समाचारहरू

एक सातामा महिला सङ्क्रमितको सङ्ख्या १ प्रतिशतले बढेको छ भने १ सयभन्दा बढी सङ्क्रमितको मृत्यु भएको छ । एक सातामा कोभिड–१९ का सङ्क्रमित १६ हजार १ सय जना थपिएका छन् । अघिल्लो साताको तुलनामा थपिएका सङ्क्रमितको सङ्ख्यामा झण्डै ५ हजारले कमी आएको छ । गत साता २० हजार ७ सय १ जना सङ्क्रमित थपिएका थिए । कात्तिक ११ गते १ लाख ६० हजार ४ सय जना सङ्क्रमित भएकामा कात्तिक १७ गते कूल सङ्क्रमित १ लाख ७६ हजार ५ सय जना पुगेको स्वास्थ्य तथा जनसङ्ख्या मन्त्रालयले जनाएको छ । यो बिचमा १९ हजार १ सय ४९ जना निको भएका छन् । गत साता निको हुनेको सङ्ख्या १९ हजार ६६ थियो । निको हुनेको कूल सङ्ख्या १ लाख ३७ हजार ९ सय ९२ पुगेको छ । एक साताको अवधिमा १ सय ८ जना कोभिड सङ्क्रमितको मृत्यु भएको छ । योसँगै मृत्यु हुनेको सङ्ख्या ९ सय ८४ पुगेको छ । एक सातामा ६९ हजार १ सय १८ ओटा स्वाब परीक्षण गरिएको मन्त्रालयको तथ्याङ्कमा उल्लेख छ । गत साता ८३ हजार ४ सय ओटा स्वाब परीक्षण गरिएको थियो । यो साता पनि महिला सङ्क्रमितको सङ्ख्या बढेको छ । कात्तिक ११ गते ३२ प्रतिशत महिला सङ्क्रमित रहेकामा कात्तिक १७ गते आइपुग्दा ३३ प्रतिशतमा पुगेको छ । कात्तिक ४ गते कूल सङ्क्रमितमध्ये ३१ प्रतिशत महिला थिए ।

प्रदेश १
स्वास्थ्य तथा जनसङ्ख्या मन्त्रालयका अनुसार कात्तिक ११ गतेदेखि कात्तिक १८ गतेसम्मको अवधिमा झापामा २ सय ७१ जना पुरूष र १ सय ९० जना महिला गरी ४ सय ६१ जनामा कोभिड–१९ को सङ्क्रमण पुष्टि भएको छ । त्यसैगरी सुनसरीमा ३ सय ६३ जना पुरूष र ३ सय ६ जना महिला गरी ६ सय ६९ जना, खोटाङमा २१ जना पुरूष र पाँच जना महिला गरी २६ जना, मोरङमा ५ सय ६१ जना पुरूष र ३ सय ७२ जना महिला गरी ९ सय ३३ जना, उदयपुरमा ३० जना पुरूष र १८ जना महिला गरी ४८ जना, धनकुटामा १४ जना पुरूष र सात जना महिला गरी २१ जना, इलाममा ११ जना पुरूष र १२ जना महिला गरी २३ जना, पाँचथरमा तीन जना, ओखलढुङ्गामा आठ जना पुरूष र दुई जना महिला गरी १० जना, भोजपुरमा ६ जना पुरूष र ६ जना महिला गरी १२ जना, सङ्खुवासभामा १० जना पुरूष र तीन जना महिला गरी १३ जना, ताप्लेजुङमा एक जना पुरूष र एक जना महिला गरी दुई जना, सोलुखुम्बुमा ७२ जना पुरूष र १८ जना महिला गरी ९० जना र तेहृथुममा नौ जना पुरूष र तीन जना महिला गरी १२ जनामा कोभिड–१९ को सङ्क्रमण पुष्टि भएको छ । एक साताको अवधिमा प्रदेश १ मा २ हजार ३ सय २३ जनामा कोभिड–१९ को सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।
कोभिड–१९ सङ्क्रमितको उपचारका लागि मोरङमा निजी क्षेत्रको सक्रियतामा अक्सिजनसहितको १ सय बेडको नागरिक केयर सेन्टर निर्माण अन्तिम चरणमा पुगेको छ । कोशी अस्पताल कोभिड–१९ उपचार केन्द्र परिसरमा रहेको नेशनल ट्रेडिङको भवनमा १ करोड रुपियाँको लागतमा १ सय बेडको नागरिक केयर सेन्टर निर्माण अन्तिम चरणमा पुगेको नागरिक केयर सेन्टरका संयोजक पवन सारडाले बताउनु भयो । तिहार अगावै सञ्चालन गर्ने गरी केयर सेन्टर निर्माण कार्य भइरहेको सारडाले बताउनु भयो । अक्सिजन चाहिने बिरामीका लागि निजी अस्पतालमा चर्को शुल्क लिने गरेको गुनासो आएपछि निजी क्षेत्रले प्रदेश सरकार र विराटनगर महानगरपालिकासँगको सहकार्यमा केयर सेन्टर निर्माण कार्य अघि बढाएको हो । कोभिड–१९ सङ्क्रमित बढ्दै आएपछि निजी क्षेत्रसँगको सहकार्यमा १ सय बेडको नागरिक केयर सेन्टर निर्माण सुरू गरिएको सामाजिक विकास मन्त्री जीवन घिमिरेले बताउनु भयो । विराटनगरमा कोभिड–१९ संक्रमित बढेसँगै अक्सिजन वेडको अभाव भएपछि निजी क्षेत्रसँगको सहकार्यमा नागरिक केयर सेन्टर निर्माण सुरू गरिएको विराटनगर महानगरपालिकाका प्रमुख भीम पराजुलीले बताउनु भयो ।

