समाचारहरू

यो साता कोभिड परीक्षण दैनिक १ हजार ३५ जना कोभिड सङ्क्रमित थपिएका छन् भने १ हजार ३ सय ५ जना निको भएका छन् । स्वास्थ्य तथा जनसङ्ख्या मन्त्रालयद्वारा जारी तथ्याङ्क अनुसार एक साताको अवधिमा ४५ हजार ८ सय २५ ओटा स्वाब परीक्षण गरिएकामा ७ हजार २ सय ४९ जनामा कोभिड पुष्टि भएको छ । गत साता ७ हजार २ सय ३० जना सङ्क्रमित थपिएका थिए । गत साता ४४ हजार ४ सय ९ ओटा स्वाब परीक्षण गरिएको थियो । यो एक सातामा १ सय २ जना कोभिड सङ्क्रमितको मृत्यु भएको पनि मन्त्रालयले जनाएको छ ।

प्रदेश १
स्वास्थ्य तथा जनसङ्ख्या मन्त्रालयका अनुसार मङ्सिर २३ गतेदेखि मङ्सिर २९ गतेसम्मको अवधिमा झापामा १ सय २५ जना पुरूष र १ सय ७३ जना महिला गरी १ सय ९८ जनामा कोभिड–१९ को सङ्क्रमण पुष्टि भएको छ । त्यसैगरी सुनसरीमा १ सय ४७ जना पुरूष र ८७ जना महिला गरी २ सय ३४ जना, खोटाङमा दुई जना पुरूष र एक जना महिला गरी तीन जना, मोरङमा १ सय ६० जना पुरूष र १ सय २३ जना महिला गरी २ सय ८३ जना, उदयपुरमा नौ जना पुरूष र पाँच जना महिला गरी १४ जना, धनकुटामा आठ जना पुरूष, इलाममा १९ जना पुरूष र १४ जना महिला गरी ३३ जना, पाँचथरमा पाँच जना पुरूष र तीन जना महिला गरी आठ जना, ओखलढुङ्गामा आठ जना पुरूष र एक जना महिला गरी नौ जना, भोजपुरमा पाँच जना पुरूष, सङ्खुवासभामा १९ जना पुरूष र चार जना महिला गरी २३ जना, ताप्लेजुङमा पाँच जना पुरूष र चार जना महिला गरी नौ जना, सोलुखुम्बुमा १२ जना पुरूष र तीन जना महिला गरी १५ जना, तेहृथुममा तीन जना पुरूष र दुई जना महिला गरी पाँच जनामा कोभिड–१९ को सङ्क्रमण पुष्टि भएको छ । प्रदेश १ मा रहेका कोशी कोभिड–१९ अस्पताल,प्रदेश जनस्वास्थ्य प्रयोगशाला, वीपी कोइराला स्वास्थ्य विज्ञान प्रतिष्ठान घोपा प्रयोगशाला, मेची अस्पताल प्रयोगशाला, कोटीहोम प्रयोगशाला, नोवेल अस्पताल प्रयोगशाला, विराट अस्पताल प्रयोगशाला र न्यूरो अस्पताल प्रयोगशालामा गरिएको कोभिड–१९ को परीक्षणमा प्रदेश १ मा एक साताको अवधिमा प्रदेश १ मा ६ सय ६७ जनामा कोभिड–१९ को सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।

प्रदेश २
एक सातामा प्रदेश २ मा कोभिड सङ्क्रमित १ सय ३१ जना थपिएका छन् । अघिल्लो साता ३ सय १५ जना थपिएका थिए । मङ्सिर २३ गते २० हजार ३ सय ५३ सङ्क्रमित रहेकामा मङ्सिर २९ गते आइपुग्दा यो सङ्ख्या बढेर २० हजार ४ सय ८४ पुगेको छ । एक सातामा थप तीन जना कोभिड सङ्क्रमितको मृत्यु भएपछि प्रदेशमा मृत्यु हुनेको सङ्ख्या २ सय ७ पुगेको छ । एक सातामा २ सय ३० जना सङ्क्रमित सङ्क्रमण मुक्त भएका छन् ।

