कुटपिट गरेको आरोपमा देवर गिरफ्तार

  ०७३ कात्तिक १५ गते

डाँडापराजुल गाविस-५ सिमटोलकी २८ वर्षीया पूजा भण्डारीलाई दाउरा प्रहार गरी घाइते बनाएको आरोपमा प्रहरीले उनका ३५ वर्षीय देवर भीमबहादुर भण्डारीलाई कात्तिक १५ गते गिरफ्तार गरेको छ ।

पीडित महिलालाई दुई महिनादेखि भएको अंशसम्बन्धी विवादलाई लिएर कात्तिक १४ गते दाउराले टाउकोमा प्रहार गरेको आरोप छ ।

'कात्तिक १४ गते बिहान खाना खाने तयारीमा थियौँ । भाइले एक्कासी पछिल्तिरबाट टाउकोमा दाउराले प्रहार गर्‍यो । पूजा बेहोस भइन् ।'-पीडितका पति जङ्गबहादुर भण्डारीले भने ।

पीडित महिलाको प्राथमिक उपचार स्थानीय स्वास्थ्यचौकीमा गरेपछि अहिले जिल्ला अस्पतालमा थप उपचार भइरहेको छ । पीडित महिलाको टाउकोमा नौ ओटा टाँका लगाइएको उनका पतिले बताएका छन् ।

पीडित महिलालाई आरोपितले दाउराले प्रहार गरेको बेला छुट्याउन गएकी पूजाकी जेठी छोरी १४ वर्षीया जानकी भण्डारी र पूजाकी बहिनी २१ वर्षीया सीता खड्कालाई पनि चोट लागेको जिल्ला प्रहरी कार्यालयका इन्स्पेक्टर भुवनेश्वरप्रसाद साहले जानकारी दिए ।


अमर सुनार