समाचारहरू

माघ १५ गते २ सय १३ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ७० हजार ५ सय ८८ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ३ हजार ७ सय ९१ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ६५ हजार ३ सय ६५ जना निको भएका छन् । माघ १५ गते २ सय ९६ जना निको भएका छन् भने निको हुनेको दर ९८.१ प्रतिशत रहेको मन्त्रालयले जनाएको छ । माघ १५ गते कोभिड सङ्क्रमितको मृत्यु नभएकाले मृतकको सङ्ख्या २ हजार २० नै रह्यो । ३ हजार २ सय ३ जना सक्रिय सङ्क्रमित रहेकामा २ हजार २ सय ४२ जना होम आइसोलेशनमा छन् । उपचाररतमध्ये १ सय ४६ जनाको उपचार आइसीयूमा र २६ जनाको उपचार भेण्टिलेटरमा भइरहेको छ । मन्त्रालयका अनुसार रुकुम पश्चिम, कालिकोट र मुगुमा सक्रिय सङ्क्रमित छैनन् भने काठमाडौँमा ५ सयभन्दा बढी सक्रिय सङ्क्रमित छन् ।
कोभिड-१९ खोप अभियानको दोस्रो दिन माघ १५ गते देशभर २८ हजार ७ सय ३२ जनालाई खोप लगाइएको स्वास्थ्य तथा जनसङ्ख्या मन्त्रालयले जनाएको छ । पहिलो चरणमा स्वास्थ्यकर्मी, सुरक्षाकर्मी, सफाइकर्मी लगायतलाई खोप लगाउन सुरु गरिएको हो । नेपालले कोरोनाविरुद्ध कोभिशिल्ड खोप प्रयोगमा ल्याएको हो । माघ १४ गते ९ हजार ८४ जनालाई खोप लगाइएको थियो ।

अनलाइन डेस्क