प्रदेश २
एक सातामा प्रदेश २ मा कोभिड सङ्क्रमित ५ सय २९ जना थपिएका छन् । अघिल्लो साता ५ सय ६६ जना थपिएका थिए । कात्तिक ११ गते १७ हजार ८ सय ४९ सङ्क्रमित रहेकामा कात्तिक १७ गते आइपुग्दा यो सङ्ख्या बढेर १८ हजार ३ सय ७८ पुगेको छ । एक सातामा थप सात जना सङ्क्रमितको मृत्यु भएको छ । प्रदेश २ मा कात्तिक १७ गतेसम्म १ सय ५७ जनाको मृत्यु भएको छ । एक सातामा ६ सय ७१ जना सङ्क्रमित सङ्क्रमण मुक्त भएका छन् । कात्तिक ११ गते १ हजार २ सय २१ जना सक्रिय सङ्क्रमित भएकामा कात्तिक १७ गतेसम्म आइपुग्दा १ सय ४९ घटेर १ हजार ७२ मा आएको छ ।

बागमती प्रदेश
यस प्रदेशमा कात्तिक १८ गते कोभिड–१९ सङ्क्रमणको सङ्ख्या महिला ३५ हजार ५ सय ७ जना र पुरुष ५७ हजार ८ सय २५ जना गरी जम्मा ९३ हजार ३ सय ३२ जना पुगेको छ । अघिल्लो साता ८२ हजार ५ सय ४७ जना कोभिड–१९ सङ्क्रमित रहेकोमा यो साता १० हजार ७ सय ८५ जना सङ्क्रमित थपिएका हुन् । अघिल्लो साताभन्दा यो साता नयाँ सङ्क्रमणको यो सङ्ख्या ५ हजारले कम हो । यस प्रदेशका कूल सङ्क्रमितमध्ये ६९ हजार ७ सय ३२ जना उपचारपछि निको भइसकेका छन् भने विभिन्न अस्पतालका आइसोलेशन तथा होम आइसोलेशनमा २३ हजार १ सय ३२ जना उपचाररत छन् । अघिल्लो साता सक्रिय सङ्क्रमतिको सङ्ख्या २६ हजार १ सय ९४ जना रहेकोमा यो साता २ हजार ३ सय ४० जना कम भई २३ हजार १ सय ३२ जनामा झरेको हो ।
यस प्रदेशमा महिला सङ्क्रमितको प्रतिशत प्रत्येक साता बढिरहेको छ । अघिल्लो साता ३७.६ प्रतिशत महिला र ६२.४ प्रतिशत पुरुष सङ्क्रमित भएकोमा कात्तिक १० गते आइपुग्दा महिला सङ्क्रमित ०.४ प्रतिशन बढेर ३८ प्रतिशत पुगेको छ भने पुरुष सङ्क्रमित ६२ प्रतिशत रहेको छ । बागमती प्रदेशमा अघिल्लो साता देशको कूल सङ्क्रमणको सङ्ख्या ५१.६६ प्रतिशत मात्र रहेकोमा कात्तिक १७ गते आइपुग्दा बढेर ५२.८९ प्रतिशत पुगेको छ । यस प्रदेशमा २१ देखि ५० वर्ष उमेरका सङ्क्रित दुई तिहाईभन्दा बढी रहेका छन् भने मृत्यु हुनेको प्रतिशत भने ६० वर्ष माथिका उमेरमा बढी छ । यस प्रदेशमा कोभिड–१९ सङ्क्रमण पुष्टि भएका मध्येमा अघिल्लो हप्ता ६७.७८ प्रतिशत निको हुनेको सङ्ख्या रहेकामा कात्तिक १७ गते आइपुग्दा यो सङ्ख्या बढेर ७४.७ प्रतिशत पुगेको छ ।

