कोभिड–१९ को संक्रमणले वडास्तरीय स्वास्थ्य सेवा प्रभावित हुँदा बिरामीलाई समस्या

  ०७७ असोज २७ गते

कोभिड१९ को सङ्क्रमणको जोखिमको कारण तनहुँको भानु नगरपालिकाका वडाहरूमा दिदै आइएको स्वास्थ्य सेवा प्रभावित हुँदा सेवाग्राहीलाई समस्या भएको छ ।

नगरपालिकामा यस अघि प्रत्येक तीन / तीन महिनामा हुँदै आएको सुगर (मधुमेह) र प्रेसर (उच्च रक्तचाप)को परीक्षण हाल रोकिएको छ । जसको कारण मधुमेह र रक्तचापका बिरामीलाई नियमित औषधी सेवनकोलागि समस्या परेको छ ।

भानु नगरपालिका ६ की रुकमणी खनालले प्रत्येक तीन महिनामा वडा स्तरमा हुने परीक्षण रोकिदा मधुमेह र रक्तचापको बिरामीलाई औषधी निरन्तरता दिन नसकिएको बताउनुभयो ।

विशेषगरी ज्येष्ठ नागरिकहरु नियमित परीक्षण र औषधी सेवन गर्न नपाउँदा समस्यामा पर्ने गरेको उहाँले बताउनुभयो ।

युवा अवस्थाकाहरु स्वास्थ्य संस्थामा आफै गएर पनि परीक्षण गर्न सक्छन्’ –उहाँले भन्नु भयो – ‘तर ज्येष्ठ नागरिक र अशक्तहरुलाई घरमै गएर परीक्षण गर्न नपाउँदा निकै समस्या परेको छ ।

कोभिडकै त्रासको कारण स्वास्थ्य संस्थामा परीक्षण गर्न गएपनि स्वास्थ्यकर्मीहरुले नजिकै आएर परीक्षण गर्न डराउने उहाँको भनाइ छ ।

त्यसैगरी विगत तीन महिनादेखी बालबालिकालाई दिइने नियमित खोपसेवा पनि अवरूद्ध भएको भानु नगरपालिका १० की सोभा पन्तले बताउनुभयो ।

कोभिडको कारण भन्दै खोप लगाउने आउने स्वास्थ्यकर्मी नआउँदा बालबालिकालाई लगाइने नियमित खोप सेवा पनि बन्द भएको पन्तले बताउनुभयो ।

भानु नगरपालिकाका स्वास्थ्य शाखाका प्रमुख ऐश्वर्यचन्द्र भट्टराईले अहिले स्वास्थ्यकर्मीको अभाव भएको कारण वडा वडामा गएर मधुमेह र रक्तचापको परीक्षण गर्न नसकिएको बताउनुभयो ।

कोभिडको त्रासको कारण गाउँगाउँमा जान सक्ने अवस्था पनि नरहेको हुँदा सबैलाई स्वास्थ्य संस्थामा नै आउन अनुरोध गरिएको उहाँको भनाइ छ ।

नगरपालिकाका सबै वडामा पाँच सय भन्दा बढी ज्येष्ठ नागरिक तथा अशक्तहरुलाई यस अघि वडा वा पायक पर्ने ठाउँमा गएर परीक्षण गरिँदै आएको प्रमुख भट्टराईले जानकारी दिनुभयो ।


प्रकाशचन्द्र भट्टराई