कुटपिट घटनाका आरोपित पति गिरफ्तार

  ०७६ असोज २९ गते

रामपुर नगरपालिका–४ गिजिनडाँडाकी १८ वर्षीया खगीसरा सोमैलाई कुटपिट गरेको आरोपमा प्रहरीले २५ वर्षीय पति भुमबहादुर सोमैलाई असोज २८ गते गिरफ्तार गरेको छ ।

पीडित महिलालाई आरोपितले असोज ९ गतेदेखि दैनिक रुपमा कुटपिट गर्दै आएको पीडित महिलाले आरोप लगाएकी छन् ।

कुटपिटबाट घाइते भएकी खगीसराको असोज २७ गते साँझबाट लुम्बिनी मेडिकल कलेज प्रभासको आइसियुमा उपचार भइरहेको जिल्ला प्रहरी कार्यालयका डिएसपी कृष्णराज सापकोटाले बताए ।

कुटपिटबाट घाइते खगिसराको टाउको र अनुहारमा चोट लागेको छ । पीडित पक्षले असोज २७ गते जिल्ला प्रहरी कार्यालयमा उजुरी दिएका थिए ।

वैदेशिक रोजगारीको सिलसिलामा रहेका भूमबहादुर घरमा फर्किए लगत्तै पत्नीलाई परपुरुषसँग मिलेको भन्ने शंकामा विवाद भएको पीडित पक्षले जनाएको छ ।


यज्ञमूर्ति तिमिल्सिना