गण्डकी प्रदेश
गण्डकी प्रदेशमा मङ्सिर २३ गतेबाट मङ्सिर २९ गतेसम्म थप ८ सय ७ जनामा कोभिड–१९ सङ्क्रमण देखिएको छ । जसमध्ये ४ सय ८६ पुरुष र ३ सय २१ जना महिला रहेका छन् । योसँगै प्रदेशमा कुल सङ्क्रमितको सङख्या १४ हजार ७ सय ६८ रहेको छ । यो साता कोभिड–१९ को सङ्क्रमणबाट १ हजार ५ जना निको भएका छन् । योसँगै प्रदेशमा निको हुनेको कूल सङ्ख्या १४ हजार ७ सय २२ रहेको छ । हालसम्म प्रदेशमा कोभिड–१९ को सङ्क्रमणबाट कूल १ सय ३२ जनाको मृत्यु भएको छ जसमध्ये यो साता २२ जनाको मृत्यु भएको हो । स्वास्थ्य तथा जनसङ्ख्या मन्त्रालयको मङ्सिर २९ गतेको तथ्याङ्क अनुसार प्रदेशमा हाल १ हजार १ सय ९८ जना सक्रिय सङ्क्रमित रहेका छन् जसमध्ये कास्की जिल्लामा ५ सय भन्दा बढी रहेका छन् । सक्रिय सङ्क्रमितमध्ये १ हजार १ सय ९ जना होम आइसोलेशनमा बसेका छन् भने ७१ जना आइसियू र १० जना भेण्टिलेटरमा रहेका छन् ।

लुम्बिनी प्रदेश
यो साता लुम्बिनी प्रदेशमा ६ सय ४३ जना पुरुष र ३ सय ७० जना महिला गरी जम्मा १ हजार १३ जनामा कोभिड सङ्क्रमण पुुष्टि भयो । यो साता पनि उच्च सङ्क्रमण हुने जिल्लामा रुपन्देही नै रह्यो जसमा १ सय ९५ पुरुष र १ सय सात महिला गरी ३ सय २ जना सङ्क्रमित भए । सबैभन्दा कम रुकुम पुर्वमा एक जनामा मात्र सङ्क्रमण देखियो । यो साता अघिल्लो साता भन्दा सङ्क्रमित सङ्ख्या घटेको छ । महिलाभन्दा पुरुषमा बढी सङ्क्रमण भएको स्वास्थ्य मन्त्रालयको तथ्याङ्कले देखाएको छ । यसैगरी,  प्रदेशमा ९ सय ४४ जना होम आइसोलेशन, ३५ जना आइसियू र तीन जना भेण्टिलेटरमा रहेका छन् । कोभिड सङ्क्रमण देखिएदेखि हालसम्म प्रदेशमा निको भएकाहरूको सङ्ख्या २६ हजार ६७ छ भने सक्रिय सङ्क्रमितको सङ्ख्या १ हजार ३ सय ५९ रहेको छ । हालसम्म मृत्यु हुनेको सङ्ख्या २ सय २२ रहेको छ ।

कर्णाली प्रदेश
कर्णाली प्रदेशमा मङ्सिर २३ गते १ सय ४९ जना कोभिड–१९ का सक्रिय सङ्क्रमित भएसँगै सङ्क्रमित हुनेको सङ्ख्या ६ हजार २ सय ५६ रहेको छ । हालसम्म ६ हजार ८३ जना निको भइसकेका छन् । कोभिड –१९ को सङ्क्रमणबाट यो साता थप मृत्यु नभएकाले मृत्यु हुनेको सङ्ख्या २४ रहेको छ । यो प्रदेशमा एक साताअघि कोभिड सङ्क्रमितको सङ्ख्या ६ हजार १ सय ७६ रहेको थियो । यो साता ८० जना सङ्क्रमित थपिएका हुन् ।

सुदूरपश्चिम प्रदेश
स्वास्थ्य तथा जनसङ्ख्या मन्त्रालयका अनुसार सुदूरपश्चिम प्रदेशमा मङ्सिर २३ गतेदेखि मङ्सिर २९ गतेसम्म १ सय ७८ जनामा सङ्क्रमण पुष्टि भएसँगै सङ्क्रमित हुनेको सङ्ख्या १ हजार ८२ पुगेको छ । गत सातासम्म सुदूरपश्चि प्रदेशमा ९ सय ४ जना सङ्क्रमित रहेकामा मङ्सिर २९ गते सङ्क्रमितको सङ्ख्या १ हजार ८२ पुगेको हो । यो साता सुदूरपश्चिम प्रदेशमा पाँच जना सङ्क्रमितको मृत्यु भएसँगै यस प्रदेशमा मृत्यु हुनेको सङ्ख्या ५० जना पुगेको छ । यस प्रदेशमा मङ्सिर २९ गतेसम्म ७ सय ३७ जना होम आइसोलेशनमा रहेका छन भने १० जना आइसियू र तीन जना भेण्टिलेटरमा उपचारत छन् । मङ्सिर २९ गतेसम्म यस प्रदेशका १२ हजार १ सय ३० जना कोरोना सङ्क्रमणबाट निको भएका छन् ।

अनलाइन डेस्क