कैदीबन्दीका समस्याबारे कारागारमै अन्तरक्रिया

  ०७४ पुस ४ गते

कैदीबन्दीका समस्याहरू बारे जानकारी लिने उद्धेश्यले जिल्ला कारागार बैतडीका कैदीबन्दीहरूसँग प्रमुख जिल्ला अधिकारीलगायत जिल्लाका सुरक्षा प्रमुखहरूले पुस ४ गते अन्तरक्रिया गरेका छन् ।

कारागारमा उनीहरूले भोग्दै आएका समस्याबारे छलफल गर्दै उनीहरूका लागि उद्यमशीलतासम्बन्धी तालिमको ब्यवस्था गर्न उक्त अन्तरक्रिया कार्यक्रम आयोजना गरिएको प्रजिअ शिद्धराज जोशीले बताए ।

कैदीबन्दीहरूलाई एक आपसमा मिलेर बस्न अनुरोध गर्दै जेलबाट बाहिर निस्कँदा असल नागरिक भएर निस्कनु पर्ने प्रजिअ जोशीले कैदीबन्दीलाई सुझाव दिएका छन् ।

कैदीबन्दीहरूलाई उद्यमी बनाउन तालिम दिइनुपर्ने र त्यसका लागि आफूहरू तयार रहेको जिल्ला घरेलु विकास समिति, बैतडीका प्रमुख नारायण न्यौपानेले बताए ।

जिल्ला कारागारका कैदीबन्दीहरूले पहिलो चोटी आफूहरूसँग यस्तो कार्यक्रमको आयोजना गरिँदा आफूहरू खुसी भएको बताएका छन् । उनीहरूले खेलकुद सामग्रीको ब्यवस्था मिलाइदिन अनुरोध गर्दै कारागार भित्र कैदीबन्दीहरूबिच एक आपसमा मैत्रीपूर्ण वातावरण निर्माणको लागि अनुरोध गरेका थिए ।

कैदीबन्दीहरूलाई कारागारले दिने सेवा सुबिधामा कुनै कमी नरहेको कारागार प्रमुख अनिल तिवारीले बताए ।


नरी बडु