गण्डकी प्रदेश
गण्डकी प्रदेशमा कात्तिक १२ गते बाट कात्तिक १७ गतेसम्म थप १ हजार ३ सय ६१ जनामा कोभिड–१९ सङ्क्रमण देखिएको छ । जसमध्ये ८ सय ८८ जना पुरुष र ४ सय ७४ जना महिला रहेका छन् । योसँगै प्रदेशमा सङ्क्रमितको सङख्या ८ हजार ४५ पुगेको छ । यो साता कोभिड–१९ को सङक्रमणबाट १ हजार ८ जना निको भएका छन् । योसँगै प्रदेशमा निको हुनेको सङ्ख्या ६ हजार ६ सय ९४ रहेको छ । हालसम्म प्रदेशमा कोभिड–१९ को सङ्क्रमणबाट ५४ जनाको मृत्यु भएको छ जसमध्ये यो साता १३ जनाको मृत्यु भएको हो । स्वास्थ्य तथा जनसङ्ख्या मन्त्रालयको कात्तिक १७ गतेको तथ्याङ्क अनुसार प्रदेशमा हाल २ हजार ५ सय ४९ जना सक्रिय सङ्क्रमित रहेका छन् । कास्की र नवलपरासी (पूर्व) जिल्लामा ५ सय भन्दा बढी सक्रिय सङ्क्रमित छन् । सक्रिय सङ्क्रमितहरूमध्ये १ हजार ३ सय ५९ जना होम आइसोलेशनमा बसेका छन् भने ६४ जना आइसीयू र आठ जना भण्टिलेटरमा रहेका छन् ।
पर्वतको जलजला गाउँपालिकामा कोभिड–१९ बाट सङ्क्रमित हुनेको सङ्ख्या बढ्न थालेपछि समुदायस्तरमा परीक्षणलाई पालिकाले व्यापक बनाउने भएको छ । सङ्क्रमितको कन्ट्याक्ट ट्रेसिङमा परेका व्यक्तिहरूमा धमाधम कोभिड पुष्टि हुन थालेपछि गाउँपालिकाले ‘एक घर–एक पीसीआर जाँच’ अभियान सुरू गरेको हो । गाउँपालिकाले कात्तिक ११ गते बाट यो अभियान सञ्चालन गरेको छ । ‘आजैबाट अभियानको शुरुवात गरेका छौँ ।’–गाउँपालिका अध्यक्ष रामकृष्ण मल्लले भन्नुभयो–‘पीसीआर परिक्षणका लागि पहिलो चरणमा लक्षण देखिएका व्यक्तिहरू सम्पर्कमा आएका छन् ।’ जलजला गाउँपालिकाका करिब ५ हजार ७७ परिवारका सदस्यलाई परीक्षण गर्ने अभियान थालिएको अध्यक्ष मल्लले बताउनुभयो । हरेक घरमा एक जनाको स्वाब सङ्कलन गरिएपनि कोभिड–१९ सङक्रमितको परिवारका भने सबैको स्वाब सङ्कलन गरिनेछ ।
कास्कीमा गण्डकी प्रदेश सरकारले कोभिड सङक्रमितको उपचारको जिम्मा लिने घोषणा गरेपनि कोभिड सङक्रमितले सहज रूपमा अस्पतालमा बेड पाउन सकेका छैनन् । सङ्घीय सरकार मातहतको पोखरा स्वास्थ्य विज्ञान प्रतिष्ठानले कोभिड सङक्रमितलाई भर्ना भएको १४ दिन पुग्नासाथ डिस्चार्ज गर्दै आएको छ । प्रतिष्ठानको आइसोलेशन सेण्टरमा उपचाररत पोखरा मनपा–५ की कोभिड सङ्क्रमित महिलालाई नेगेटिभ रिपोर्ट नआउँदै अस्पतालले डिस्चार्ज ग¥यो । बुधबार अस्पतालले डिस्चार्ज गरेपछि उहाँ हाल प्रस्याङ्स्थित आफ्नै घरमा हुनुहुन्छ । कोभिड सङ्क्रमण निको नहुञ्जेलसम्म उपचार गर्ने प्रदेश सरकारको घोषणा विपरीत सङ्घ अन्तर्गतको प्रतिष्ठानले बिरामी डिस्चार्ज गराएको छ । ४० शैयाको आइसोलेशन बेड रहेको प्रतिष्ठानमा बिरामीको सङ्ख्या दैनिक बढेकाले डिस्चार्ज गरिएको मेडिकल सुपरिटेण्डेण्ट डाक्टर अर्जुन आचार्यको भनाइ छ । सामाजिक विकास मन्त्रालयका वरिष्ठ जनस्वास्थ्य प्रशासक डाक्टर राम केसी प्रदेश सरकारले दिएको मौखिक निर्देशन प्रतिष्ठानले नमानेको तर्क गर्नुहुन्छ । केही समन्वयको अभावपनि रहेको हुनसक्ने बताउँदै छलफलबाट समस्या समाधान गरिने उहाँको भनाइ छ ।

