कारागार जिर्ण भएपछि कैदीबन्दी व्यवस्थापनमा समस्या

   ०७७ भदौ २३ गते

२०४२ सालमा निर्माण भएको पर्वत जिल्ला कारागार जिर्ण हुँदा कैदीबन्दी व्यवस्थापनमा समस्या भएको छ । करिव ३५ वर्ष अघि निर्माण भएको सो कारागारमा अहिले निरन्तरको वर्षासँगै पर्खालहरू भत्किन थालेपछि समस्या उब्जिएको हो ।

महिला कैदीबन्दीहरू राखिएको भाग तर्फको करिव २० मिटर मुख्य सुरक्षा पर्खाल साउन ६ गते भत्किएपछि अहिले कारागार प्रशासनलाई व्यवस्थापनमा समस्याको परेको त छ नै त्यसमा पनि कैदी बन्दीहरू ढुक्कसाथ बस्न सक्ने अवस्था रहेको छैन ।

क्षमता भन्दा करिब चार गुणा कैदीबन्दी रहेको पर्वत कारागारको जिर्णोद्धारका लागि स्थानीय प्रशासनले चासो देखाएपनि सम्बन्धित निकायबाट त्यसतर्फ ध्यान नजाँदा समस्या जटिल बन्दै गएको छ ।

गत साउनमा मुख्य पर्खाल भत्किएको भएपनि करिब डेढ महिनासम्म कारागार प्रशासनले उक्त पर्खाल मर्मत गर्न सकेको छैन । फलामको काँडे तार लगाएर काम चलाइएको छकारागार पर्वतका निमित्त जेलर हरिकृष्ण शर्माले भन्नुभयोविभागमा सिफारिस गरिएको छ तर मर्मतका लागि बजेट आएको छैन । तत्कालै जिल्ला प्रशासन कार्यालय पर्वतका प्रमुख जिल्ला अधिकारीको रोहबरमा छलफलनै गरेर विभागमा जिर्णोद्धारका लागि माग गरिएपनि ठोस निर्णय केही नभएको शर्माले बताउनुभयो ।

२५ जना कैदीबन्दी राख्ने गरी निर्माण भएको वर्गको पर्वत जिल्ला कारागारमा अहिले ९२ जना कैदीबन्दी रहँदै आएका छन् । कैदीबन्दीहरू थपिँदै जाँदा समस्या भएको र त्यसमा पनि पुरानो संरचना जिर्णोद्धार गर्न नसक्दा झनै समस्या भएको शर्माले बताउनुभयो ।

पर्खाल र भित्र आवास भवन समेत जिर्ण भएका कारण कारागार भित्र समेत सुरक्षित रूपमा हिँड्डुल गर्न र बस्न नपाइएको कारागारमा पुर्पक्षका लागि रहनुभएका मनोज विकले गुनासो गर्नुभयो ।

प्रमुख जिल्ला अधिकारी शम्भुप्रसाद रेग्मीले कारागारको पुरानो संरचनालाई हटाएर नयाँ र आधुनिक संरचना निर्माण गर्नका लागि कारागार केन्द्रीय विभाग, शहरी तथा भवन निर्माण विभाग लगायतका सम्बन्धित निकायमा सिफारिस गरिएको बताउनुभयो ।

उहाँले तत्कालै समस्याको समाधान हुने नदेखिएको र तत्कालका लागि सुरक्षा पर्खालको मर्मत गर्नुपर्ने देखिएकोले सोही अनुरूप विभागमा थप पत्राचार गरिएको बताउनुभयो ।

मुख्य सुरक्षा पर्खाल नै भत्किएपछि कारागार सुरक्षाका लागि खटिएका प्रहरी सुरक्षाकर्मीहरू समेत पर्खालमा हिँड्न नमिल्ने अवस्था रहेको छ । पर्खालमा वरिपरि हिँडे्र कारागार र कैदी बन्दीको सुरक्षार्थ खटिने सुरक्षाकर्मीहरू अहिले निश्चित स्थानमा बसेर सुरक्षा गर्न बाध्य रहेका छन् ।

पर्वत कारागारमा यस अघि महिला कैदीबन्दी राखिदै आएपनि पर्खाल भत्किएकै कारण कारागारमा रहेका सात जना महिला कैदी बन्दीलाई बागलुङ र म्याग्दीका कारागारमा स्थानान्तरण गरिएको छ ।Photo20200908parbat


सन्तोष थापा