कारागारमा समस्यै समस्या भएको कैदीबन्दीको गुनासो

  ०७३ मङ्सिर ३ गते

महान्यायधिवक्ताको कार्यालयको एक टोलीले मङ्सिर २ र ३ गते रुकुम कारागारको मानव अधिकार तथा अन्य भौतिक पुर्वाधारको अवस्थाबारे अनुगमन गरेको छ ।

जिल्ला स्थित सरोकारवाला निकायको सहभागितामा महान्यायधिवक्ताको कार्यालयबाट आएका सह महान्यायधिवक्ता खेमराज ज्ञवाली नेतृत्वको टालीले जिल्ला कारागार र जिल्ला प्रहरी कार्यालय रुकुमको हिरासत निरीक्षण गरेको हो ।

मुद्दा अनुसन्धानको क्रममा प्रहरीले हिसातमा यातना दिने, कुटेर दोषी प्रमाणित गर्ने, आवश्यकता भन्दा बढि थुनुवा एकै कोठामा राख्ने, पिउने पानी र शौचालयको अभाव भएकोलगायतका गुनासो आएको ज्ञवालीले जानकारी दिए ।

२५ जना क्षमता रहेको रुकुम कारागारमा हाल ६० जना पुरूष, सात जना महिला गरी ६७ जना कैदीबन्दी र दुई जना नाबालकसमेत ६९ जना रहेको कारागार शाखाले जनाएको छ ।

क्षमता भन्दा बढी कैदीबन्दी राख्दा आफूहरूको मानव अधिकार उल्लङ्घन गरेको भन्दै तत्काल यसमा सुधारको लागि पहल गरिदिन सुरज परियारले टोलीसमक्ष अनुरोध गरे ।


आदर्श केसी