कार्यरत चिकित्सक समायोजन हुँदा अस्पताल चिकित्सकविहीन, सेवाग्राही मर्कामा

  ०७६ असोज ८ गते

१५ जना चिकित्सकको दरबन्दी रहेको जिल्ला अस्पताल इलाममा पुग्ने अधिकांश स्वास्थ्य सेवाग्राही महिना दिनयता स्वास्थ्य लाभ नलिई फर्कन बाध्य भएका छन् ।

भएको दरबन्दीमा क्रियाशील पाँच जना चिकित्सक र आकस्मिक सेवाका चार जना चिकित्सक कर्मचारी समायोजनमा कोही स्थानीय र कोही सङ्घमा समायोजन भएपछि अस्पताल यतिबेला चिकित्सकविहीन भएको छ ।

अस्पतालमा कार्यरत विशेषज्ञ सेवासहितका चिकित्सक समायोजनमा परेर तोकिएको ठाउँमा गएपछि स्वास्थ्य सेवा लिन अस्पताल पुग्ने बिरामी मर्कामा परेका छन् ।

अस्पताल प्रमुखका रूपमा रहेका स्त्रीरोग विशेषज्ञ डक्टर पवनजङ्ग रायमाझीले आफूसहित जिल्ला अस्पतालमा कार्यरत पाँच जना डाक्टरहरू समायोजनामा परेर कहाँ रहने भन्ने टुङ्गो नभएको बताए ।

‘मेरो त सरूवाको पत्र आइसकेको छ । काठमाडौँ जाँदैछु ।’–उनले भने–‘केही दिनका लागि मात्र हामीले सेवा दिइरहेका छौँ ।’

असिस्टेण्ट हेल्थ वर्करसहित अस्पतालको आकस्मिक सेवाका चार जना स्वास्थ्यकर्मी समायोजनमा सङ्घमै परेका छन् । आकस्मिक सेवाकै दुई स्वास्थ्यकर्मी फाजिलमा परेको अस्पतालमा प्रमुख डाक्टर रायमाझीले बताए ।

५० शैयामा स्तरवृद्घिपछि १५ जना विशेषज्ञ डाक्टरको दरबन्दी रहेको अस्पतालमा डाक्टरहरू नहुँदा प्रसूतिबाहेक ठूलो शल्यक्रियासमेत हुन नसकेको प्रमुख डक्टर रायमाझीले बताए ।

विषेशज्ञ डक्टर नहुँदा र कार्यरत डक्टर पनि समायोजनामा परेर जाँदा दैनिक आउने २ सय बिरामी प्रत्यक्ष प्रभावित भएका छन् ।

‘ठूलो अस्पताल भनेर आयो । स्वास्थ्य बीमाको उपचार गर्न पनि यतै आउनु पर्छ ।’–सेवा लिन आएका इलाम नगरपालिका–१ साँखेजुङका ५३ वर्षीय सोमबहादुर राईले भने–‘अस्पताल आउँदा सिक्नका लागि आएका विद्यार्थीले उपचार गर्छन् । कसरी विश्वास गर्ने र सेवा लिने ?’

नेपालको संविधान, ०७२ ले स्वास्थ्यसम्बन्धी हकलाई मौलिक हकका रूपमा व्यवस्था गरेको छ । संविधानको धारा ३५ मा स्वास्थ्यसम्बन्धी हकको व्यवस्था गरिएको छ ।

सोही धाराको उपधारा १, मा प्रत्येक नागरिकलाई राज्यबाट आधारभूत स्वास्थ्य सेवा निःशुल्क प्राप्त गर्ने हक हुनेछ र कसैलाई पनि आकस्मिक स्वास्थ्य सेवाबाट वञ्चित गरिने छैन भन्ने उल्लेख छ ।


कोकिला ढकाल