कुटपिट गरी गम्भीर घाइते बनाएको आरोपमा पति गिरफ्तार

  ०७३ असोज २६ गते

थबाङ गाविस-८ की ३८ वर्षीया सोनाकुमारी नेपालीलाई कुटपिट गरी गम्भीर घाइते बनाएको आरोपमा प्रहरीले ४० वर्षाय पति ध्रुव नेपालीलाई असोज २६ गते गिरफ्तार गरेको छ ।

असोज २५ गते राति १२ बजे सुतिरहेकी सोनाकुमारीलाई आरोपितले मदिरा सेवन गरेर कुटपिट गरेको आरोपमा उजुरी आएपछि अनुसन्धानका लागि प्रहरी चौकी थबाङले असोज २६ गते गिरफ्तार गरेको जिल्ला प्रहरी कार्यालय रोल्पाले जनाएको छ ।

कुटपिटबाट सोनाकुमारीको टाउको र दायाँ कञ्चटमा गम्भीर चोट लागी बेहोस भएपछि राति अरुले कुटपिट गरेको भन्दै ध्रुवले बिहान आफै प्रहरीलाई खबर गरेका थिए ।

पीडितको थवाङ सामुदायिक अस्पतालमा उपचार भइरहेको छ । पीडितको टाउकोमा २९ ओटा टाँका लगाइएको छ ।

आरोपितलाई इलाका प्रहरी कार्यालय थवाङमा राखी थप अनुसन्धान थालिएको जिल्ला प्रहरी कार्यालय रोल्पाका इन्स्पेक्टर केशवबहादुर बस्नेतले जानकारी दिएका छन् ।


माधवकुमार ओली