समाचारहरू

माघ २२ गते १ सय ७१ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ७१ हजार ६ सय २ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ३ हजार ८ सय ७८ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ६७ हजार २ सय ९२ जना निको भएका छन् । माघ २२ गते २ सय २७ जना निको भएका छन् भने निको हुनेको दर ९८.४ प्रतिशत रहेको मन्त्रालयले जनाएको छ । माघ २२ गतेसम्म २ हजार ३३ जना कोभिड सङ्क्रमितको मृत्यु भएको मन्त्रालयले जनायो । २ हजार २ सय ७७ जना सक्रिय सङ्क्रमित रहेकामा १  हजार ५ सय ७ जना होम आइसोलेशनमा छन् । उपचाररतमध्ये ६१ जनाको उपचार आइसीयूमा र १४ जनाको उपचार भेण्टिलेटरमा भइरहेको छ । मन्त्रालयका अनुसार भोजपुर, रुकुम पश्चिम, कालिकोट र मुगुमा सक्रिय सङ्क्रमित छैनन् भने काठमाडौँमा ५ सयभन्दा बढी सक्रिय सङ्क्रमित छन् ।

 गण्डकी प्रदेश

गोरखा प्रतिनिधि हरिराम उप्रेतीका अनुसार उत्तरी गोरखामा कोभिडविरूद्धको खोप हेलिकप्टरमार्फत ढुवानी गरिएको छ । माघ २२ गते गोरखा सदरमुकामबाट (दश भायल) १ सय डोज खोप चुमनुव्री गाउँपालिका अन्तर्गतका तीन वडामा ढुवानी गरिएको हो । सदरमुकामको केन्द्रसम्म आउन नसक्ने स्वास्थ्यकर्मी र महिला स्वास्थ्य स्वंयसेविकालाई लगाउन खोप पठाइएको स्वास्थ्य कार्यालय गोरखाका खोप कोल्डेचन निरीक्षक ऋषिराम खत्रीले बताउनुभयो । माघ १४ गतेबाट १८ गते सम्मको खोप अभियान अन्तर्गत सदरमुकामको केन्द्रमा आएर खोप लगाउन नपाएकाहरुलाई हेलिकप्टरबाट खोप ढुवानी गरी लगाउन लागिएको हो । चुमनुव्री गाउपालिका अन्तर्गतको सामागाउँ, ल्हो, प्रोक र विही गाउँको लिही, छेकम्पार र चुम्चेतको चुम्लिङ र सिर्दिवासको फिलिमिमा तीन ओटा केन्द्रमा खोप पुर्‍याइएको हो । लिहीमा ३०, चुम्लिङमा २० र फिलिममा १८ जना स्वास्थ्यकर्मी र महिला स्वास्थ्य स्वंयसेविकालाई खोप लगाउने खत्रीले बताउनुभयो ।

अनलाइन डेस्क