबाट दशैँ मनाउन घर आएका एक युवामा कात्तिक १० गते कोभिड सङ्क्रमण पुष्टि भएपछि गाउँ नै सील गरिएको वडा सदस्य खुम भण्डारीले जानकारी दिनुभयो । क्षयरोग परीक्षण केन्द्रको प्रयोगशाला पोखरामा गरिएको परीक्षणमा ती युवामा कोभिड सङ्क्रमण पुष्टि भएको हो । सङ्क्रमितलाई धौलागिरी अस्पतालको आइसोलेशनमा राखिएको छ । ती युवक एक साताअघि भारतबाट सदरमुकाम बागलुङ बजार आएका थिए । बजार आएर होम क्वारेण्टिन बसेर केही दिनअघि मात्रै पीसीआर परीक्षणका लागि स्वाब दिएका थिए । तर, स्वाबको रिपोर्ट नआउँदै वडा कार्यालयलाई कुनै जानकारी नदिई आएकाले गाउँ नै सङ्क्रमणको जोखिममा परेको निश्कर्षसहित सील गरिएको काठेखोला–३ धम्जाका वडा अध्यक्ष यामबहादुर श्रीसले जानकारी दिनुभयो । स्वाब दिएपछि कुनै लक्षण नभएकाले उनी गाउँमा परिवारका साथ दशैँ मनाउन र साथीहरुसँग गाउँघरका खेलकुद लगायतका कार्यक्रममा पनि सहभागी थिए ।

अनलाइन डेस्क