समाचारहरू

वैशाख ८ गते २ हजार २ सय २० जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ८९ हजार ७ सय ८७ पुगेको स्वास्थ्य तथा जनसङ्ख्या मन्त्रालयले जनाएको छ । परीक्षण गरिएकामध्ये १२.२ प्रतिशतमा सङ्क्रमण पुष्टि भएको छ ।

वैशाख ८ गते मात्रै १९ वर्ष मुनीका २ सय ७६ जनामा कोभिड सङ्क्रमणको पुष्टी भएको छ । पछिल्लो समय सङ्क्रमित हुनेमा बालबालिकाको सङ्ख्यामा बृद्धि हुँदै आएको छ ।

गत २४ घण्टामा ८ हजार ८ सय ४४ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ७६ हजार ९३ जना निको भएका छन् ।

वैशाख ८ गते २ सय ८७ जना निको भएका छन् भने निको हुनेको दर ९५.३ प्रतिशत रहेको मन्त्रालयले जनाएको छ । वैशाख ८ गतेसम्म ३ हजार १ सय १२ जना कोभिड सङ्क्रमितको मृत्यु भएको मन्त्रालयले जनाएको छ ।

आइसोलेशनमा पुष्टि भएका केसहरूको सङ्ख्या भनी सङ्क्रमितको सङ्ख्या १० हजार ५ सय ८२ देखाइएको छ । काठमाडौँ, ललितपुर र बाँकेमा सक्रिय सङ्क्रमित ५ सयभन्दा बढी रहेका छन् ।

बागलुङ प्रतिनिधि सिर्जना पन्तका अनुसार बागलुङ नगरपालिका–१४ स्थित जनताधन माध्यमिक विद्यालयका १९ जना विद्यार्थी र दुई जना शिक्षक सहित सोही वडाका अन्य १८ जनामा कोभिड–१९ सङ्क्रमण पुष्टि भएपछि बागलुङ नगरपालिकाको  वडा नम्बर १२, १३ र १४ मा निषेधाज्ञा जारी गरिएको छ ।

यसअघि विद्यालयका दुई जना शिक्षक र एक जना विद्यार्थीमा सङ्क्रमण देखिएपछि विद्यालयका ९८ जनाको स्वाब परीक्षण गरिएकामा २१ जनामा कोभिड–१९ सङ्क्रमण पुष्टि भएको हो । बाँकी सङ्क्रमितहरू सोही क्षेत्रकै अन्य विद्यालयका शिक्षक, विद्यार्थी र स्थानीय भएको स्वास्थ्य कार्यालय बागलुङका फोकल पर्सन देवप्रकाश घिमिरेले जानकारी दिनुभयो ।

सङ्क्रमितको सम्पर्क आएकाको पहिचान गरेर परीक्षण गरी उपचार गर्नको लागि वैशाख वैशाख ७ गते देखि वैशाख १७ गते सम्म तीनओटै वडामा निषेधाज्ञा जारी गर्ने जिल्ला कोभिड सङ्कट व्यवस्थापन समितिको वैशाख १४ गते बसेको बैठकले निर्णय गरेको हो ।

प्यूठान प्रतिनिधि रविन्द्र पाण्डेका अनुसार प्यूठान नगरपालिका–७ पुण्यखोलास्थित क्षेत्र विकास माविका दुई जना विद्यार्थीलाई सङ्क्रमण पुष्टी भएपछि सो विद्यालय एक साताका लागि बन्द गरिएको छ ।

विद्यालयमा अध्यनरत अन्य विद्यार्थीहरुमा पनि जोखिम बढ्ने भन्दै विद्यालय बन्द गरिएको प्रधानाध्यापक पिताम्बर खडकाले जानकारी दिनुभयो ।

विद्यालय व्यवस्थापन समितिको वैशाख ७ गते बसेको बैठकको निर्णय अनुसार सूचना प्रकाशन गरी वैशाख ८ गतेदेखि १४ गतेसम्म विद्यालय बन्द गरिएको हो ।

एक वर्षअघि

स्वास्थ्य तथा जनसङ्ख्या मन्त्रालयले ०७७ वैशाख ८ गते  सम्म ३१ जनामा कोभिड-१९ पुष्टि भएको थियो ।

कोरोना भाइरसको सङ्क्रमणसम्बन्धी दैनिक अपडेट (२०७७ वैशाख ८ गते)

अनलाइन डेस्क