कारागारमा स्वास्थ्यकर्मी नहुँदा विरामीलाई उपचारमा समस्या

  ०७५ जेठ २६ गते

जिल्ला कारागार दार्चुलामा स्वास्थ्यकर्मी नहुँदा कैदीबन्दीको स्वास्थ्य उपचारमा समस्या भएको छ । विगत २ वर्षदेखि कारागारमा स्वास्थ्यकर्मी नहुँदा कैदी बन्दीको उपचारमा समस्या भएको जिल्ला कारागारले जनायो ।

कारागारका कैदीबन्दीको उपचारको लागि सरकारले सिनियर अहेवको दरबन्दी दिएपनि कर्मचारी नपठाउँदा उपचारमा समस्या हुने गरेको सूचना अधिकारी विजयकुमार ठाकुरले बताए । जिल्ला कारागार दार्चुलामा ०७३ चैतबाट स्वास्थ्यकर्मी छैनन् । स्वास्थ्यकर्मी नहुँदा सामान्य बिरामीको चेक गर्न जिल्ला अस्पताल लिनुपर्ने बाध्यता रहेको कारागारले जनाएको छ ।

कारागारबाट कैदीबन्दीलाई हत्कडी लगाएर हिँडाएरै अस्पतालसम्म पुर्‍याउन निकै जोखिम छ । मानव अधिकारको दृष्टिकोणले समेत कैदी बन्दीलाई हत्कडी लगाएर जनमानसमा लैजानु उपयुक्त नभएपनि स्वास्थ्यकर्मी नपठाउँदा समस्या भएको छ ।

यसैबिच व्यास गाउँपालिका-५ घर भएका कैदी हरकसिंह धामीलाई उपचारको लागि धनगढी रिफर गरिएको छ । जिल्ला अस्पतालमा उपचार सम्भव नभएपछि थप उपचारका लागि धनगढी कारागार रिफर गरिएको हो ।

केही दिनदेखि बिरामी भएका कैदीको चेकजाँच जेठ २४ गते जिल्ला अस्पताल दार्चुलामा गराइएको थियो । जिल्ला अस्पतालमा धामीको रोग पत्ता नलागेपछि थप उपचारका लागि धनगढी रिफर गरिएको जिल्ला कारागार दार्चुलाका सूचना अधिकारी ठाकुरले बताए ।

उनलाई कारागार धनगढी सरूवा गरेर उपचार गराउन लागिएको हो । हाल जिल्ला कारगारमा ३१ जना कैदी तथा नौ जना बन्दी र १ जना नाबालक रहेका छन् ।


नरेन्द्रसिंह कार्की