कुटपिट घटनाका आरोपित प्रहरी निलम्बित

  ०७७ साउन २ गते

आठविसकोट नगरपालिका ९ बगर निवासी २१ वर्षीया नेहा बिष्टलाई गत जेठ १ गते कुटपिट गरेको आरोपमा इलाका प्रहरी कार्यालय आठविसकोट काजमा रहेका प्रहरी हवल्दार पृथ्वीबहादुर आग्री, प्रहरी जवान शक्तिबहादुर परियार र आठबिसकोट नगर प्रहरी आठविसकोट नपा-९ की २१ वर्षीया निर्मला बिकलाई निलम्बन गरिएको जिल्ला प्रहरी कार्यालय रुकुम पश्चिमका प्रमुख डिएसपी ठगबहादुर केसीले जानकारी दिनुभयो ।

प्रहरी हवल्दार आग्री र प्रहरी जवान परियारलाई कर्णाली प्रदेश प्रहरीले असार ३१ गते र नगर प्रहरी बिकलाई आठबिसकोट नगरपालिकाले असार २५ गते निलम्बन गरेको हो ।

महिलामाथि कुटपिट गरिरहेको भिडियो समाजिक सञ्जालमार्फत सार्वजनिक भएपछि जिल्ला प्रहरी कार्यालयका इन्स्पेक्टर कविराज रोकाको संयोजकत्वमा आन्तरिक छानबिन समिति र आठविसकोट नगरपालिकाले पनि प्रमुख प्रशासकीय अधिकृतको संयोजकत्वमा छानबिन समिति बनाएर छानबिन अगाडि बढाएका थिए ।

छानबिनको क्रममा प्रहरी हवल्दार र जवानको कमजोरी देखिएपछि उनीहरूलाई निलम्बन गरेको डिएसपी केसीको भनाइ छ ।

असार २३ गते नेहा बिष्टमाथि प्रहरीबाट कुटपिट भएको भिडियो सामाजिक सञ्जालमार्फत सार्वजनिक भएको थियो ।


मनिषा केसी