कर्णाली प्रदेश
कर्णाली प्रदेशमा कात्तिक १७ गते १३ जनामा कोभिड–१९ सङ्क्रमणको पुष्टि भएसँगै सङ्क्रमित हुनेको सङ्ख्या ५ हजार ६ सय ६५ जना पुगेको छ । जसमध्ये ४ सय ४९ जना होम आइसोलेशनमा छन् भने पाँच जना आइसीयूमा उपचार गराइरहेका छन् । प्रदेशभरी ५ सय ४ जना सक्रिय सङ्क्रमित छन् । यस्तै ५ हजार १ सय ४९ जना निको भएर घर गइसकेका छन् । कोभिड–१९ को सङ्क्रमणबाट १२ जनाको मृत्यु भएको छ । अघिल्लो साता मृतकको सङ्ख्या १० रहेको थियो । यस प्रदेशमा एक साताअघि कोभिड–१९ सङ्क्रमितको सङ्ख्या ५ हजार ५ सय २२ रहेको थियो । यो साता १ सय ४३ जना सङ्क्रमित थपिएका हुन् ।

सुदूरपश्चिम प्रदेश
एक सातामा सुदूरपश्चिम प्रदेशमा कोभिड सङ्क्रमित २ सय ५४ जना थपिएका छन् । कात्तिक ११ गते ९ हजार ७ सय १७ सङ्क्रमित रहेकामा कात्तिक १७ गते आइपुग्दा यो सङ्ख्या बढेर ९ हजार ९ सय ७१ पुगेको छ । एक सातामा यो प्रदेशमा मृत्यु हुनेको सङ्ख्या भने थप भएको छैन । सुदूरपश्चिम प्रदेशमा कात्तिक १७ गतेसम्म १७ जनाको मृत्यु भएको छ । एक सातामा ५ सय ५९ जना सङ्क्रमित सङ्क्रमण मुक्त भएका छन् । कात्तिक ११ गते १ हजार २ सय ९ जना सक्रिय सङ्क्रमित भएकामा कात्तिक १७ गतेसम्म आइपुग्दा ३ सय ४ घटेर ९ हजार ४ मा आएको छ ।

अनलाइन डेस्क